വിമാനത്തില്‍ അക്രമം അഴിച്ചുവിട്ട ഒമാനി കോ-പൈലറ്റ് ഇസ്ലാമിക ആശയങ്ങളാല്‍ തീവ്രവാദവല്‍ക്കരിക്കപ്പെട്ടു, പിന്നില്‍ ഇറാനാണോ എന്നും അന്വേഷിക്കുമെന്ന് നെതന്യാഹു

ടെല്‍ അവീവിലേക്ക് യാത്ര ചെയ്യുകയായിരുന്ന ഫ്‌ലൈദുബായ് വിമാനത്തില്‍ അക്രമം അഴിച്ചുവിട്ട ഒമാനി കോ-പൈലറ്റ് ഇസ്ലാമിക ആശയങ്ങളാല്‍ തീവ്രവാദവല്‍ക്കരിക്കപ്പെട്ടിരുന്നുവെന്ന് ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു . അക്രമിയുടെ ചോദ്യം ചെയ്യല്‍ തുടരുന്നതിനിടയിലാണ് അദ്ദേഹത്തിന്റെ ഈ വെളിപ്പെടുത്തല്‍.

കോ പൈലറ്റിന്റെ പശ്ചാത്തലത്തെക്കുറിച്ചുള്ള വിവരങ്ങള്‍ ശേഖരിക്കുകയാണെന്ന് നെതന്യാഹു പറഞ്ഞു. ഈ ആക്രമണത്തിന് പിന്നില്‍ ആരെങ്കിലും സഹായികള്‍ ഉണ്ടായിരുന്നോ, അതോ ഇതിന് പിന്നില്‍ ഇറാനാണോ തുടങ്ങിയ കാര്യങ്ങളും അന്വേഷണ ഉദ്യോഗസ്ഥര്‍ പരിശോധിക്കുമെന്നും അദ്ദേഹം വ്യക്തമാക്കി.

'അയാള്‍ ഇസ്ലാമിക തീവ്രവാദ ആശയങ്ങള്‍ക്ക് അടിപ്പെട്ടിരുന്നു എന്ന് ഞങ്ങള്‍ മനസ്സിലാക്കുന്നു. അദ്ദേഹത്തിന്റെ വ്യക്തിഗത വിവരങ്ങളില്‍ നിന്ന് ശേഖരിക്കുന്ന വിവരങ്ങളും അത് തന്നെയാണ് സൂചിപ്പിക്കുന്നത്' നെതന്യാഹു പറഞ്ഞു. യാത്രക്കാരുമായി ടെല്‍ അവീവിലേക്ക് പോവുകയായിരുന്ന ഫ്‌ലൈ ദുബായ് വിമാനത്തിലുണ്ടായ സംഭവങ്ങളെക്കുറിച്ച് വിശദീകരിക്കുമ്പോഴാണ് അദ്ദേഹം ഇക്കാര്യങ്ങള്‍ വ്യക്തമാക്കിയത്.

സംഭവസമയത്ത് കോ-പൈലറ്റ് പൈലറ്റിന്റെ രണ്ട് സീറ്റുകളില്‍ ഒന്നിലുമല്ല ഇരുന്നിരുന്നതെന്ന് നെതന്യാഹു പറഞ്ഞു. പകരം കോക്ക്പിറ്റിന്റെ നടുത്തളത്തിലുണ്ടായിരുന്ന അയാള്‍ വിമാനത്തിന്റെ ഉപകരണങ്ങള്‍ തകരാറിലാക്കാന്‍ ശ്രമിക്കുകയായിരുന്നു. തുടര്‍ന്ന് ഒരു ഇസ്രായേലി യാത്രികന്‍ ഇടപെടുകയും കോ-പൈലറ്റിനെ കണ്‍ട്രോള്‍ പാനലില്‍ നിന്ന് പിടിച്ചുമാറ്റുകയും ചെയ്തുവെന്ന് നെതന്യാഹു വ്യക്തമാക്കി. തുടര്‍ന്ന് വിമാനത്തിലുണ്ടായിരുന്ന മറ്റ് യാത്രക്കാര്‍ ചേര്‍ന്ന് അക്രമിയെ കീഴ്‌പ്പെടുത്തി. പ്ലാസ്റ്റിക് കഫുകള്‍ ലഭ്യമാകുന്നതുവരെ ഹെഡ്ഫോണ്‍ കോര്‍ഡ് ഉപയോഗിച്ചാണ് അയാളുടെ കൈകള്‍ ബന്ധിച്ചതെന്നും നെതന്യാഹു കൂട്ടിച്ചേര്‍ത്തു.
വിമാനത്തിന്റെ തറയില്‍ കിടന്നുകൊണ്ട് അയാള്‍ പിന്നീട് ക്രൂ അംഗങ്ങളോട് 'എന്നെ കൊല്ലൂ, എന്നെ കൊല്ലൂ' എന്ന് നിലവിളിച്ചതായി നെതന്യാഹു പറഞ്ഞു. കോ-പൈലറ്റിന്റെ ചോദ്യം ചെയ്യല്‍ ഇപ്പോഴും പുരോഗമിക്കുകയാണെന്നും അയാളുടെ യഥാര്‍ത്ഥ ലക്ഷ്യത്തെക്കുറിച്ച് അന്തിമ നിഗമനത്തില്‍ എത്തിയിട്ടില്ലെന്നും ഇസ്രായേല്‍ പ്രധാനമന്ത്രി വ്യക്തമാക്കി.