.jpg)
ജിദ്ദയില്‍ കാണാതായ മലയാളി നഴ്‌സ് പൊലീസ് കസ്റ്റഡിയിലെന്ന് റിപ്പോര്‍ട്ട്; ബാഗില്‍ നിരോധിത മരുന്ന് കണ്ടെത്തി
ലഗേജില്‍ സൗദി അറേബ്യയില്‍ നിരോധിച്ച മരുന്നുകള്‍ കണ്ടെത്തിയതിനെ തുടര്‍ന്നാണ് അധികൃതര്‍ തടഞ്ഞുവെച്ചതെന്നാണ് പ്രാഥമികമായി ലഭിക്കുന്ന വിവരം.
അവധിക്കുശേഷം ജോലി സ്ഥലത്തേക്ക് മടങ്ങുന്നതിനിടെ ജിദ്ദ വിമാനത്താവളത്തില്‍ വെച്ച് കാണാതായ മലയാളി നഴ്‌സ് ഫിലോമിന സൗദി പൊലീസിന്റെ കസ്റ്റഡിയിലാണെന്ന് റിപ്പോര്‍ട്ട്. വയനാട് സുല്‍ത്താന്‍ ബത്തേരി സ്വദേശിനി ഫിലോമിനയെയാണ് കാണാതായത്. ഇവരുടെ ലഗേജില്‍ സൗദി അറേബ്യയില്‍ നിരോധിച്ച മരുന്നുകള്‍ കണ്ടെത്തിയതിനെ തുടര്‍ന്നാണ് അധികൃതര്‍ തടഞ്ഞുവെച്ചതെന്നാണ് പ്രാഥമികമായി ലഭിക്കുന്ന വിവരം. എന്നാല്‍ ഇക്കാര്യത്തില്‍ ഔദ്യോഗിക സ്ഥിരീകരണം ഇതുവരെ ലഭ്യമായിട്ടില്ല.
കഴിഞ്ഞ മൂന്നുവര്‍ഷമായി റിയാദിലെ കിങ് ഫഹദ് ആശുപത്രിയില്‍ നഴ്‌സായി ജോലി ചെയ്തുവരികയായിരുന്നു ഫിലോമിന. വാര്‍ഷികാവധി കഴിഞ്ഞ് ഒക്ടോബര്‍ 10-ന് ബെംഗളൂരുവില്‍ നിന്നാണ് ഇവര്‍ സൗദിയിലേക്ക് വിമാനം കയറിയത്. ജിദ്ദയില്‍ വിമാനമിറങ്ങിയ ശേഷം കണക്ഷന്‍ ഫ്ലൈറ്റ് മാര്‍ഗ്ഗം റിയാദിലേക്ക് പോകാനായിരുന്നു പദ്ധതി. എന്നാല്‍ ജിദ്ദ എയര്‍പോര്‍ട്ടിലെത്തിയ ശേഷം ഫിലോമിനയെ ഫോണിലോ മറ്റ് മാര്‍ഗ്ഗങ്ങളിലോ ബന്ധപ്പെടാന്‍ സാധിക്കാതെ വന്നതോടെ കുടുംബം വലിയ ആശങ്കയിലായിരുന്നു. തുടര്‍ന്ന് നടത്തിയ അന്വേഷണങ്ങളിലാണ് സൗദി പൊലീസിന്റെ നടപടിയെക്കുറിച്ചുള്ള സൂചനകള്‍ പുറത്തുവന്നത്.
സൗദി അറേബ്യയിലേക്ക് യാത്ര ചെയ്യുമ്പോള്‍ കയ്യില്‍ മരുന്നുകള്‍ കരുതുന്നവര്‍ക്ക് കര്‍ശന നിയമങ്ങളാണ് രാജ്യത്തുള്ളത്.
അനുമതി പത്രമില്ലാതെ കൊണ്ടുപോകുന്ന മരുന്നുകള്‍ ലഗേജില്‍ കണ്ടെത്തിയാല്‍ കടുത്ത നിയമനടപടികള്‍ നേരിടേണ്ടി വരും. കേസിന്റെ കൂടുതല്‍ വിവരങ്ങള്‍ക്കായി ഇന്ത്യന്‍ കോണ്‍സുലേറ്റ് തലത്തില്‍ അന്വേഷണം പുരോഗമിക്കുകയാണ്.
