ഗൾഫ് രാജ്യങ്ങളിൽ ജാഗ്രതാ നിർദ്ദേശം ; ഓഗസ്റ്റ് 6 വരെ മഴയ്ക്ക് സാധ്യത

യു.എ.ഇ, സൗദി അറേബ്യ, ഒമാൻ തുടങ്ങിയ ഗൾഫ് രാജ്യങ്ങളിൽ അസ്ഥിര കാലാവസ്ഥ തുടരുമെന്ന് കാലാവസ്ഥാ നിരീക്ഷണ കേന്ദ്രങ്ങൾ മുന്നറിയിപ്പ് നൽകി. കിഴക്കൻ ന്യൂനമർദ്ദത്തിന്റെ സ്വാധീനം കാരണം ഓഗസ്റ്റ് 2 മുതൽ 6 വരെ യു.എ.ഇയുടെ വിവിധ ഭാഗങ്ങളിൽ മഴയ്ക്ക് സാധ്യതയുണ്ട്. കടുത്ത വേനൽച്ചൂടിനിടയിൽ അനുഭവപ്പെടുന്ന ഈ അപൂർവ്വ മഴയ്ക്ക് കാരണം ശക്തമായ ‘എൽ നിനോ’ പ്രതിഭാസമാണെന്ന് വിദഗ്ദ്ധർ വ്യക്തമാക്കുന്നു.

സൗദി അറേബ്യയിലെ അസീർ, ജാസാൻ, അൽ ബഹ, മക്കയിലെ മലയോര മേഖലകൾ, നജ്റാൻ എന്നിവിടങ്ങളിൽ വാരാന്ത്യം വരെ ഇടിമിന്നലോടുകൂടിയ മഴ ലഭിച്ചേക്കും. ഔദ്യോഗിക ആപ്പുകൾ വഴി പുറപ്പെടുവിക്കുന്ന സുരക്ഷാ നിർദ്ദേശങ്ങൾ കർശനമായി പാലിക്കണമെന്ന് ജനങ്ങളോട് അധികൃതർ അഭ്യർത്ഥിച്ചു.

ഒമാനിലെ ഹജർ പർവ്വതനിരകളിൽ കനത്ത ഇടിമിന്നലോടു കൂടിയ മഴ തുടരുമെന്നും വടക്കൻ-തെക്കൻ അൽ ശർഖിയ, അൽ ദാഹിറ എന്നീ ഗവർണറേറ്റുകളിലേക്ക് മഴ വ്യാപിക്കാൻ സാധ്യതയുണ്ടെന്നും ഒമാൻ കാലാവസ്ഥാ കേന്ദ്രം മുന്നറിയിപ്പ് നൽകി. ശക്തമായ കാറ്റിനും മഴയ്ക്കും സാധ്യതയുള്ളതിനാൽ പ്രദേശവാസികൾ ജാഗ്രത പാലിക്കണമെന്നും നിർദ്ദേശമുണ്ട്.