പോലിസ് സേന ജനതാൽപര്യം ഉയർത്തിപ്പിടിക്കണമെന്ന് ആഭ്യന്തരമന്ത്രി രമേശ് ചെന്നിത്തല ; മാങ്ങാട്ട് പറമ്പ് പരേഡ് ഗ്രൗണ്ടിൽ കെഎപി, എംഎസ്പി ബറ്റാലിയനുകളുടെ പാസിംഗ് ഔട്ട് പരേഡ് നടന്നു

 കണ്ണൂർ : പോലിസ് സേന ജനതാൽപര്യം ഉയർത്തിപ്പിടിക്കണമെന്ന് ആഭ്യന്തര മന്ത്രി രമേശ് ചെന്നിത്തല പറഞ്ഞു. പരിശീലനം പൂർത്തിയാക്കിയ കെ എ പി, എം എസ് പി ബറ്റാലിയനുകളുടെ പാസിംഗ് ഔട്ട് പരേഡിന്റെ ഭാഗമായി മാങ്ങാട്ട് പറമ്പ് പരേഡ് ഗ്രൗണ്ടിൽ അഭിവാദ്യം സ്വീകരിച്ച് സംസാരിക്കുകയായിരുന്നു അദ്ദേഹം. ഭരണഘടന ഉയർത്തിപ്പിടിക്കുന്ന പൗരന്റെ അവകാശങ്ങൾ സംരക്ഷിക്കാനുള്ള ബാധ്യത പോലിസ് സേനാംഗങ്ങൾക്കുണ്ട്. സംസ്ഥാനത്തെ ജനജീവിതത്തെ സംരക്ഷിക്കുന്ന സേനയാണ് കേരളാ പൊലീസെന്നും അദ്ദേഹം പറഞ്ഞു. 

കുറ്റാന്വേഷണ കാര്യങ്ങളിലും കുറ്റകൃത്യങ്ങൾ തെളിയിക്കുന്നതിലും രാജ്യത്തിന് തന്നെ മാതൃകയായ സേനയാണ് കേരള പൊലീസ്. ജനാധിപത്യവും മതേതരത്വവും സംരക്ഷിക്കുകയെന്ന ഉത്തരവാദിത്വവും നാടിന്റെ ഐക്യവും സഹോദര്യവും കാത്തുസൂക്ഷിക്കുകയെന്ന കടമയും കേരള പൊലീസിനുണ്ടെന്നും അത് മറക്കരുതെന്നും മന്ത്രി രമേശ് ചെന്നിത്തല പറഞ്ഞു.

എം എൽ എ മാരായ ടി.ഒ മോഹനൻ, സജി ജോസഫ്, വി കുഞ്ഞികൃഷ്ണൻ ,സംസ്ഥാന പൊലീസ് മേധാവി റവാഡ ആസാദ് ചന്ദ്രശേഖർ, ബറ്റാലിയൻ എ ഡി ജി പി ബൽറാം കുമാർ ഉപാധ്യായ, ബറ്റാലിയൻ ഡി ഐ ജി ഡോ. ജെ ഹിമേന്ദ്ര നാഥ്, കണ്ണൂർ റൂറൽ എസ് പി ഉമേഷ് ഗോയൽ, സിറ്റി പൊലീസ് കമ്മീഷണർ വിജയ ഭരത് റെഡ്ഡി, സി ആർ പി എഫ് ഡി ഐ ജി മാത്യു എ ജോൺ എന്നിവർ പങ്കെടുത്തു.

കെ എ പി നാലാം ബറ്റാലിയനിലെ 166 പേരും എം എസ് പി മലപ്പുറത്തെ 139 പേരും ഉൾപ്പെടെ 305 പേരാണ് പരിശീലനം പൂർത്തിയാക്കിയത്. ഇവരിൽ 31 പേർ ബിരുദാനന്തര ബിരുദക്കാരും 12 പേർ എഞ്ചിനിയറിംഗ് ബിരുദധാരികളും 195 പേർ ബിരുദമുള്ളവരും 18 പേർ ഡിപ്ലോമയോഗ്യത നേടിയവരുമാണ്. 9 മാസത്തെ അടിസ്ഥാന പരിശീലനത്തിന്റെ ഭാഗമായി വിവിധ ഔട്ട്‌ഡോർ വിഷയങ്ങളും ഇന്ത്യൻ ഭരണഘടന, ഭാരതീയ ന്യായ സംഹിത, ഭാരതീയ സാക്ഷ്യ അധിനിയം, ഭാരതീയ സുരക്ഷാ സംഹിത തുടങ്ങിയ ഇൻഡോർ വിഷയങ്ങളും സ്വിമ്മിംഗ്, ഡ്രൈവിംഗ്, കമാൻഡോ കോഴ്‌സ്, ഹൈ ആൾടിറ്റിയൂഡ് ട്രെയിനിംഗ്, റേഞ്ച് ഫയറിംഗ്, ആന്റി സബോട്ടേജ് ട്രെയിനിംഗ്, സൈബർ ഫോറൻസിക് തുടങ്ങിയ പ്രത്യേക കോഴ്സുകളും ഇവർ സ്വായത്തമാക്കി.

എം എസ് പി വിഭാഗത്തിൽ മികച്ച ഷൂട്ടറായി കെ.വൈ ജിതിൻ, ഇൻ്റോർ വിഭാഗത്തിൽ പി ആദർശ്, സൈബർ സംവിധാനത്തിൽ കെ.ഷിബിൻ, ഔട്ട്ഡോർ , ഓൾറൗങ്ങർ വിഭാഗത്തിൽ ബി ഐ ജിനു എന്നിവർ സമ്മാനം നേടി.കെ എ പി വിഭാഗത്തിൽ മികച്ച ഷൂട്ടറായി കെ വി നിവേദ് , ഇൻ്റോർ വിഭാഗത്തിൽ ആൽവിൻ വർഗ്ഗീസ് , സൈബർ സംവിധാനത്തിൽ എസ് പി അമർനാഥ് ,ഔട്ട് ഡോറിൽ സബിൻ ടി സത്യൻ, ഓൾ റൗണ്ടറായി ഡി അമൽദേവ് എന്നിവരെ തിരഞ്ഞെടുത്തു.