ഓര്‍മ്മയില്ലേ മാലിന്യം നിറഞ്ഞ ആമയിഴഞ്ചാന്‍ തോട്, വേണമെന്നുവെച്ചാല്‍ അതും വൃത്തിയാകും, തിരുവനന്തപുരം കോര്‍പ്പറേഷന്‍ ഇടപെടല്‍ വിജയത്തിലേക്ക്

തിരുവനന്തപുരം: മാലിന്യം നിറഞ്ഞ ആമയിഴഞ്ചാന്‍ തോട് തിരുവനന്തപുരം കോര്‍പ്പറേഷന്റെ നിശ്ചയദാര്‍ഡ്യത്തില്‍ മാലിന്യ മുക്തമാകുന്നു. ശുചീകരണ തൊഴിലാളി ജോയിയുടെ മരണത്തെ തുടര്‍ന്ന് വാര്‍ത്തകളില്‍ ഇടംനേടിയ തോടിന്റെ ശുചീകരണ പ്രവര്‍ത്തി പൂര്‍ത്തിയായി വരുന്നതായി മന്ത്രി എംബി രാജേഷ് അറിയിച്ചു. മേയര്‍ ആര്യ രാജേന്ദ്രന്റെ നേതൃത്വത്തിലാണ് തോട്ടിലെ മാലിന്യങ്ങള്‍ വൃത്തിയാക്കിയത്.

എംബി രാജേഷിന്റെ ഫേസ്ബുക്ക് പോസ്റ്റ്,

വേണമെങ്കില്‍ ആമയിഴിഞ്ചാന്‍ തോടും വൃത്തിയാകും...

ആമയിഴഞ്ചാന്‍ തോട്ടിലെ മാലിന്യപ്രശ്‌നം മലയാളി അങ്ങനെ എളുപ്പം മറക്കില്ലല്ലോ? റെയില്‍വേ നിയോഗിച്ച ശുചീകരണ തൊഴിലാളിയായ ജോയിയുടെ മരണം നൊമ്പരമായി മനസ്സിലുണ്ടാകും. അപകടത്തിന് പിന്നാലെ മുഖ്യമന്ത്രിയുടെ നേതൃത്വത്തില്‍ ചേര്‍ന്ന യോഗത്തിന്റെ തീരുമാനപ്രകാരം ശക്തമായ നടപടികളാണ് നഗരസഭ സ്വീകരിച്ചുവരുന്നത്. ജോയിയുടെ മൃതദേഹം കാണപ്പെട്ട തകരപറമ്പ് ഭാഗത്ത് ഇന്ന് രാവിലെ ആ പ്രവര്‍ത്തനങ്ങള്‍ നേരിട്ടുതന്നെ കണ്ടുവിലയിരുത്തി. പ്ലാസ്റ്റിക് മാലിന്യം കൊണ്ട് മൂടപ്പെട്ട നിലയിലുണ്ടായിരുന്ന തോട്, ഇന്ന് സുഗമമായി ഒഴുകുന്നുണ്ട്. ഇനിയും മാറ്റം വരാനുണ്ട്, എങ്കിലും ഇതൊരു നല്ല സൂചനയാണ്. ആമയിഴിഞ്ചാന്‍ തോടിനെ മാലിന്യമുക്തമാക്കാനുള്ള  ശ്രമങ്ങള്‍ക്ക് നേതൃത്വം നല്‍കുന്ന മേയര്‍ ആര്യ രാജേന്ദ്രന്റെ നേതൃത്വത്തിലുള്ള തിരുവനന്തപുരം കോര്‍പറേഷനെ പ്രത്യേകം അഭിനന്ദിക്കുകയാണ്. വിവിധ വകുപ്പുകളുടെ ഉടമസ്ഥതയിലുള്ള തോടും പരിസരവുമായിട്ടും, മാലിന്യപ്രശ്‌നത്തെ ഫലപ്രദമായി നേരിടാനുള്ള നേതൃത്വമായി പ്രവര്‍ത്തിക്കാന്‍ നഗരസഭയ്ക്ക് കഴിഞ്ഞു.

തോട് മാലിന്യമുക്തമായി കൃത്യമായ പ്രവര്‍ത്തനങ്ങള്‍ ആണ് നഗരസഭ സ്വീകരിച്ചു വരുന്നത്. തോട് കടന്നുപോകുന്ന 8 വാര്‍ഡുകളില്‍ ജനകീയ സമിതി പ്രവര്‍ത്തിക്കുന്നുണ്ട്. തോട് സംരക്ഷിക്കുന്നതിന്റെ ഭാഗമായി രാത്രി കാലങ്ങളില്‍ മൂന്ന് സ്‌ക്വാഡുകളെയും പകല്‍ സമയങ്ങളില്‍ രണ്ടു സ്‌ക്വാഡുകളെയും നിയോഗിച്ചു മാലിന്യം വലിച്ചെറിയുന്നവരെ കണ്ടെത്തി നടപടികള്‍ സ്വീകരിക്കുന്നുണ്ട്. അനധികൃതമായി മാലിന്യം ശേഖരിക്കുന്നവരെയും അത് ജലാശയങ്ങളില്‍ നിക്ഷേപിക്കുന്നവരെയും പിടികൂടി നിയമ നടപടികള്‍ സ്വീകരിക്കുവാന്‍ ഈ സ്‌ക്വാഡുകള്‍ക്ക് കഴിഞ്ഞു. ഇത്തരത്തില്‍ 24 വാഹനങ്ങള്‍ക്കെതിരെ FIR രജിസ്റ്റര്‍ ചെയ്തു. മാലിന്യം വലിച്ചെറിഞ്ഞ 31 പേര്‍ക്കെതിരെ FIR രജിസ്റ്റര്‍ ചെയ്തു. ആമയിഴഞ്ചാന്‍ തോടില്‍ ഒഴുകിയെത്തുന്ന പ്ലാസ്റ്റിക് മാലിന്യങ്ങള്‍ ശേഖരിക്കുവാന്‍ തോടിലെ വിവിധ ഇടങ്ങളിലായി 9 ഫ്ളോട്ടിങ് ബൂമുകള്‍ സ്ഥാപിച്ചിട്ടുണ്ട്. ഈ ബൂമുകള്‍ തടഞ്ഞു നിര്‍ത്തുന്ന പ്ലാസ്റ്റിക് മാലിന്യങ്ങള്‍ എല്ലാ ദിവസങ്ങളിലും രണ്ട് നേരം ശേഖരിക്കുകയും, അത് തരംതിരിച്ചു ഉണക്കി മുട്ടത്തറയില്‍ എത്തിച്ചു, അവിടെ നിന്നും സിമന്റ് ഫാക്ടറിയിലേക്ക് നല്‍കുകയുമാണ് ചെയ്യുന്നത്. രാജാജി നഗറിന്റെ അതിര്‍ത്ഥികളില്‍ രണ്ടു ഫ്ളോട്ടിങ് ബൂമുകള്‍ കൂടി ഉടനെ സ്ഥാപിക്കും. തകരപ്പറമ്പ് ഭാഗത്ത് ആമയിഴഞ്ചാന്‍ തോടിലേക്ക് ബന്ധിപ്പിച്ചിരിക്കുന്ന ഓടയില്‍ ഇരുമ്പ് മെഷുകള്‍ സ്ഥാപിച്ചിട്ടുണ്ട്. ഓടകളിലൂടെ എത്തുന്ന മാലിന്യങ്ങള്‍ തോടിലേക്ക് വീഴുന്നത് ഈ മെഷുകള്‍ തടയും. ആമയിഴഞ്ചാന്‍ തോടിന്റെ വിവിധ ഭാഗങ്ങളില്‍ 24 ക്യാമറകളാണ് സ്ഥാപിച്ചിട്ടുള്ളത്. ഈ ക്യാമറകള്‍ നഗരസഭയുടെ ICCCയില്‍ നിരീക്ഷിച്ചു നിയമ ലംഘനങ്ങള്‍ കണ്ടെത്തി നടപടികള്‍ സ്വീകരിച്ചു വരുന്നു. കൂടാതെ ഇറിഗേഷന്‍ വകുപ്പിന്റെ നേതൃത്വത്തില്‍ ആമയിഴഞ്ചാന്‍ തോട് മുഴുവനായി ഡോം ഫെന്‍സിംഗിനായി എസ്റ്റിമേറ്റ് തയ്യാറാക്കിയിട്ടുമുണ്ട്. ഡോം ഫെന്‍സ് പൂര്‍ത്തിയാകുന്നതോടെ മാലിന്യങ്ങള്‍ വലിച്ചെറിഞ്ഞു തോടിലേക്ക് തള്ളുന്ന സാഹചര്യം ഇല്ലാതാവുക തന്നെ ചെയ്യും. രാജാജി നഗറിലെ ദ്രവമാലിന്യങ്ങള്‍ പൂര്‍ണമായും തടയുന്നതിനായി കോംപാക്ട് STP സ്ഥാപിക്കുന്നതിനായി ടെന്‍ഡര്‍ നടപടികള്‍ പൂര്‍ത്തിയായിട്ടുണ്ട്. ഇത് നടപ്പിലാകുന്നതോടെ ഈ പ്രദേശത്തെ 900 വീടുകളിലെ ദ്രവമാലിന്യങ്ങള്‍ പൂര്‍ണമായും ശാസ്ത്രീയമായി സംസ്‌കരിക്കുവാന്‍ കഴിയും. റെയില്‍വേയില്‍ നിന്ന് ഉള്‍പ്പെടെ ഇപ്പോഴും മാലിന്യം തള്ളുന്നുവെന്ന പരാതിയുണ്ട്. ഇപ്പോഴും തോട്ടില്‍ മാലിന്യം തള്ളുന്ന പൊതുജനങ്ങളും സ്ഥാപനങ്ങളുമുണ്ട്. ശക്തമായ നടപടി ഇവര്‍ക്കെതിരെ സ്വീകരിക്കുക തന്നെ ചെയ്യും.

വേണമെങ്കില്‍ ആമയിഴിഞ്ചാന്‍ തോടും വൃത്തിയാകുമെന്ന് തിരുവനന്തപുരം നഗരസഭ നമുക്ക് കാണിച്ചുതരുകയാണ്. ജനങ്ങളുടെ സഹകരണത്തോടെ തെളിനീരൊഴുകുന്ന  ആമയിഴിഞ്ചാന്‍ തോട് സാധ്യമാക്കാന്‍ കൂടി നഗരസഭയ്ക്ക് കഴിയട്ടെ എന്ന് ആശംസിക്കുന്നു