.jpg)
ദേശീയ സാങ്കേതിക കലോത്സവം "യുക്തി X'26" ഫെബ്രുവരി 16, 17 തീയതികളിൽ പയ്യന്നൂരിൽ
പയ്യന്നൂർ : കോളേജ് ഓഫ് എഞ്ചിനീയറിംഗ് പയ്യന്നൂർ കൈതപ്രം ദേശീയതല സാങ്കേതിക കലോത്സവമായ യുക്തി X'26 ഫെബ്രുവരി 16, 17 തീയതികളിൽ നടക്കുമെന്ന് സംഘാടകർ വാർത്താ സമ്മേളനത്തിൽ അറിയിച്ചു. രണ്ട് ദിവസം നീണ്ടുനിൽക്കുന്ന പരിപാടിയിൽ രാജ്യത്തിന്റെ വിവിധ ഭാഗങ്ങളിൽ നിന്നുള്ള 2000 മിടുക്കരായ വിദ്യാർത്ഥികൾ, കണ്ടുപിടുത്തക്കാർ, എഞ്ചിനീയർമാർ, സാങ്കേതിക പ്രേമികൾ എന്നിവർ ഒത്തുചേരും.വിദ്യാർത്ഥികൾക്ക് അവരുടെ എഞ്ചിനീയറിംഗ് കഴിവുകൾ പ്രകടിപ്പിക്കാനും ആശയങ്ങൾ കൈമാറാനും ഭാവി രൂപപ്പെടുത്താൻ വളർന്നുവരുന്ന സാങ്കേതികവിദ്യകളെക്കുറിച്ച് മനസ്സിലാക്കാനും മികച്ചൊരു വേദി ഒരുക്കുകയാണ് യുക്തി X'26 ലക്ഷ്യമിടുന്നത്.
ഇതിൻ്റെ ഭാഗമായി എഞ്ചിനീയറിംഗ് പ്രോജക്ട് എക്സ്പോ: യഥാർത്ഥ ലോകത്തെ വെല്ലുവിളികൾ നേരിടുന്ന നൂതനമായ വിദ്യാർത്ഥി പ്രോജക്റ്റുകൾ.ഗ്രാൻഡ് ഓട്ടോ ഷോ: അത്യാധുനിക ഓട്ടോമോട്ടീവ് സാങ്കേതികവിദ്യകളുടെയും ഹൈ-പെർഫോമൻസ് വാഹനങ്ങളുടെയും പ്രദർശനം. ബൈക്ക് ഷോ: ആധുനിക ബൈക്കുകളുടെ ശക്തിയും ഡിസൈനും എഞ്ചിനീയറിംഗ് മികവും പ്രദർശിപ്പിക്കുന്നു. ഇൻഡോ-ടിബറ്റൻ ബോർഡർ ഫോഴ്സ് വെപ്പൺ എക്സിബിഷൻ: അത്യാധുനിക പ്രതിരോധ ഉപകരണങ്ങളുടെയും ദേശീയ സുരക്ഷാ സാങ്കേതികവിദ്യകളുടെയും പ്രത്യേക പ്രദർശനം.
ആർട്ടിഫിഷ്യൽ ഇന്റലിജൻസ് ഹാക്കത്തോൺ: ഭാവിയിലേക്ക് ആവശ്യമായ നൂതന പരിഹാരങ്ങൾ വികസിപ്പിക്കുന്നതിനുള്ള മത്സരം. ടെക്നിക്കൽ മത്സരങ്ങളും സംവാദങ്ങളും: നവീകരണം, ടീം വർക്ക്, സാങ്കേതിക നൈപുണ്യം എന്നിവ പ്രോത്സാഹിപ്പിക്കുന്ന വിവിധ സെഷനുകൾ നടക്കും. പരിപാടിയുടെ ബ്രോഷർ പ്രകാശനം നടന്നു. സമാപനത്തോടനുബന്ധിച്ച് ആൽമരം ബാൻഡിന്റെ സംഗീത പരിപാടിയും ഉണ്ടാകും. വാർത്ത സമ്മേളനത്തിൽ എം. നാസ്, ഡോ. ഉമർ ശിഹാബ്, പ്രിൻസിപ്പാൾ ഡോ. എ. പശുപതി,കെ.കൃഷ്ണനുണ്ണി, എം.വി. വിമൽദാസ് എന്നിവർ പങ്കെടുത്തു