എയർ ഇന്ത്യ എക്സ്‍പ്രസ് കണ്ണൂർ വിമാനതാവളത്തിൽ നിന്ന് ഹജ്ജ് സർവീസ് നടത്തും

 കണ്ണൂർ : കണ്ണൂർ അന്താരാഷ്ട്ര വിമാന താവളത്തിൽ നിന്ന് ഹജ്ജ് സർവീസിന് ഇത്തവണ വൈഡ് ബോഡി വിമാനങ്ങൾക്ക് പകരം  എയർ ഇന്ത്യ എക്സ്‍പ്രസ് ഹജ്ജ് സർവീസ് നടത്തും. കഴിഞ്ഞ വർഷം സൗദി എയർലൈൻസിന്റെ വൈഡ് ബോഡി വിമാനങ്ങൾ സർവീസ് നടത്തിയിരുന്നു. ഇത്തവണ കൊച്ചിയിൽ നിന്നാണ് സൗദി എയർലൈൻസ് ഹജ്ജ് സർവീസ് നടത്തുക.

മേയ് 15 മുതലായിരിക്കും കണ്ണൂരിൽ നിന്നുള്ള ഹജ്ജ് സർവീസുകൾ തുടങ്ങുന്നത്. സർവീസുകളുടെ സമയക്രമം അനുസരിച്ച് തീയതിയിൽ മാറ്റം വന്നേക്കും. 4105 പേരാണ് ഇത്തവണ കണ്ണൂരിൽ നിന്ന് ഹജ്ജിന് പോകാൻ രജിസ്റ്റർ ചെയ്തിരിക്കുന്നത്.
കഴിഞ്ഞ വർഷം 3218 പേരാണ് കണ്ണൂർ വിമാനത്താവളം വഴി ഹജ്ജിന് പോയത്.
ഹജ്ജ് ക്യാമ്പ് ഒരുക്കുന്നതിന് പ്രാരംഭ പ്രവർത്തനങ്ങൾ തുടങ്ങിയിട്ടുണ്ട്. അന്താരാഷ്ട്ര കാർഗോ കോംപ്ലക്സിൽ തന്നെ ഹജ്ജ് ക്യാമ്പിന് വേണ്ട സൗകര്യം ഒരുക്കാനാണ് ലക്ഷ്യമിടുന്നത്.

വിമാനത്താവള പരിസരത്ത് ഹജ്ജ് ഹൗസ് നിർമിക്കാനുള്ള നടപടികളും അതി വേഗത്തിൽ പുരോഗമിച്ചു വരികയാണ്.