ഗസ്സയിലെ ദുരിതബാധിതർക്ക് കൂടുതൽ സഹായമെത്തിച്ച് സൗദി അറേബ്യ

യാംബു: ഇസ്രായേലി​െൻറ നിർത്താതെയുള്ള കര, വ്യോമ ആക്രമണത്തിനിടെ ജീവിതം ദുസ്സഹമായ ഗസ്സയിലെ ദുരിതബാധിതർക്ക് കൂടുതൽ സഹായമെത്തിച്ച് സൗദി അറേബ്യ. രണ്ട്​ ഡസനിലേറെ ദുരിതാശ്വാസ വിമാനങ്ങൾ അയച്ച സൗദി ശനിയാഴ്​ച മുതൽ കപ്പൽ മാർഗവും സഹായമെത്തിക്കാൻ തുടങ്ങിയിരുന്നു. 25 വിമാനങ്ങളിൽ ഉൾക്കൊള്ളുന്ന 1,050 ടൺ ദുരിതാശ്വാസ സാധനങ്ങളാണ് ഈജിപ്തിലെ പോർട്ട് സഈദിയിലെത്തിയത്. 13-ാമത് ദുരിതാശ്വാസ വിമാനം ഞായറാഴ്ച ഈജിപ്തിലെ അൽഅരീഷ് അന്താരാഷ്​ട്ര വിമാനത്താവളത്തിൽ ഇറങ്ങി.

റിയാദിലെ കിങ് ഖാലിദ് അന്താരാഷ്​ട്ര വിമാനത്താവളത്തിൽ നിന്നാണ് ഭക്ഷണവും പാർപ്പിട സാമഗ്രികളും മരുന്നും മറ്റു സഹായ വസ്തുക്കളും ഉൾപ്പടെ 39 ടൺ ഭാരം വഹിച്ച്​ വിമാനം പുറപ്പെട്ടത്. അൽഅരീഷിൽ നിന്ന് റഫ അതിർത്തി കടന്ന് ട്രക്ക്​ മാർഗമാണ് സഹായവസ്തുക്കൾ ഗസ്സയിലെത്തിക്കുന്നത്. മേഖലയിൽ യുദ്ധം അവസാനിപ്പിക്കാനും മാനുഷിക സഹായങ്ങൾ കൂടുതലെത്തിക്കാനും സൗദിയുടെ നേതൃത്വത്തിൽ തീവ്രമായ ശ്രമം തുടരുന്നതിനിടെയാണ് പല ഘട്ടങ്ങളിലായി ദുരിതാശ്വാസ സഹായങ്ങൾ എത്തിക്കുന്നത്.

സൽമാൻ രാജാവും കിരീടാവകാശിയും പ്രധാനമന്ത്രിയുമായ അമീർ മുഹമ്മദ് ബിൻ സൽമാ​െൻറയും നിർദേശമനുസരിച്ച് ഗസ്സയിലെ ആളുകളെ സഹായിക്കനുള്ള രാജ്യത്ത് ധനസമാഹരണ കാമ്പയിൻ ഊർജിതമായി നടക്കുകയാണ്. ഇതി​െൻറ ഭാഗമായാണ് ഗസ്സയിലെ ദുരിതപർവം തരണം ചെയ്യുന്ന ഫലസ്തീനികൾക്ക് സൗദിയുടെ ദുരിതാശ്വാസ വിമാനങ്ങൾ അയക്കുന്നത്. ഇസ്രായേലി​െൻറ അതിരൂക്ഷ ആക്രമണത്തിൽ ദുരിതത്തിലായ ഗസ്സയിലെ ജനതയെ സഹായിക്കാൻ കിങ് സൽമാൻ ഹ്യുമാനിറ്റേറിയൻ എയ്‌ഡ്‌ ആൻഡ് റിലീഫ് സെൻററിന് കീഴിൽ (കെ.എസ്‌.റിലീഫ്) ആരംഭിച്ച കാമ്പയിന് വൻ പ്രതികരണമാണ് ലഭിക്കുന്നത്.