റിയാദില്‍ നിന്ന് കൊച്ചിയിലേക്ക് നേരിട്ട് വിമാന സര്‍വീസുമായി ഫ്‌ലൈനാസ്

സൗദി പ്രവാസികള്‍ക്ക് ആശ്വാസമായി റിയാദില്‍ നിന്ന് കൊച്ചിയിലേക്ക് നേരിട്ട് വിമാന സര്‍വീസ് പ്രഖ്യാപിച്ച് സൗദി ബജറ്റ് വിമാനക്കമ്പനിയായ ഫ്‌ലൈനാസ്. സെപ്റ്റംബര്‍ രണ്ട് മുതലാണ് കിങ് ഖാലിദ് അന്താരാഷ്ട്ര വിമാനത്താവളത്തില്‍ നിന്ന് കൊച്ചിയിലേക്ക് നോണ്‍-സ്റ്റോപ്പ് സര്‍വീസുകള്‍ ആരംഭിക്കുന്നത്. കൂടാതെ തിരുവനന്തപുരം, കോഴിക്കോട് സെക്ടറുകളിലേക്കും പുതിയ സര്‍വീസുകള്‍ പ്രഖ്യാപിച്ചിട്ടുണ്ട്.

ആഴ്ചയില്‍ മൂന്ന് ദിവസങ്ങളിലാണ് ഫ്‌ലൈനാസിന്റെ റിയാദ്-കൊച്ചി സര്‍വീസുകള്‍ ക്രമീകരിച്ചിരിക്കുന്നത്. ഞായര്‍, ബുധന്‍, വെള്ളി ദിവസങ്ങളില്‍ റിയാദില്‍ നിന്ന് അര്‍ദ്ധരാത്രി 12:05-ന് പുറപ്പെടുന്ന വിമാനം രാവിലെ 8:00-മണിക്ക് കൊച്ചിയിലെത്തും. മടക്കയാത്ര കൊച്ചിയില്‍ നിന്ന് രാവിലെ 08:50-ന് ആരംഭിച്ച് സൗദി സമയം 11:35-ന് റിയാദിലെത്തും. അഞ്ചര മണിക്കൂറോളമാണ് യാത്രാസമയം.