പൊതുവിദ്യാഭ്യാസ സംരക്ഷണ യജ്ഞം നൂറുകണക്കിന് സ്‌കൂളുകളെ മികവിന്റെ കേന്ദ്രങ്ങളാക്കി: മന്ത്രി വി ശിവൻകുട്ടി

കണ്ണൂർ: പൊതുവിദ്യാഭ്യാസ സംരക്ഷണ യജ്ഞം കിഫ്ബി ഫണ്ടിംഗ് വഴി നൂറുകണക്കിന് സ്‌കൂളുകളെ മികവിന്റെ കേന്ദ്രങ്ങളാക്കി മാറ്റിയെന്ന് പൊതു വിദ്യാഭ്യാസ- തൊഴിൽ വകുപ്പ് മന്ത്രി വി ശിവൻകുട്ടി പറഞ്ഞു. ചേലോറ ഗവ ഹയർ സെക്കൻഡറി സ്‌കൂളിൽ കിഫ്ബി ഫണ്ട് ഉപയോഗിച്ച് നിർമ്മിച്ച കെട്ടിടത്തിന്റെ ഉദ്ഘാടനം നിർവഹിച്ച് സംസാരിക്കുകയായിരുന്നു മന്ത്രി.

സർക്കാർ സ്‌കൂളുകൾക്ക് ലോകോത്തര അടിസ്ഥാന സൗകര്യങ്ങൾ നൽകുകയാണ് സർക്കാരിന്റെ പ്രതിബദ്ധത. വിദ്യാഭ്യാസത്തിൽ കേരളം എപ്പോഴും മുൻനിരയിലുണ്ട്. മുൻകാലങ്ങളിൽ രാജ്യത്തിന്റെ പല ഭാഗങ്ങളിലുമുള്ള സർക്കാർ സ്‌കൂളുകൾ അടിസ്ഥാന സൗകര്യങ്ങളുടെ പരിമിതികൾ നേരിട്ടിരുന്നു. ഇത് പലപ്പോഴും സ്വകാര്യ സ്ഥാപനങ്ങൾക്ക് മുൻഗണന നൽകുന്നതിലേക്ക് നയിച്ചു. എന്നാൽ കേരളത്തിൽ ചിട്ടയായ ആസൂത്രണത്തിലൂടെയും നിക്ഷേപത്തിലൂടെയും സർക്കാർ സ്‌കൂളുകൾ സ്വകാര്യ സ്‌കൂളുകൾക്ക് തുല്യമായ മാത്രമല്ല, പല സന്ദർഭങ്ങളിലും മികച്ചതുമായ ഒരു അന്തരീക്ഷം വാഗ്ദാനം ചെയ്യുന്നുണ്ടെന്ന് മന്ത്രി പറഞ്ഞു. 48,000 സ്മാർട്ട് ക്ലാസ് മുറികൾ യാഥാർഥ്യമാക്കിയിട്ടുണ്ട്. 

കേരളത്തിലെ എല്ലാ ഹൈസ്‌കൂളിനും ഹയർ സെക്കൻഡറി സ്‌കൂളിനും ഡിജിറ്റൽ പഠന ഉപകരണങ്ങൾ, സംവേദനാത്മക ബോർഡുകൾ, അതിവേഗ ഇന്റർനെറ്റ് എന്നിവ ലഭ്യമാണ്. സാങ്കേതികവിദ്യ സംയോജിത വിദ്യാഭ്യാസത്തിലേക്കുള്ള ഈ മാറ്റം നമ്മുടെ വിദ്യാർത്ഥികളെ ആധുനിക ലോകത്തിനായി സജ്ജമാക്കുന്നു. സർക്കാർ സ്‌കൂളുകളിൽ പലതും ആധുനിക ഡിസൈൻ, സുസജ്ജമായ ലാബുകൾ, ലൈബ്രറികൾ, മൾട്ടി പർപ്പസ് ഹാളുകൾ എന്നിവ ഉൾക്കൊള്ളുന്ന അത്യാധുനിക സ്ഥാപനങ്ങളായി പുനർനിർമ്മിച്ചിട്ടുണ്ടെന്നും മന്ത്രി പറഞ്ഞു.

ചേലോറ ഗവ ഹയർ സെക്കൻഡറി സ്‌കൂളിൽ ഒരുകോടി 30 ലക്ഷം രൂപ കിഫ്ബി ഫണ്ട് ഉപയോഗിച്ചാണ് കെട്ടിടം നിർമ്മിച്ചത്. അഞ്ച് ക്ലാസ് മുറികൾ ഉൾപ്പെടുന്ന മൂന്നു നില കെട്ടിടമാണിത്.രജിസ്ട്രേഷൻ വകുപ്പ് മന്ത്രി രാമചന്ദ്രൻ കടന്നപ്പള്ളി അധ്യക്ഷനായി. ഡിഡിഇ ഇൻചാർജ് എ.എസ് ബിജേഷ് റിപ്പോർട്ട് അവതരിപ്പിച്ചു. കണ്ണൂർ കോർപ്പറേഷൻ വിദ്യാഭ്യാസ സ്റ്റാന്റിങ് കമ്മിറ്റി ചെയർമാൻ സുരേഷ് ബാബു എളയാവൂർ, വാർഡ് കൗൺസിലർമാരായ കെ പ്രദീപൻ, കെ നിർമല, കോർപ്പറേഷൻ എക്സിക്യൂട്ടീവ് എഞ്ചിനീയർ എം.വി ജസ്വന്ത്, കണ്ണൂർ ആർ ഡി ഡി ആർ.രാജേഷ് കുമാർ, ചേലോറ ജിഎച്ച്എസ്എസ് പ്രിൻസിപ്പൽ ടി പ്രസീത, ഹെഡ്മിസ്ട്രസ് സി.കെ സീമ, വിദ്യാകിരണം ജില്ലാ കോ ഓർഡിനേറ്റർ കെ.സി സുധീർ, കണ്ണൂർ ഡിഇഒ കെ.പി നിർമല, ഹയർ സെക്കൻഡറി ജില്ലാ കോ ഓർഡിനേറ്റർ എം.കെ അനൂപ് കുമാർ, കണ്ണൂർ മണ്ഡലം വിദ്യാഭ്യാസ സമിതി കൺവീനർ എൻ.ടി സുധീന്ദ്രൻ മാസ്റ്റർ, വികസന സമിതി ചെയർമാൻ എം നൈനേഷ്, പിടിഎ പ്രസിഡന്റ് ടി മുരളീധരൻ, മദർ പിടിഎ പ്രസിഡന്റ് ഒ.കെ സിനി, സ്‌കൂൾ പാർലമെന്റ് ചെയർമാൻ സി റിതിക, ജനപ്രതിനിധികൾ, രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുത്തു.