പരീക്ഷ എഴുതാനെത്തിയ പത്താംക്ലാസ് വിദ്യാർത്ഥികൾ തമ്മിൽ കത്തികുത്ത്; മൂന്ന് വിദ്യാർത്ഥികൾക്ക് കുത്തേറ്റു

മലപ്പുറം :  മലപ്പുറം പെരിന്തൽമണ്ണയിൽ  പരീക്ഷ എഴുതാനെത്തിയ പത്താംക്ലാസ് വിദ്യാർത്ഥികൾ ചേരിതിരിഞ്ഞ് കത്തികുത്ത്. താഴെക്കോട് പി ടി എം ഹയർ സെക്കൻഡറി സ്കൂളിലെ വിദ്യാർത്ഥികൾ  തമ്മിലാണ് കത്തിക്കുത്ത് ഉണ്ടായത്.  മൂന്ന് വിദ്യാർത്ഥികൾക്ക് കുത്തേറ്റു. മൂന്ന് വിദ്യാർത്ഥികൾ ചേർന്ന് ആക്രമിക്കുകയായിരുന്നു. തലയ്ക്കും സാരമായ പരിക്കേറ്റിട്ടുണ്ട്. വിദ്യാർത്ഥികളിൽ ഒരാൾ കത്തി ഉപയോഗിച്ച് കുത്തി പരിക്കേൽപ്പിക്കുകയായിരുന്നു.പരിക്കേറ്റ വിദ്യാർത്ഥികളെ മഞ്ചേരി മെഡിക്കൽ കോളേജിലേക്ക് മാറ്റി.

സ്കൂൾ വിദ്യാർത്ഥികളായ ഫർഹാൻ, മുഹമ്മദ് അജ്മൽ, മുഹമ്മദ് റിസ്‍ലാൻ എന്നിവർക്കാണ് പരിക്കേറ്റത്. . പത്താംക്ലാസ് മലയാളം  മീഡിയം വിദ്യാർത്ഥികളും  ഇം​ഗ്ലീഷ് മീഡിയം വിദ്യാർത്ഥികളും തമ്മിലാണ് ഏറ്റുമുട്ടലുണ്ടായത്. അക്രമ സ്വഭാവമുള്ള ഈ വിദ്യാർത്ഥിയെ നേരത്തെ സ്‌കൂളിൽ നിന്ന് പുറത്താക്കിയിരുന്നു. പരീക്ഷ എഴുതാൻ വേണ്ടി മാത്രമാണ് അധ്യാപകർ അനുവാദം നൽകിയത്. ഒൻപതാം ക്ലാസ് മുതൽ വിദ്യാർത്ഥികൾ തമ്മിൽ വാക്ക് തർക്കം ഉണ്ടായിരുന്നു. സ്കൂളിൽ പൊലീസ് എത്തി തുടർനടപടി സ്വീകരിച്ചു.