.jpg)
യുക്രെയ്‌നിൽ റഷ്യൻ ആക്രമണം ശക്തം; വൈദ്യുതിനിലയങ്ങൾ തകർന്നതോടെ ശൈത്യകാല ആശങ്ക
യുക്രെയ്‌നിലെ വിവിധ പ്രദേശങ്ങളിൽ റഷ്യ നടത്തിയ രാത്രികാല ആക്രമണങ്ങളിൽ വൈദ്യുതി വിതരണ സംവിധാനങ്ങൾക്ക് നാശനഷ്ടമുണ്ടായി. തലസ്ഥാനമായ കീവിലും സൈറ്റോമിറിലുമുള്ള വൈദ്യുതിനിലയങ്ങൾ ആക്രമണത്തിന് ഇരയായതായി റിപ്പോർട്ടുകൾ വ്യക്തമാക്കുന്നു. ഒഡേസയ്ക്ക് സമീപം കടലിലുണ്ടായിരുന്ന ചരക്കുകപ്പലിനും ആക്രമണത്തിൽ കേടുപാടുകൾ സംഭവിച്ചതായി റിപ്പോർട്ടുകളുണ്ട്.
തെക്കൻ യുക്രെയ്‌നിലെ കൊമിഷുവാഖയിൽ മാനുഷിക സഹായം സ്വീകരിക്കാൻ ആളുകൾ ഒത്തുകൂടിയിരുന്ന കേന്ദ്രത്തിന് നേരെയുണ്ടായ ആക്രമണത്തിൽ മരണസംഖ്യ 31 ആയി ഉയർന്നതായി യുക്രെയ്ൻ അധികൃതർ അറിയിച്ചു. നിരവധി പേരെ ഇപ്പോഴും കണ്ടെത്താനുണ്ടെന്നും കെട്ടിടാവശിഷ്ടങ്ങൾക്കിടയിൽ ആളുകൾ കുടുങ്ങിയിരിക്കാമെന്നും അധികൃതർ വ്യക്തമാക്കി. രക്ഷാപ്രവർത്തനങ്ങൾ തുടരുകയാണ്.
അതേസമയം യുക്രെയ്‌നിന് കൂടുതൽ സഹായം നൽകുന്നതിനെക്കുറിച്ച് യൂറോപ്യൻ യൂണിയൻ, അമേരിക്ക, ബ്രിട്ടൻ, ഫ്രാൻസ്, ജർമനി, നാറ്റോ, ലോകബാങ്ക് എന്നിവയുടെ പ്രതിനിധികൾ ബ്രസൽസിൽ ചർച്ച നടത്താൻ ഒരുങ്ങുകയാണ്. ശൈത്യകാലത്ത് വൈദ്യുതിയും ചൂടും ഉറപ്പാക്കുന്നതിനുള്ള സഹായമാണ് പ്രധാന ചർച്ചാവിഷയം. യുദ്ധം അവസാനിപ്പിക്കാനുള്ള നയതന്ത്ര ശ്രമങ്ങളും അബുദാബിയിൽ നടക്കാനിരിക്കുന്ന ചർച്ചകളും ഇതോടൊപ്പം പരിഗണിക്കുന്നുണ്ട്.