ഒരു പിടി കരിഞ്ചീരകം മതി മുടി മെച്ചമാകും

മുടിയുടെ ആരോഗ്യത്തിനായി പറയുന്ന ഒന്നാണ് ഓയില്‍ മസാജ്. പണ്ടുകാലം തൊട്ടുതന്നെ പിന്‍തുടര്‍ന്നു വരുന്ന ഒന്നാണിത്. മുടിയുടെ പല പ്രശ്‌നങ്ങള്‍ക്കും പരിഹാരമായി പറഞ്ഞു വരുന്ന ഒന്ന്. ദിവസവും ചെയ്യേണ്ട കാര്യമില്ല, ആഴ്ചയില്‍ ഒന്നുരണ്ടു തവണ ചെയ്താല്‍ തന്നെ കാര്യമായ ഗുണം ലഭിയ്ക്കും. താരന്‍, നര തുടങ്ങിയ പല പ്രശ്‌നങ്ങള്‍ക്കും പല തരത്തിലെ ഓയിലുകള്‍ ഇന്നത്തെ കാലത്ത് ലഭ്യമാണ്. ഇത്തരത്തിലെ ചില ഓയിലുകള്‍ നമുക്ക് വീട്ടില്‍ തന്നെ തയ്യാറാക്കി ഉപയോഗിയ്ക്കാവുന്നതാണ്. ഇവയെക്കുറിച്ചറിയാം. ഇതില്‍ പ്രധാന ചേരുവയായി ഉപയോഗിയ്ക്കുന്നത് കരിഞ്ചീരകമാണ്. കരിഞ്ചീരകം കൊണ്ട് വ്യത്യസ്ത രീതിയില്‍ തയ്യാറാക്കാവുന്ന എണ്ണകളും ഹെയര്‍ പായ്ക്കുകളുമെല്ലാം ഇതില്‍ പറയുന്നു.
കരിഞ്ചീരകം

കരിഞ്ചീരകം

ഇതില്‍ ആദ്യത്തേത് കരിഞ്ചീരകം ഉപയോഗിച്ചുള്ള ഓയിലാണ്. കരിഞ്ചീരകം ഏറെ പോഷകങ്ങള്‍ അടങ്ങിയ ഒരു ചെറിയ കറുത്ത വിത്താണ്. മുടിയുടെ വളര്‍ച്ചയ്ക്കും മുടിനര അകറ്റാനുമെല്ലാം ഇതേറെ ഗുണകരമാണ്. ഇതിനായി വെളിച്ചെണ്ണ ഒരു പാനില്‍ വച്ച് ചൂടാക്കുക. ഇതിലേയ്ക്ക അല്‍പം കരിഞ്ചീരകവും ഇടുക. കരിഞ്ചീരകം പൊട്ടുന്നത് വരെ ചെറിയ ചൂടില്‍ ഇത് തിളപ്പിയ്ക്കാം. പിന്നീട് ഇത് അടച്ചു വച്ച് പിറ്റേന്ന് ഇത് ഊറ്റിയെടുത്ത് മുടിയില്‍ പുരട്ടാം. ഇത് ഇരുമ്പുചട്ടിയില്‍ തിളപ്പിയ്ക്കുന്നതാണ് കൂടുതല്‍ നല്ലത്. മുടി വളരാന്‍, താരന്, നര മാറാന്‍ ഇതേറെ നല്ലതാണ്.
ഹെയര്‍ ഓയില്‍

ഹെയര്‍ ഓയില്‍

അടുത്തതായി മുടി നരയ്ക്ക് പറ്റുന്ന ഒരു ഹെയര്‍ ഓയില്‍ തയ്യാറാക്കാം. ഇതിനായി കരിഞ്ചീരകം, കറിവേപ്പില, വെളിച്ചെണ്ണ എന്നിവയാണ് വേണ്ടത്. കരിഞ്ചീരകവും കറിവേപ്പിലയും അല്‍പം വെള്ളം ചേര്‍ത്ത് നല്ലതുപോലെ അരച്ചെടുക്കാം. ഇത് ഓയിലില്‍ ഇട്ട് തിളപ്പിയ്ക്കാം. വെളിച്ചെണ്ണയല്ലെങ്കില്‍ നിങ്ങള്‍ ഉപയോഗിയ്ക്കുന്ന മറ്റ് ഓയിലുകള്‍ ആയാലും മതിയാകും. ഇത് പിറ്റേന്ന് ഊറ്റിയെടുത്ത് മുടിയില്‍ പുരട്ടാം.
പായ്ക്ക്

പായ്ക്ക്

അടുത്തതായി മുടി വളരാന്‍ സഹായിക്കുന്ന ഒരു പായ്ക്ക് തയ്യാറാക്കാം. ഇതിനും കരിഞ്ചീരകം വേണം. തൈരും ഇതിനൊപ്പം ചേര്‍ക്കാം. കരിഞ്ചീരകവും തൈരും ചേര്‍ത്ത് അരയ്ക്കുക. ഇതില്‍ അല്‍പം ആവണക്കെണ്ണ കൂടി ചേര്‍ത്ത് മുടിയില്‍ പുരട്ടാം. അല്‍പം കഴിഞ്ഞ് കഴുകിക്കളയാം. ഇതും മുടിയുടെ ആരോഗ്യത്തിന് മികച്ചതാണ്. അടുത്തത് കരിഞ്ചീരകവും കഞ്ഞിവെള്ളവും ചേര്‍ത്ത് ഒന്നാണ്. കരിഞ്ചീരകം തലേന്ന് കഞ്ഞിവെള്ളത്തില്‍ ഇട്ടു വച്ച് പിറ്റേന്ന് ഇത് അരച്ചെടുത്ത് മുടിയില്‍ പുരട്ടാം. ഇതും മുടിയ്ക്ക് ഏറെ നല്ലതാണ്. മുടി നല്ലതുപോലെ വളരാനും മുടി തിളങ്ങാനും ഇതേറെ നല്ലതാണ്.