മക്ക സംയുക്ത പ്രതിരോധ കരാറിന്റെ ഏകോപനത്തിനായി സൗദി അറേബ്യയില്‍ സ്ഥിരം സെക്രട്ടേറിയറ്റ് സ്ഥാപിക്കാന്‍ തീരുമാനം

സൗദി അറേബ്യ, തുര്‍ക്കി, പാകിസ്താന്‍ എന്നീ രാജ്യങ്ങള്‍ ഒപ്പുവെച്ച ചരിത്രപ്രസിദ്ധമായ മക്ക സംയുക്ത പ്രതിരോധ കരാറിന്റെ ഏകോപനത്തിനായി സൗദി അറേബ്യയില്‍ സ്ഥിരം സെക്രട്ടേറിയറ്റ് സ്ഥാപിക്കാന്‍ തീരുമാനം. ഇസ്താംബൂളില്‍ ചേര്‍ന്ന ആദ്യ തന്ത്രപ്രധാന രാഷ്ട്രീയ-പ്രതിരോധ സമിതി യോഗത്തിലാണ് ഈ സുപ്രധാന ധാരണയായത്. സെക്രട്ടേറിയറ്റിന്റെ ആദ്യ സെക്രട്ടറി ജനറലിനെ പാകിസ്താന്‍ നാമനിര്‍ദ്ദേശം ചെയ്യുമെന്നും മൂന്ന് വര്‍ഷമായിരിക്കും ഈ പദവിയുടെ കാലാവധിയെന്നും യോഗത്തിന് ശേഷം പുറത്തിറക്കിയ പ്രസ്താവനയില്‍ വ്യക്തമാക്കി.

മൂന്ന് സുഹൃദ് രാജ്യങ്ങള്‍ക്കുമിടയിലുള്ള പ്രതിരോധ സഹകരണം ശക്തമാക്കുക, കൂട്ടായ പ്രതിരോധ ശേഷി വര്‍ദ്ധിപ്പിക്കുക, സൈനിക-സാങ്കേതിക രംഗങ്ങളിലെ ഏകോപനം ഉറപ്പാക്കുക എന്നിവയാണ് ഈ പുതിയ സംവിധാനത്തിലൂടെ ലക്ഷ്യമിടുന്നത്. ഉച്ചകോടി തീരുമാനങ്ങള്‍ സമയബന്ധിതമായി നടപ്പിലാക്കാനും പ്രവര്‍ത്തനങ്ങള്‍ കാര്യക്ഷമമായി ഏകോപിപ്പിക്കാനും ഈ സെക്രട്ടേറിയറ്റ് സഹായിക്കും.