മൃദംഗശൈലേശ്വരി ധ്വജപ്രതിഷ്ഠ ;ആധാരശിലാസ്ഥാപനം 20 ന് നടക്കും

മട്ടന്നൂർ : വീരകേരളവർമ്മ പഴശ്ശിരാജയുടെ കുലപരദേവതാ സ്ഥാനമായ മൃദംഗശൈലേശ്വരി ക്ഷേത്രത്തിൽ ധ്വജപ്രതിഷ്ഠയോടനുബന്ധിച്ചുള്ള ആധാര ശിലാസ്‌ഥാപനം മാർച്ച് 20ന് നടക്കും.

ക്ഷേത്രം തന്ത്രിമാരായ കോഴിക്കോട്ടിരി ശ്രീധരൻ നമ്പൂതിരിപ്പാടിൻ്റെയും നന്ത്യാർ വള്ളി ശങ്കരൻ നമ്പൂതിരിപ്പാടിൻ്റെയും മുഖ്യകാർമ്മികത്വത്തിൽ
 20 ന് രാവിലെ 9 നും 11 നും ഇടയിലുള്ള മുഹൂർത്ത രാശയിലാണ്  ശിലാസ്ഥാപനം .മേൽശാന്തി കളത്തിൽ കൃഷ്ണദാസ് നമ്പൂതിരി സഹകാർമ്മികത്വംവഹിക്കും.

ചടങ്ങിന് മലബാർ ദേവസ്വം അസിസ്റ്റൻ്റ് കമ്മീഷണർ എൻ. കെ. ബൈജു , ദേവസ്വം സ്റ്റാൻ്റിംഗ് കമ്മിറ്റി ചെയർമാൻ വി.കെ. മധുസൂദനൻ നേതൃത്വം നൽകും.പുതുതായി നിർമ്മിച്ച കൊടിമരം ആധാരശിലയിട്ട് ഉറപ്പിക്കുന്ന ചടങ്ങാണ് ധ്വജാധാരശിലാസ്ഥാപനം.ഏപ്രിൽ മൂന്നിനാണ് ധ്വജപ്രതിഷ്ഠാ കർമ്മം.തിരുവനന്തപുരത്തെ ദേവീ ഭക്തനായ പടിഞ്ഞാറ്റയിൽ രാജേഷാണ്മൃദംഗശൈലേശ്വരി ക്ഷേത്രത്തിൽ കൊടിമരം സമർപ്പിക്കുന്നത്.പ്രശസ്ത തച്ചു ശാസ്ത്രജ്ഞൻ ചെറുതാഴം ശങ്കരനാചാരിയുടെ നേതൃത്വത്തിലാണ് പാരമ്പര്യ തച്ചുശാസ്ത്ര പ്രകാരം തേക്കു  ഉപയോഗിച്ച് 17 കോൽ ഉയരമുള്ള കൊടിമരം നിർമ്മിച്ചത്.50 ലക്ഷം രൂപയാണ് നിർമ്മാണച്ചെലവ് പ്രതീക്ഷിക്കുന്നത്.