സർക്കാർ ക്ഷേമപദ്ധതികൾക്ക് അപേക്ഷ സ്വീകരിക്കാൻ സ്വകാര്യ വ്യക്തികളെ ചുമതലപ്പെടുത്തിയിട്ടില്ല : മലപ്പുറം ജില്ലാ കളക്ടർ

മലപ്പുറം  : സർക്കാറിൻ്റെ വിവിധ ക്ഷേമപദ്ധതികൾക്കായി അപേക്ഷാ ഫോം വിതരണം ചെയ്യുന്നതിനും സ്വീകരിക്കുന്നതിനും സ്വകാര്യ വ്യക്തികൾ ആരെയും ചുമതലപ്പെടുത്തിയിട്ടില്ലെന്ന് ജില്ലാ തെരഞ്ഞെടുപ്പ് ഓഫീസറായ ജില്ലാ കളക്ടർ വി.ആർ വിനോദ് അറിയിച്ചു. 

തദ്ദേശ തെരഞ്ഞെടുപ്പ് പെരുമാറ്റ ചട്ടം നിലനിൽക്കുന്ന ഘട്ടത്തിൽ ക്ഷേമ പദ്ധതികളുടെ പേരിൽ ഗുണഭോക്താക്കളിൽ നിന്ന് സ്വകാര്യ വ്യക്തികളും സംഘടനകളും അപേക്ഷ സ്വീകരിക്കുന്നത് പെരുമാറ്റചട്ട ലംഘനമാണ്. ഇത്തരം പ്രവൃത്തികൾ ശ്രദ്ധയിൽപെട്ടാൽ കർശന നടപടി സ്വീകരിക്കുമെന്നും ജില്ലാ കളക്ടർ അറിയിച്ചു.