.jpg)
കൊല്ലങ്കോട്ടെ വിദ്യാര്‍ഥിനിയുടെ മരണം: കാമുകനെതിരെ പരാതി
പാലക്കാട്: വിദ്യാര്‍ഥിനി തൂങ്ങി മരിച്ച സംഭവത്തില്‍ കാമുകനെതിരെ പരാതിയുമായി കുടുംബം. കൊല്ലങ്കോട് പയ്യല്ലൂര്‍ സ്വദേശിനിയാണ് കഴിഞ്ഞ ദിവസം വീട്ടില്‍ തൂങ്ങി മരിച്ചത്. വിദ്യാര്‍ഥിനിയെ കാമുകന്‍ കബളിപ്പിച്ചതായാണ് പരാതി. സൈന്യത്തില്‍ ജോലി കിട്ടിയശേഷം കാമുകന്‍ പെണ്‍കുട്ടിയുമായുള്ള ബന്ധം ഉപേക്ഷിച്ചതായാണ് ആരോപണം.
ഇതിന്റെ മനോവേദനയിലാണ് ജീവനൊടുക്കിയതെന്ന് വിദ്യാര്‍ഥിനിയുടെ കുടുംബം ആരോപിച്ചു. കാമുകന്‍ കബളിപ്പിച്ചത് സംബന്ധിച്ച് പോലീസില്‍ പരാതി നല്‍കിയിരുന്നതായും കുടുംബാംഗങ്ങള്‍ പറഞ്ഞു. വിവാഹ വാഗ്ദാനം നല്‍കി പെണ്‍കുട്ടിയെ വഞ്ചിച്ചുവെന്ന് ചൂണ്ടികാണിച്ച കുടുംബം പോലീസില്‍ പരാതി നല്‍കി. കൊല്ലങ്കോട് പോലീസ് അന്വേഷണം ആരംഭിച്ചു.
ശനിയാഴ്ചയാണ് പെണ്‍കുട്ടിയെ തൂങ്ങി മരിച്ച നിലയില്‍ കണ്ടെത്തിയത്. വീട്ടില്‍ ആരുമില്ലാത്ത സമയത്താണ് സംഭവം. ഇരുവരുടെയും വീടുകളില്‍ പ്രണയത്തെ കുറിച്ച് അറിയാമായിരുന്നതായാണ് പെണ്‍കുട്ടിയുടെ സഹോദരന്‍ പറയുന്നത്.
