തമിഴ്നാട്ടിൽ ബസും കാറും കൂട്ടിയിടിച്ച് മലയാളികളായ നാല് വിനോദസഞ്ചാരികൾ മരിച്ചു

ചെന്നൈ: തമിഴ്‌നാട്ടിൽ വാഹനാപകടത്തിൽ നാല് മലയാളികൾക്ക് ദാരുണാന്ത്യം. ബസും കാറും കൂട്ടിയിടിച്ചാണ് അപകടം. തിരുവാരൂർ - തിരുതുരൈപ്പുണ്ടിക്ക് സമീപം കരുവാപ്പഞ്ചേരി കടക്കുന്നതിനിടെയാണ് സംഭവം. വിനോദസഞ്ചാരികളാണ് മരിച്ചത്.കാർ യാത്രക്കാരായ തിരുവനന്തപുരം സ്വദേശികളായ സജിനാഥ്, രാജേഷ്, സുജിത്ത്, രാഹുൽ എന്നിവർ സംഭവസ്ഥലത്തുവെച്ചു തന്നെ മരിച്ചു.

മറ്റ് മൂന്ന് യാത്രക്കാരായ കാഞ്ചിറങ്കുളം സ്വദേശി റജീനസ്, തിരുവനന്തപുരം നെല്ലിമേട് സ്വദേശികളായ സാബി, സുനിൽ എന്നിവരെ സാരമായ പരിക്കുകളോടെ തിരുത്തുറൈപൂണ്ടി സർക്കാർ ആശുപത്രിയിൽ പ്രവേശിപ്പിച്ചു.

കേരളത്തിൽ നിന്നുള്ള സംഘം സഞ്ചരിച്ച വാഹനം ഒരു സർക്കാർ ബസുമായി കൂട്ടിയിടിക്കുകയായിരുന്നു. വേളാങ്കണ്ണി സന്ദർശിക്കാൻ എത്തിയ വിനോദസഞ്ചാരികളുടെ വാഹനമാണ് നിയന്ത്രണം വിട്ട് നാഗപട്ടണത്ത് നിന്ന് രാമനാഥപുരത്തേക്ക് പോകുകയായിരുന്ന സർക്കാർ ബസിൽ ഇടിച്ചത്.