ബാക്ക് ഡിസ്‌പ്ലേയുമായി ഇൻഫിനിക്‌സ് നോട്ട് 60 പ്രോ ഇന്ത്യൻ വിപണിയിൽ അവതരിപ്പിച്ചു

 ഇൻഫിനിക്‌സ് നോട്ട് 60 സീരീസിലെ കരുത്തനായ നോട്ട് 60 പ്രോ ഇന്ത്യൻ വിപണിയിൽ ഔദ്യോഗികമായി അവതരിപ്പിച്ചു. അത്യാധുനിക സവിശേഷതകളോടെ എത്തുന്ന ഈ സ്മാർട്ട്ഫോൺ ഏപ്രിൽ 20 മുതൽ ഫ്ലിപ്കാർട്ട് വഴിയും ഇൻഫിനിക്‌സ് ഔദ്യോഗിക സ്റ്റോർ വഴിയും സ്വന്തമാക്കാം. ഡീപ് ഓഷ്യൻ ബ്ലൂ, മോച്ച ബ്രൗൺ, സോളാർ ഓറഞ്ച് എന്നീ ആകർഷകമായ മൂന്ന് നിറങ്ങളിലാണ് ഫോൺ പുറത്തിറക്കിയിരിക്കുന്നത്. 8 ജിബി റാമും 128 ജിബി/256 ജിബി സ്റ്റോറേജ് ഓപ്ഷനുകളുമുള്ള ഈ ഹാൻഡ്‌സെറ്റിന് ബാങ്ക് ഓഫറുകൾ ഉൾപ്പെടെ ആകർഷകമായ വിലക്കിഴിവുകളും കമ്പനി വാഗ്ദാനം ചെയ്യുന്നു.

പുതിയ ഇൻഫിനിക്‌സ് ഫോണിന്റെ ഏറ്റവും വലിയ ആകർഷണം റിയർ പാനലിലെ ആക്റ്റീവ് മാട്രിക്‌സ് ഡിസ്‌പ്ലേയാണ്. നിരവധി എൽഇഡി ലൈറ്റുകൾ ഉപയോഗിച്ച് നോട്ടിഫിക്കേഷനുകളും മറ്റ് അപ്‌ഡേറ്റുകളും പ്രദർശിപ്പിക്കാൻ കഴിയുന്ന ഈ ഫീച്ചർ ഉപയോക്താക്കൾക്ക് വ്യത്യസ്തമായ അനുഭവം നൽകുന്നു. ഇതിനുപുറമെ, 144Hz റിഫ്രഷ് റേറ്റും 4500 നിറ്റ്‌സ് ബ്രൈറ്റ്‌നസുമുള്ള 6.78 ഇഞ്ച് 1.5K LTPS അമോലെഡ് ഡിസ്‌പ്ലേയാണ് ഫോണിലുള്ളത്. കോർണറിംഗ് ഗോറില്ല ഗ്ലാസ് 7i സുരക്ഷയും സ്ക്രീനിന് നൽകിയിട്ടുണ്ട്.

സ്‌നാപ്ഡ്രാഗൺ 7 സീരീസ് ചിപ്‌സെറ്റിന്റെ കരുത്തിൽ പ്രവർത്തിക്കുന്ന ഫോണിൽ ആൻഡ്രോയിഡ് 16 അടിസ്ഥാനമാക്കിയുള്ള XOS 16 ഓപ്പറേറ്റിംഗ് സിസ്റ്റമാണുള്ളത്. ഫോട്ടോഗ്രഫിക്കായി ഒപ്റ്റിക്കൽ ഇമേജ് സ്റ്റെബിലൈസേഷൻ പിന്തുണയുള്ള 50 എംപി പ്രൈമറി ക്യാമറയും 8 എംപി അൾട്രാവൈഡ് ലെൻസും പിന്നിൽ നൽകിയിരിക്കുന്നു. സെൽഫികൾക്കായി 13 എംപി ക്യാമറയും 4K വീഡിയോ റെക്കോർഡിംഗ് സൗകര്യവും ഫോണിലുണ്ട്. ഏകദേശം 200 ഗ്രാം ഭാരമുള്ള ഫോണിന് 7.45 എംഎം മാത്രമാണ് കനം.

ബാറ്ററി ലൈഫിന്റെ കാര്യത്തിലും വിട്ടുവീഴ്ചയില്ലാത്ത ഈ മോഡലിൽ 6,500 mAh ബാറ്ററിയാണ് ഉൾപ്പെടുത്തിയിരിക്കുന്നത്. 90 വാട്ട് വയർഡ് ഫാസ്റ്റ് ചാർജിംഗും 30 വാട്ട് വയർലെസ് ചാർജിംഗും ഫോൺ പിന്തുണയ്ക്കുന്നു. ഇൻ-ഡിസ്‌പ്ലേ ഫിംഗർപ്രിന്റ് സെൻസർ, ഐആർ ബ്ലാസ്റ്റർ എന്നിവയ്ക്കൊപ്പം ഹൃദയമിടിപ്പ് അളക്കാൻ സൈഡ്-മൗണ്ടഡ് ഹൃദയമിടിപ്പ് സെൻസറും ഇതിലുണ്ട്. 31,999 രൂപ മുതൽ വില ആരംഭിക്കുന്ന ഇൻഫിനിക്‌സ് നോട്ട് 60 പ്രോ, പ്രീമിയം ഫീച്ചറുകൾ ആഗ്രഹിക്കുന്നവർക്ക് ഒരു മികച്ച തിരഞ്ഞെടുപ്പായിരിക്കും.