മധ്യ യുക്രെയ്നിൽ റഷ്യൻ മിസൈൽ ആക്രമണം; 41 പേർ കൊല്ലപ്പെട്ടതായി പ്രസിഡൻ്റ് വോളോഡിമർ സെലെൻസ്കി

രണ്ട് റഷ്യൻ ബാലിസ്റ്റിക് മിസൈലുകൾ യുക്രെയ്നിലെ മധ്യമേഖലയിലെ വിദ്യാഭ്യാസ സ്ഥാപനത്തിലും അടുത്തുള്ള ആശുപത്രിയിലും പതിച്ചതിനെ തുടർന്ന് 41 പേർ കൊല്ലപ്പെട്ടു. ആക്രമണത്തിൽ 180 പേർക്ക് പരിക്കേൽക്കുകയും ചെയ്തതായി പ്രസിഡൻ്റ് വോളോഡിമർ സെലെൻസ്‌കിയെ ഉദ്ധരിച്ച് വാർത്താ ഏജൻസി അസോസിയേറ്റഡ് പ്രസ് റിപ്പോർട്ട് ചെയ്തു.

റഷ്യയുടെ പുതിയ ആക്രമണങ്ങൾ യുക്രെയ്നിൻ്റെ സെൻട്രൽ പോൾട്ടാവ മേഖലയെ ലക്ഷ്യം വച്ചിരുന്നു, 900 ദിവസങ്ങൾക്ക് മുമ്പ്, 2022 ഫെബ്രുവരി 24 ന്, യുക്രെയ്നുമായുള്ള സംഘർഷം പൊട്ടിപ്പുറപ്പെട്ടതിനുശേഷം റഷ്യ നടത്തിയ ഏറ്റവും മാരകമായ ആക്രമണങ്ങളിലൊന്നാണ് ഇത്.

"ഇൻസ്റ്റിറ്റ്യൂട്ട് ഓഫ് കമ്മ്യൂണിക്കേഷൻസിൻ്റെ ഒരു കെട്ടിടം ഭാഗികമായി തകർന്നു. ആളുകൾ അവശിഷ്ടങ്ങൾക്കടിയിൽ പെട്ടു. പലരും രക്ഷപ്പെട്ടു," സെലെൻസ്‌കി തൻ്റെ ടെലിഗ്രാം ചാനലിൽ പറഞ്ഞതായി എപി റിപ്പോർട്ട് ചെയ്യുന്നു.