വടക്കാഞ്ചേരി പെട്രോൾ പമ്പിൽ മോഷണം നടത്തിയ പ്രതികൾ പിടിയിൽ

തൃശൂർ : വടക്കാഞ്ചേരി പെട്രോൾ പമ്പിൽ മോഷണം നടത്തിയ പ്രതികൾ പിടിയിൽ .വടക്കാഞ്ചേരി പരപ്പനങ്ങാടി സ്വദേശികളായ റസല്‍, ആഷിക്ക് എന്നിവരാണ് പിടിയിലായത്. കോഴിക്കോട് പന്നിയങ്കര പൊലീസാണ് പ്രതികളെ അറസ്റ്റ് ചെയ്തത്.  ബുധനാഴ്ച പുലര്‍ച്ചെ 12.50 നാണ് സംഭവം. ദേശീയപാതയില്‍ പന്തലാംപാടത്തിനു സമീപത്തുള്ള പെട്രോള്‍ പമ്പില്‍ നിന്നും ബൈക്കിലെത്തിയവര്‍ പണം തട്ടിയെടുത്ത് കടന്നുകളയുകയായിരുന്നു. മാസ്‌ക് ധരിച്ച് ബൈക്കില്‍ പമ്പിലെത്തിയ രണ്ടു പേര്‍ പെട്രോള്‍ അടിക്കുന്ന സ്ഥലത്തെത്തി ജീവനക്കാരുടെ സമീപം വെച്ചിരുന്ന ബാഗ് തട്ടിയെടുത്തു പോവുകയായിരുന്നു. 48380 രൂപയടങ്ങിയ ബാഗാണ് കവര്‍ന്നതെന്ന് ജീവനക്കാര്‍ പറഞ്ഞു.

ഇരുവരും നിരവധി ബൈക്ക് മോഷണ കേസുകളിൽ പ്രതികളെന്ന് പൊലീസ് പറഞ്ഞു. പ്രതികൾ കവർച്ചയ്ക്ക് ഉപയോ​ഗിച്ച ബൈക്ക് എറണാകുളത്ത് നിന്ന് മോഷ്ടിച്ചതാണെന്ന് പൊലീസ് കണ്ടെത്തി. പൊലീസിന് ലഭിച്ച സിസിടിവി ​ദൃശ്യം ഉപയോ​ഗിച്ചാണ് അന്വേഷണം നടത്തിയത്. മോഷ്ടാക്കൾ ഉപയോ​ഗിച്ച ബൈക്കിന്റെ ഉടമയുടെ മേൽവിലാസം പരിശോധിച്ചപ്പോൾ എറണാകുളം സ്വദേശിയുടെതാണെന്ന് കണ്ടെത്തി.  എറണാകുളം സ്വദേശിയുടെ ബൈക്ക് ഇന്നലെ മോഷണം പോയതായി തെളിഞ്ഞിരുന്നു. എറണാകുളം നോർത്ത് റെയിൽവേ സ്റ്റേഷന് സമീപം നിർത്തിയിട്ട ബൈക്ക് മോഷ്ടിച്ചാണ് പമ്പിൽ മോഷണം നടത്തിയതെന്ന് തെളിഞ്ഞു.