തദ്ദേശ തിരഞ്ഞെടുപ്പ് : പെരുമാറ്റചട്ടലംഘനത്തിനെതിരെ നടപടികൾ :കൊല്ലം ജില്ലാ കലക്ടർ

കൊല്ലം  : തദ്ദേശ തിരഞ്ഞെടുപ്പുമായിബന്ധപ്പെട്ട് ഉയരുന്ന പെരുമാറ്റചട്ടലംഘന പരാതികൾക്കെതിരെ നടപടികൾ സ്വീകരിച്ചുതുടങ്ങിയതായി ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കലക്ടർ എൻ. ദേവിദാസ്. ചേമ്പറിൽ ചേർന്ന പെരുമാറ്റചട്ടനിരീക്ഷണസമിതിയോഗത്തിൽ അധ്യക്ഷതവഹിക്കവെ സുതാര്യവും നീതിയുക്തവുമായ തിരഞ്ഞെടുപ്പ് ഉറപ്പാക്കുന്നതിന് ചട്ടവിരുദ്ധമായ പ്രവർത്തനങ്ങൾ കർശന നടപടികളിലൂടെ നേരിടുമെന്ന മുന്നറിയിപ്പും നൽകി. പരിഗണിച്ച ആറു പരാതികളിലും നടപടി സ്വീകരിച്ചു. അടിസ്ഥാനരഹിതമായവ തള്ളിക്കളഞ്ഞു.അർധസർക്കാർ ജീവനക്കാരൻ തിരഞ്ഞെടുപ്പിൽ മത്സരിക്കുന്നവെന്ന പരാതി നാമനിർദേശ പത്രിക സമർപിച്ചില്ലെന്ന്കണ്ട് തള്ളി. പേരയത്ത് ഫ്‌ളക്‌സുകളും ഹോർഡിംഗുകളും വയ്ക്കുന്ന പരാതിയെ തുടർന്ന് അവ നീക്കംചെയ്യാൻ ആന്റി ഡിഫേസ്‌മെന്റ് സ്‌ക്വാഡിന് നിർദേശം നൽകി. നടപടി പൂർത്തിയാക്കി പരാതിക്കാരന് മറുപടി നൽകും.