പുതിയ അപ്‌ഡേറ്റുകൾ അവതരിപ്പിച്ച് വാട്സ്ആപ്പ്

വാട്സ്ആപ്പിൽ പുതിയ അപ്‌ഡേറ്റുകൾ അവതരിപ്പിച്ചു. വാട്സ്ആപ്പ് ചാറ്റുകൾ, കോളുകൾ, ചാനൽ തുടങ്ങിയ ഫീച്ചറുകളുടെ അനുഭവം മെച്ചപ്പെടുത്തും വിധമാണ് പുതിയ മാറ്റങ്ങൾ അവതരിപ്പിച്ചിരിക്കുന്നത്. ടെലഗ്രാം, ഡിസ്‌കോർഡ് തുടങ്ങിയ വിപണിയിലെ എതിരാളികളെ വെല്ലുവിളിച്ചുകൊണ്ടാണ് പുതിയ നീക്കം. പുതിയ അപ്‌ഡേറ്റിലെ പ്രധാന മാറ്റം ഗ്രൂപ്പ് ചാറ്റുകൾക്ക് മുകളിൽ പ്രത്യക്ഷപ്പെടുന്ന ‘ഓൺലൈൻ’ ഇൻഡിക്കേറ്ററാണ്. ഗ്രൂപ്പിൽ എത്രപേർ ഓൺലൈനിലുണ്ടെന്ന് കാണിക്കുന്നതാണിത്. ചില നോട്ടിഫിക്കേഷനുകൾ ഹൈലൈറ്റ് ചെയ്യാനുള്ള സൗകര്യമാണ് മറ്റൊന്ന്. ഇതിനായി ‘നോട്ടിഫൈ ഫോർ’ എന്നൊരു സെറ്റിങ്‌സ് ഓപ്ഷൻ കൂടി കമ്പനി അവതരിപ്പിച്ചിട്ടുണ്ട്.

ഇതിൽ ഹൈലൈറ്റ്‌സ് തിരഞ്ഞെടുത്താൽ പ്രത്യേകം നോട്ടിഫിക്കേഷനുകൾക്ക് പ്രാധാന്യം നൽകി കാണിക്കാൻ സാധിക്കും. ഉദാഹരണത്തിന് നിങ്ങളെ മെൻഷൻ ചെയ്യുന്ന നോട്ടിഫിക്കേഷനുകൾ, നിങ്ങളുടെ സന്ദേശങ്ങൾക്ക് റിപ്ലൈ ചെയ്യുമ്പോൾ, സേവ്ഡ് കോൺടാക്റ്റിൽ നിന്നുള്ള മെസേജുകൾ തുടങ്ങി വിവിധ വിഭാഗങ്ങളായി നോട്ടിഫിക്കേഷനുകളെ വേർതിരിച്ച് പ്രാധാന്യം നൽകാം. അല്ലെങ്കിൽ എല്ലാ നോട്ടിഫിക്കേഷനുകളും അനുവദിക്കാം. ഐഫോണിൽ ഡോക്യുമെന്റുകൾ സ്‌കാൻ ചെയ്യാനും അയക്കാനും കഴിയുന്ന ഓപ്ഷനാണ് മറ്റൊന്ന്. ചാറ്റ് വിൻഡോയിലെ അറ്റാച്ച്‌മെന്റ് ഓപ്ഷനിൽ ഇതിനായുള്ള ഓപ്ഷൻ ലഭ്യമാവും.