യുഎഇയിലെ സ്കൂളുകളിൽ ഇനിമുതൽ എഐ പഠനവും

യുഎഇയിലെ എല്ലാ സർക്കാർ സ്‌കൂളുകളിലും ആർട്ടിഫിഷ്യൽ ഇന്റലിജൻസ് പാഠ്യവിഷയമായി ഉൾപ്പെടുത്തുമെന്ന് യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം പ്രഖ്യാപിച്ചു. അടുത്ത അധ്യയന വർഷം മുതൽ കിൻറഗാർട്ടൻ മുതൽ 12-ാം ക്ലാസ് വരെയുള്ള എല്ലാ ക്ലാസുകളിലും  ആർട്ടിഫിഷ്യൽ ഇൻറലിജൻസ് ഉൾപെടുത്താൻ ആണ് പുതിയ തീരുമാനം. ദുബായ് ഭരണാധികാരി തന്റെ എക്സ് പോസ്റ്റിലൂടെയാണ് ഇത് സംബന്ധിച്ച വിവരം പുറത്തുവിട്ടത്.

‘അതിവേഗം വികസിക്കുന്ന ലോകത്തിനൊപ്പം സഞ്ചരിക്കാൻ ഭാവി തലമുറയെ സജ്ജമാക്കുക എന്ന ലക്ഷ്യത്തോടെ അടുത്ത അധ്യയന വർഷം മുതൽ ആർട്ടിഫിഷ്യൽ ഇന്റലിജൻസ് ഒരു പാഠ്യ വിഷയമായി ഉൾപെടുത്താൻ തീരുമാനിച്ചിരിക്കുന്നു. അടുത്ത അധ്യയനവർഷത്തിൽ കിൻറർഗാർട്ടൻ മുതൽ 12-ാം ക്ലാസ് വരെ ഇത് നിർബന്ധമാക്കും.ലോകത്തിന്റെ ജീവിതരീതിയെ തന്നെ മാറ്റിമറിച്ച ആർട്ടിഫിഷ്യൽ ഇന്റലിജൻസ് പാഠ്യപദ്ധതിയിൽ ഉൾപെടുത്താനായി വിദ്യാഭ്യാസ വകുപ്പ് നടത്തിയ ശ്രമങ്ങളെ ഭരണകൂടം അഭിനന്ദിക്കുന്നു. 

അതോടൊപ്പം ഈ പുതിയ സാങ്കേതികവിദ്യയുടെ ധാർമ്മിക വശങ്ങളെകുറിച്ചുള്ള അവബോധം വളർത്തുക, ഡാറ്റ, അൽഗോരിതം, ആപ്ലിക്കേഷനുകൾ, അപകടസാധ്യതകൾ, സമൂഹവുമായും ജീവിതവുമായും ഉള്ള ബന്ധം എന്നിവയെക്കുറിച്ചുള്ള അറിവ്​ വർധിപ്പിക്കുക എന്നിവയും പദ്ധതിയുടെ ലക്ഷ്യമാണ്’ അദ്ദേഹം എക്‌സിൽ കുറിച്ചു.