വേതനം നല്‍കിയില്ല; യുവന്റസിനെതിരെ നിയമ നടപടിക്കൊരുങ്ങി റൊണാള്‍ഡോ

സൂപ്പര്‍ താരം ക്രിസ്റ്റ്യാനോ റൊണാള്‍ഡോ മുന്‍ ക്ലബ്ബായ യുവന്റസിനെതിരെ നിയമ നടപടിക്കൊരുങ്ങുന്നുവെന്ന് റിപ്പോര്‍ട്ട്. റൊണാള്‍ഡോയുമായി ക്ലബുണ്ടാക്കിയ ധാരണ പ്രകാരമുള്ള വേതന തുക ലഭിക്കാത്തതിനെ തുടര്‍ന്നാണ് താരം നിയമനടപടിക്കൊരുങ്ങുന്നതെന്നാണ് റിപ്പോര്‍ട്ട്. 202021 സീസണില്‍ കൊവിഡിന്റെ സാഹചര്യത്തില്‍ താരത്തിന്റെ വേതനം ക്ലബ് വെട്ടിക്കുറച്ചിരുന്നു. കൊവിഡിന്റെ പശ്ചാത്തലത്തില്‍ 19.9 ദശലക്ഷം യൂറോ യുവന്റസ് റൊണാള്‍ഡോയ്ക്ക് നല്‍കാനുണ്ടെന്നാണ് സൂചന.

റയല്‍ മാഡ്രിഡ് വിട്ടതിന് ശേഷം 2018ലാണ് ക്രിസ്റ്റ്യാനോ റൊണാള്‍ഡോ ഇറ്റാലിയന്‍ ക്ലബ്ബായ യുവന്റസിലെത്തുന്നത്. യുവന്റസ് കുപ്പായമണിഞ്ഞ മൂന്ന് വര്‍ഷങ്ങള്‍ റോണോയ്ക്ക് മികച്ച സമയമായിരുന്നില്ല. 134 മത്സരങ്ങളില്‍ നിന്ന് 101 ഗോളുകളാണ് യുവന്റസിന് വേണ്ടി താരം അടിച്ചുകൂട്ടിയത്. രണ്ട് സീരി എ കിരീടങ്ങളും കോപ്പ ഇറ്റാലിയ ട്രോഫിയും റോണോ ഓള്‍ഡ് ലേഡിക്ക് വേണ്ടി നേടിക്കൊടുത്തു. പിന്നീട് 2021ലാണ് താരം മാഞ്ചസ്റ്റര്‍ യുണൈറ്റഡിലെത്തുന്നത്.