സമസ്ത മേഖലയിലും സമഗ്ര മാറ്റം: അഡ്വ. എ. രാജ എംഎൽഎ

Whatsapp Group

അടിമാലി പഞ്ചായത്ത് ഹാളിൽ നടന്ന വികസന സദസിൽ അടിമാലി ഗ്രാമപഞ്ചായത്ത് ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർമാൻ സി. ഡി ഷാജി അധ്യക്ഷത വഹിച്ചു.അടിമാലി ഗ്രാമപഞ്ചായത്തിന്റെ അഞ്ച് വർഷത്തെ വികസന നേട്ടങ്ങളുടെ റിപ്പോർട്ട് പഞ്ചായത്ത് സെക്രട്ടറി ആർ. നന്ദകുമാർ അവതരിപ്പിച്ചു.ഡിജികേരളത്തിലൂടെ 3767 പേർക്ക് സാക്ഷരത നൽകുവാനും ലൈഫ് ഭവന പദ്ധതിയിലൂടെ 1261 വീടുകൾ പൂർത്തിയാക്കുവാനും മാലിന്യ സംസ്‌ക്കരണ മേഖലയിൽ 90 ശതമാനം പ്രവർത്തനങ്ങൾ നടപ്പിലാക്കുവാനും പഞ്ചായത്തിന് കഴിഞ്ഞു. 4955 പേർക്ക് സാമൂഹ്യ സുരക്ഷ പെൻഷൻ നൽകി. ഇതിനായി അഞ്ച് വർഷത്തിനുള്ളിൽ 36,93,47900 രൂപ വിനിയോഗിച്ചു. 364 പേർക്ക് പാലിയേറ്റീവ് സേവനം നൽകുവാൻ 20 ഹോം കെയർ പ്രവർത്തിക്കുന്നു. അടിമാലി ട്രൈബൽ എക്സ്റ്റൻഷൻ ഓഫീസ് മികച്ച പ്രവർത്തനങ്ങൾ നടപ്പിലാക്കുന്നു.  അടിമാലി പഞ്ചായത്തിന് കീഴിലുള്ള സ്‌കൂളുകളുടെ നിർമ്മാണ പ്രവർത്തനങ്ങൾ, പശ്ചാത്തല സൗകര്യ വികസനം, ടേക്ക് എ ബ്രേക്ക്, വിവിധ റോഡുകളുടെ നിർമ്മാണം എന്നിങ്ങനെ എല്ലാ തലങ്ങളിലും പഞ്ചായത്ത് മികച്ച പ്രവർത്തനങ്ങൾ നടപ്പാക്കുന്നതായി റിപ്പോർട്ട് വ്യക്തമാക്കുന്നു.

സംസ്ഥാനസർക്കാരും തദ്ദേശ സ്വയംഭരണ സ്ഥാപനങ്ങളും നടത്തിയ വികസനപ്രവർത്തനങ്ങൾ വിലയിരുത്താനും ഭാവി വികസനത്തിന് പൊതുജനാഭിപ്രായം സ്വീകരിക്കുന്നതിനുമായി സംഘടിപ്പിച്ച വികസനസദസിൽ സംസ്ഥാനസർക്കാരിന്റെ വികസന നേട്ടങ്ങളുടെ വീഡിയോ പ്രദർശിപ്പിച്ചു. പൊതുജനങ്ങൾ വികസന പ്രവർത്തനങ്ങൾ വിലയിരുത്തുകയും ഭാവി വികസനത്തെപ്പറ്റി ചർച്ച ചെയ്യുകയും  ചെയ്തു.

സദസിന്റെ ഭാഗമായി കെ സ്മാർട്ട് സേവനവും തൊഴിൽ മേളയും സംഘടിപ്പിച്ചു. പഞ്ചായത്തിന്റെ വിവിധ പദ്ധതികൾക്കായി സ്ഥലം വിട്ടുനൽകിയവരെയും വിവിധ വാർഡുകളിലെ ഹരിതകർമ്മ സേന അംഗങ്ങളെയും ആദരിച്ചു. സദസിൽ പഞ്ചായത്ത് അംഗങ്ങൾ, വകുപ്പ് ജീവനക്കാർ, രാഷ്ട്രീയ പ്രതിനിധികൾ, പൊതുജനങ്ങൾ എന്നിവർ പങ്കെടുത്തു.