തദ്ദേശ പൊതുതിരഞ്ഞെടുപ്പ് : ബൂത്തുകളിലെ വീഡിയോ ചിത്രീകരണം അപേക്ഷ ഒൻപതിനകം നൽകണം

കാസർ​ഗോഡ് : തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിൽ പ്രശ്‌നബാധിത ബൂത്തുകൾ അല്ലാത്ത ബൂത്തുകളിൽ രാഷ്ട്രീയപാർട്ടി പ്രതിനിധികൾക്കോ സ്ഥാനാർത്ഥികൾക്കോ പരാതികൾ ഉണ്ടെങ്കിൽ വീഡിയോ ചിത്രീകരണം നടത്തുന്നതിന് സംസ്ഥാന തെരഞ്ഞെടുപ്പ് കമ്മീഷൻ നിശ്ചയിച്ച തുക അടച്ച് ഡിസംബർ ഒൻപതിന് ഉച്ചയ്ക്ക് രണ്ടുമണിക്കകം അപേക്ഷ നൽകണമെന്ന് ജില്ലാ തെരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടർ കെ.ഇമ്പശേഖർ അറിയിച്ചു. ജില്ലാ കളക്ടറുടെ ചേംബറിൽ ചേർന്ന രാഷ്ട്രീയ പാർട്ടി പ്രതിനിധികളുടെ യോഗത്തിലാണ് കളക്ടർ ഈ വിവരം അറിയിച്ചത്.  വോട്ടെടുപ്പ് വോട്ടെണ്ണൽ ദിവസങ്ങളിൽ തെരഞ്ഞെടുപ്പുമായി ബന്ധപ്പെട്ട പരാതികൾ ജില്ലാ കളക്ടറെ നേരിട്ട് അറിയിക്കുന്നതിന് രാഷ്ട്രീയപാർട്ടികൾ ഒരു പ്രതിനിധിയെ വീതം ചുമതലപ്പെടുത്തി അവരുടെ ഫോൺ നമ്പർ ജില്ലാ ഇലക്ഷൻ വിഭാഗത്തിൽ ലഭ്യമാക്കണമെന്നും കലക്ടർ പറഞ്ഞു. തെരഞ്ഞെടുപ്പ് മാതൃകാ പെരുമാറ്റച്ചട്ടം കർശനമായി പാലിക്കണം. ക്രമസമാധാനം ഉറപ്പുവരുത്തി പ്രചാരണം നടത്തുന്നുവെന്ന് ഉറപ്പാക്കണം.