ഇപ്പോള്‍ ശമ്പളം 2.5 ലക്ഷം രൂപ, 15,000 രൂപ കിട്ടിയ കാലത്തായിരുന്നു സന്തോഷവതിയെന്ന് യുവതി, ശമ്പളം കൂടിയപ്പോള്‍ സന്തോഷം കുറഞ്ഞു, അനുഭവം പങ്കുവെച്ചതിങ്ങനെ

ന്യൂഡല്‍ഹി: സോഷ്യല്‍ മീഡിയയില്‍ വൈറലായ യുവതിയുടെ ഒരു പോസ്റ്റ് ഏറെ ശ്രദ്ധ നേടിയിരിക്കുകയാണ്. പ്രതിമാസം 2.5 ലക്ഷം രൂപ ശമ്പളം വാങ്ങുന്ന സാക്ഷി എന്ന യുവതി തന്റെ അനുഭവം പങ്കുവെച്ചത് ഇങ്ങനെ.

ഞാന്‍ ആദ്യം 15,000 രൂപ മാത്രം ശമ്പളത്തില്‍ ജോലി ചെയ്തപ്പോള്‍ ജീവിതം ഏറ്റവും സന്തോഷകരമായിരുന്നു. അന്ന് ഞാന്‍ യഥാര്‍ത്ഥത്തില്‍ സന്തുഷ്ടയും ഏവരോടും നന്ദിയുള്ളവളുമായിരുന്നു. പിന്നീട് ശമ്പളം 1.5 ലക്ഷമായി, പിന്നെ 2.5 ലക്ഷമായി. പക്ഷേ സന്തോഷം കുറഞ്ഞു.

ഇത് ഒരിക്കലും ശമ്പളത്തിന്റെ കാര്യമല്ല. കൂടുതല്‍ പണം വന്നപ്പോള്‍ താരതമ്യങ്ങള്‍ വന്നു. ജോലിയിലെ സ്‌ട്രെസ്, മാനസിക സമ്മര്‍ദ്ദം ഇവയെല്ലാം സന്തോഷത്തെ തട്ടിപ്പറിച്ചു. പഴയ ലളിതമായ ജീവിതത്തിലെ സന്തോഷം ഇപ്പോള്‍ ഇല്ലെന്ന് അവര്‍ പറയുന്നു.

'ഒരു ശമ്പളവും കുറവല്ല' എന്നാണ് അവരുടെ സന്ദേശം. പണം കൂടുന്നതിനൊപ്പം ആവശ്യങ്ങളും പ്രതീക്ഷകളും കൂടുന്നത് മനുഷ്യനെ അസംതൃപ്തനാക്കുന്നുവെന്നാണ് അനുഭവം.

പോസ്റ്റ് സോഷ്യല്‍ മീഡിയയില്‍ വലിയ ചര്‍ച്ചയ്ക്ക് വഴിയൊരുക്കിയിട്ടുണ്ട്. പലരും തങ്ങളുടെ അനുഭവങ്ങള്‍ പങ്കുവെക്കുകയും കൂടുതല്‍ പണം എന്നാല്‍ കൂടുതല്‍ സന്തോഷം എന്നില്ല എന്ന കാഴ്ചപ്പാടിനോട് യോജിക്കുകയും ചെയ്തു. ലളിതമായ ജീവിതവും മനസ്സമാധാനവുമാണ് യഥാര്‍ത്ഥ സന്തോഷത്തിന്റെ താക്കോല്‍ എന്ന സന്ദേശമാണ് യുവതിയുടെ പോസ്റ്റ് നല്‍കുന്നത്.