.jpg)
ഇറാൻ ആക്രമണം; കുവൈത്തില് കൊല്ലപ്പെട്ടത് തമിഴ്നാട് സ്വദേശിയെന്ന് സ്ഥിരീകരണം
ഇന്ന് പുലർച്ചെയാണ് കുവൈറ്റിലെ ജല ശുദ്ധീകരണ പ്ലാന്റിന് നേരെ ആക്രമണം ഉണ്ടായത്. ആക്രമണത്തില് കെട്ടിടങ്ങള്ക്കും മറ്റും കേടുപാടുകള് സംഭവിച്ചിട്ടുണ്ടെന്ന് ജല വൈദ്യുത മന്ത്രാലയം അറിയിച്ചു
കു വൈറ്റ് സിറ്റി: ഇറാൻ ആക്രമണത്തില് കുവൈത്തില് കൊല്ലപ്പെട്ടത് തമിഴ്നാട് സ്വദേശിയെന്ന് സ്ഥിരീകരണം. രാമനാഥപുരം ജില്ലയിലെ കൊളത്തൂർ സ്വദേശിയായ സന്താന ശെല്വം (40) ആണ് മരിച്ചത്.സ്വകാര്യ കമ്പനിയിലെ കരാർ ജീവനക്കാരനായിരുന്നു ഇദ്ദേഹം.
ഇന്ന് പുലർച്ചെയാണ് കുവൈറ്റിലെ ജല ശുദ്ധീകരണ പ്ലാന്റിന് നേരെ ആക്രമണം ഉണ്ടായത്. ആക്രമണത്തില് കെട്ടിടങ്ങള്ക്കും മറ്റും കേടുപാടുകള് സംഭവിച്ചിട്ടുണ്ടെന്ന് ജല വൈദ്യുത മന്ത്രാലയം അറിയിച്ചു.
സംഭവത്തില് എംബസി അഗാധമായ ദുഃഖം രേഖപ്പെടുത്തി. മരിച്ച ഇന്ത്യൻ പൗരന്റെ കുടുംബത്തോടുള്ള അനുശോചനവും എംബസി ഔദ്യോഗിക പ്രസ്താവനയിലൂടെ അറിയിച്ചു.
സംഭവത്തെത്തുടർന്ന് ആവശ്യമായ എല്ലാ സഹായങ്ങളും ഉറപ്പാക്കുന്നതിനായി കുവൈറ്റ് അധികാരികളുമായി ബന്ധപ്പെട്ട് പ്രവർത്തിച്ചുകൊണ്ടിരിക്കുകയാണെന്നും എംബസി വ്യക്തമാക്കി. മൃതദേഹം നാട്ടില് എത്തിക്കുന്നതിന് വേണ്ട നടപടികള് വേഗത്തില് പൂർത്തിയാക്കാനുള്ള ഇടപെടല് തുടരുകയാണെന്നും എംബസി അറിയിച്ചു.
