യാത്രക്കാർക്ക് പൊതുശുചിമുറികൾ കണ്ടെത്താൻ 'ക്ലൂ' ആപ്പ്

 തിരുവനന്തപുരം: യാത്രക്കാർ നേരിടുന്ന പ്രധാന പ്രശ്‌നങ്ങളിലൊന്നായ വൃത്തിയുള്ള പൊതുശുചിമുറികളുടെ അഭാവത്തിന് പരിഹാരവുമായി തദ്ദേശ സ്വയംഭരണ വകുപ്പിന്റെ മാലിന്യമുക്ത നവകേരളം പദ്ധതിയുടെ ഭാഗമായി ശുചിത്വ മിഷൻ വികസിപ്പിച്ച 'ക്ലൂ' മൊബൈൽ ആപ്പ്. മാസ്‌കറ്റ് ഹോട്ടലിൽ മന്ത്രി എം ബി രാജേഷ് ആപ്പ് പ്രകാശനം ചെയ്തു. ഉപയോക്താവിന്റെ നിലവിലെ ലൊക്കേഷനെ അടിസ്ഥാനമാക്കി സമീപത്തെ ശുചിമുറികൾ ഗൂഗിൾ മാപ്പിന്റെ സഹായത്തോടെ കണ്ടെത്താനാകുന്നതാണ് ആപ്പിന്റെ പ്രധാന സവിശേഷത. തദ്ദേശ സ്വയംഭരണ സ്ഥാപനങ്ങളുടെ കീഴിലുള്ള പൊതുശുചിമുറികൾക്കൊപ്പം കേരള ഹോട്ടൽ ആൻഡ് റസ്റ്റാറന്റ് അസോസിയേഷനുമായി സഹകരിച്ച് ഉയർന്ന നിലവാരം പുലർത്തുന്ന സ്വകാര്യ ഹോട്ടലുകളിലെയും റസ്റ്റാറന്റുകളിലെയും ശുചിമുറികളും ശൃംഖലയിൽ ഉൾപ്പെടുത്തിയിട്ടുണ്ട്.