കാലവർഷത്തിന് മുൻപുള്ള ഭക്ഷ്യസുരക്ഷാ മുൻകരുതലുകൾ: ഭക്ഷ്യ വ്യാപാരികൾ ജാഗ്രത പാലിക്കണം

പാലക്കാട് : ജില്ലയിൽ കാലവർഷം ആരംഭിക്കുന്നതിന് മുൻപായി  ഭക്ഷ്യ വ്യാപാരികൾ ആവശ്യമായ മുൻകരുതലുകൾ സ്വീകരിക്കണമെന്ന് ഭക്ഷ്യസുരക്ഷാ വകുപ്പ് അറിയിച്ചു. ഉയർന്ന ഈർപ്പം, മഴവെള്ളം, വെള്ളക്കെട്ട്, കീടശല്യം എന്നിവ മൂലം ഭക്ഷ്യവസ്തുക്കൾ മലിനമാകാനും ഭക്ഷ്യജന്യ രോഗങ്ങൾ വർധിക്കാനും സാധ്യതയുണ്ട്.

ഹോട്ടലുകൾ, റസ്റ്റോറന്റുകൾ, ബേക്കറികൾ, കൂൾ ബാറുകൾ, കാറ്ററിംഗ് യൂണിറ്റുകൾ, ഭക്ഷ്യ നിർമ്മാണ സ്ഥാപനങ്ങൾ, സൂപ്പർമാർക്കറ്റുകൾ, പച്ചക്കറി-പഴ വിൽപ്പന കേന്ദ്രങ്ങൾ, മത്സ്യ-ഇറച്ചി വിൽപ്പന കേന്ദ്രങ്ങൾ എന്നിവ ഉൾപ്പെടെയുള്ള എല്ലാ ഭക്ഷ്യ വ്യാപാര സ്ഥാപനങ്ങളും ചട്ടങ്ങൾക്ക് അനുസൃതമായി പ്രവർത്തിക്കണം.

കാലവർഷത്തിന് മുൻപായി സ്ഥാപനപരിസരം ശുചീകരിക്കുക, മേൽക്കൂരയിലെ ചോർച്ചകൾ പരിഹരിക്കുക, വെള്ളക്കെട്ട് ഒഴിവാക്കുക, മലിനജലം ഭക്ഷ്യസംഭരണ പ്രദേശങ്ങളിലേക്ക് പ്രവേശിക്കാതിരിക്കാൻ ഡ്രെയിനേജ് സംവിധാനം കാര്യക്ഷമമാക്കുക, എലി-ഈച്ച-കൊതുക് നിയന്ത്രണ നടപടികൾ സ്വീകരിക്കണം.

ഭക്ഷ്യവസ്തുക്കൾ നിലത്ത് നേരിട്ട് വയ്ക്കാതെ പ്ലേറ്റുകളിലോ ഷെൽഫുകളിലോ സൂക്ഷിക്കണം. പാചകത്തിനും കുടിവെള്ളത്തിനും ഐസ് നിർമ്മാണത്തിനും  സുരക്ഷിത ജലം മാത്രം ഉപയോഗിക്കണം. കാലഹരണപ്പെട്ടതോ കേടായതോ ഗുണനിലവാരത്തിൽ സംശയമുള്ളതോ ആയ ഉൽപ്പന്നങ്ങൾ നീക്കം ചെയ്യണം.  

ഭക്ഷണം കൈകാര്യം ചെയ്യുന്ന ജീവനക്കാർ വ്യക്തിശുചിത്വം കർശനമായി പാലിക്കണം. കൈകൾ ഇടയ്ക്കിടെ കഴുകുക, ശുചിയായ യൂണിഫോം ധരിക്കുക, ആവശ്യാനുസരണം തലക്കവചവും കൈയ്യുറകളും ഉപയോഗിക്കുക, രോഗലക്ഷണങ്ങളുള്ള ജീവനക്കാരെ ഭക്ഷ്യ കൈകാര്യം ചെയ്യുന്നതിൽ നിന്ന് ഒഴിവാക്കുക എന്നിവ നിർബന്ധമാണ്.

എല്ലാ സ്ഥാപനങ്ങൾക്കും സാധുവായ FSSAI രജിസ്‌ട്രേഷൻ അല്ലെങ്കിൽ ലൈസൻസ് ഉണ്ടായിരിക്കണം. ലൈസൻസ്, ശുചീകരണ രേഖകൾ, കീടനിയന്ത്രണ രേഖകൾ എന്നിവ പുതുക്കി സൂക്ഷിക്കണം. പരിശോധനകളിൽ കണ്ടെത്തുന്ന നിയമലംഘനങ്ങൾക്കെതിരെ ഭക്ഷ്യസുരക്ഷാ നിയമപ്രകാരം നടപടികൾ സ്വീകരിക്കും.

ഭക്ഷ്യ വ്യാപാരികൾക്കുള്ള പ്രധാന നിർദേശങ്ങൾ

* സ്ഥാപനപരിസരത്ത് വെള്ളക്കെട്ടും മലിനജല സമ്പർക്കവും ഒഴിവാക്കുക.

* മേൽക്കൂര ചോർച്ചയും ഡ്രെയിനേജ് തകരാറുകളും ഉടൻ പരിഹരിക്കുക.

* എലി, ഈച്ച, കൊതുക് എന്നിവയ്‌ക്കെതിരെ ഫലപ്രദമായ കീടനിയന്ത്രണം നടത്തുക.

* സുരക്ഷിത കുടിവെള്ളവും ശുദ്ധജലത്തിൽ നിർമ്മിച്ച ഐസും മാത്രം ഉപയോഗിക്കുക.

* ഭക്ഷ്യവസ്തുക്കൾ ഈർപ്പം കയറാത്തവിധം സൂക്ഷിക്കുക.

* കാലഹരണപ്പെട്ട ഉൽപ്പന്നങ്ങൾ നീക്കം ചെയ്യുക.

* ജീവനക്കാർക്ക് ശുചിത്വ പരിശീലനം നൽകുക.

* FSSAI ലൈസൻസ്/രജിസ്‌ട്രേഷൻ സാധുവാണെന്ന് ഉറപ്പാക്കുക.

മുൻകരുതലുകൾ സ്വീകരിക്കുന്നതിലൂടെ ഭക്ഷ്യജന്യ രോഗങ്ങൾ ഫലപ്രദമായി തടയാനാകും. സുരക്ഷിതവും ശുചിത്വപരവുമായ ഭക്ഷണം ഉപഭോക്താക്കൾക്ക് നൽകുന്നത് ഓരോ ഭക്ഷ്യ വ്യാപാരിയുടെയും നിയമപരവും സാമൂഹികവുമായ ഉത്തരവാദിത്തമാണ്.