പാകിസ്ഥാനിൽ സ്കൂൾ കെട്ടിടത്തിന്റെ മേൽക്കൂര തകർന്ന് വീണ് 29 വിദ്യാർത്ഥികളും അധ്യാപികയും കൊല്ലപ്പെട്ടു

കറാച്ചി:സ്കൂൾ കെട്ടിടത്തിന്റെ മേൽക്കൂര തകർന്ന് വീണ് 29 വിദ്യാർത്ഥികളും അധ്യാപികയും കൊല്ലപ്പെട്ടു. പാകിസ്ഥാനിലെ പേഷ്വാറിലെ സ്വകാര്യ സ്കൂൾ കെട്ടിടത്തിന്റെ മേൽക്കൂരയാണ് തകർന്നത്. അപകടത്തിൽ 40 ലേറെ പേർക്ക് പരിക്കേറ്റിട്ടുണ്ട്.രണ്ടാം നിലയിലെ കെട്ടിടത്തിന്റെ മേൽക്കൂരയാണ് തകർന്നത്.

വ്യാഴാഴ്ചയാണ് ഖൈബർ പക്തൂൺഖ്വ പ്രവിശ്യയിലാണ് അപകടമുണ്ടായത്. 13 വയസിന് താഴെ പ്രായമുള്ള വിദ്യാർത്ഥികളാണ് മരണപ്പെട്ടതിൽ ഏറെയും. പേഷ്വാറിലെ ദിർ കോളനിയിലാണ് അപകടമുണ്ടായ സ്കൂൾ സ്ഥിതി ചെയ്യുന്നത്. മൂന്ന് നില കെട്ടിടത്തിനുള്ളിലായിരുന്നു സ്കൂൾ പ്രവർത്തിച്ചിരുന്നത്.

വിദ്യാഭ്യാസ ട്രസ്റ്റ് എന്ന പേരിൽ പ്രവർത്തിച്ചിരുന്ന സ്കൂളിൽ 110 വിദ്യാർത്ഥികളാണ് പ്രവേശനം നേടിയിരുന്നത്. തകർന്നുവീണ മുകൾ നിലയിലെ ക്ലാസ് മുറിയിൽ 30 വിദ്യാർത്ഥികളാണ് ഉണ്ടായിരുന്നത്.അപകടത്തിൽ സ്കൂൾ ഉടമയെ അറസ്റ്റ് ചെയ്തിട്ടുണ്ട്.

കെട്ടിട നിർമ്മാണത്തിനായി നിലവാരമില്ലാത്ത വസ്തുക്കൾ ഉപയോഗിച്ചതായാണ് നിരീക്ഷണമെന്നാണ് പൊലീസ് വിശദമാക്കുന്നത്. സംഭവത്തിൽ വെള്ളിയാഴ്ചയ്ക്കുള്ളിൽ റിപ്പോർട്ട് നൽകാൻ പ്രാദേശിക വിദ്യാഭ്യാസ വകുപ്പ് വിശദമാക്കിയിട്ടുള്ളത്.