പെർഫ്യൂം സുഗന്ധം ദിവസം മുഴുവൻ നിലനിൽക്കാൻ ചില പൊടിക്കൈകളുണ്ട്

പലപ്പോഴും വിലകൂടിയ പെർഫ്യൂമുകൾ ഉപയോഗിച്ചാലും മണിക്കൂറുകൾക്കുള്ളിൽ അതിന്റെ മണം ഇല്ലാതാകും . എന്നാൽ ചില ലളിതമായ വിദ്യകൾ പ്രയോഗിച്ചാൽ രാവിലെ ഉപയോഗിക്കുന്ന പെർഫ്യൂമിന്റെ സുഗന്ധം വൈകുന്നേരം വരെ നിലനിർത്താൻ സാധിക്കും. പെർഫ്യൂം ഉപയോഗിക്കുന്ന രീതിയിലും അത് പ്രയോഗിക്കുന്ന ശരീരഭാഗങ്ങളിലും വരുത്തുന്ന മാറ്റങ്ങളാണ് ഇതിന്റെ രഹസ്യം. സുഗന്ധം ദീർഘനേരം നിലനിൽക്കാൻ സഹായിക്കുന്ന ചില പൊടിക്കൈകളുണ്ട്.

മോയ്സ്ച്യുറൈസർ ഉപയോഗിക്കാം

വരണ്ട ചർമ്മത്തേക്കാൾ ഈർപ്പമുള്ള ചർമ്മത്തിലാണ് സുഗന്ധം കൂടുതൽ നേരം തങ്ങിനിൽക്കുന്നത്. പെർഫ്യൂം അടിക്കുന്നതിന് മുൻപ് മണമില്ലാത്ത ലോഷനോ വാസലിനോ ചർമ്മത്തിൽ പുരട്ടുന്നത് സുഗന്ധത്തെ ചർമ്മത്തിൽ പിടിച്ചുനിർത്താൻ സഹായിക്കും.

തടവാതിരിക്കുക

പലരും കൈത്തണ്ടയിൽ പെർഫ്യൂം അടിച്ച ശേഷം അത് തമ്മിൽ തിരുമ്മാറുണ്ട്. ഇത് വലിയ തെറ്റാണ്. ഇങ്ങനെ ചെയ്യുന്നത് പെർഫ്യൂമിലെ തന്മാത്രകളെ തകർക്കുകയും സുഗന്ധം വേഗത്തിൽ നഷ്ടപ്പെടാൻ കാരണമാകും. പെർഫ്യൂം അടിച്ച ശേഷം അത് ചർമ്മത്തിൽ തനിയെ ഉണങ്ങാൻ അനുവദിക്കുക.

പൾസ് പോയിന്റുകളിൽ ശ്രദ്ധിക്കാം

ശരീരത്തിലെ രക്തയോട്ടം കൂടുതലുള്ള ഭാഗങ്ങളായ പൾസ് പോയിന്റുകളിൽ പെർഫ്യൂം പ്രയോഗിക്കുക. കൈത്തണ്ട, കഴുത്തിന്റെ ഇരുവശങ്ങൾ, ചെവിയുടെ പിൻഭാഗം, മുട്ടിന് പിന്നിലെ ഭാഗം എന്നിവ ഇതിന് ഉദാഹരണമാണ്. ഇവിടുത്തെ ചൂട് പെർഫ്യൂമിന്റെ മണം സാവധാനം പുറത്തുവിടാൻ സഹായിക്കുന്നു.

വസ്ത്രത്തിലല്ല, ചർമ്മത്തിൽ

പെർഫ്യൂം വസ്ത്രത്തിൽ അടിക്കുന്നതിനേക്കാൾ ചർമ്മത്തിൽ നേരിട്ട് പ്രയോഗിക്കുന്നതാണ് കൂടുതൽ ഫലം നൽകുക. വസ്ത്രങ്ങളിൽ അടിക്കുമ്പോൾ അത് പെട്ടെന്ന് ബാഷ്പീകരിച്ചു പോകാൻ സാധ്യതയുണ്ട്. കുളി കഴിഞ്ഞ ഉടനെ ചർമ്മത്തിലെ സുഷിരങ്ങൾ തുറന്നിരിക്കുന്ന സമയത്ത് പെർഫ്യൂം ഉപയോഗിക്കുന്നത് മികച്ച ഫലം നൽകും.

ശ്രദ്ധിക്കേണ്ട കാര്യങ്ങൾ

പെർഫ്യൂമുകൾ നേരിട്ടുള്ള സൂര്യപ്രകാശത്തിൽ നിന്നോ ഈർപ്പമുള്ള ബാത്റൂമുകളിൽ നിന്നോ മാറ്റി തണുപ്പുള്ള സ്ഥലങ്ങളിൽ സൂക്ഷിക്കുക. ഇത് അതിന്റെ ഗുണമേന്മ കുറയാതെ സംരക്ഷിക്കും. ശരിയായ രീതിയിൽ പെർഫ്യൂം ഉപയോഗിക്കുന്നത് നിങ്ങളുടെ ആത്മവിശ്വാസം വർദ്ധിപ്പിക്കുക മാത്രമല്ല, ദിവസം മുഴുവൻ ഉന്മേഷം നൽകുകയും ചെയ്യും