ഐപിഎല്‍ കഴിഞ്ഞപ്പോള്‍ വൈഭവിന് കിട്ടിയത് 55 ലക്ഷം രൂപയുടെ പ്രൈസ് മണി, ഒരു ടാറ്റ സിയറ കാറും

ന്യൂഡല്‍ഹി: ഇന്ത്യന്‍ പ്രീമിയര്‍ ലീഗിന്റെ 2026 സീസണ്‍ കഴിയുമ്പോള്‍ ക്രിക്കറ്റ് ആരാധകരുടെ ശ്രദ്ധയെല്ലാം വൈഭവ് സൂര്യവംശിയെന്ന പതിനഞ്ചുകാരനിലാണ്. രണ്ടാം സീസണില്‍ കളിക്കുന്ന വൈഭവ് അസാധാരണ പ്രകടനമാണ് ഇക്കുറി പുറത്തെടുത്തത്. ഇതോടെ ടൂര്‍ണമെന്റിന്റെ അവസാന ദിവസം അഞ്ച് അവാര്‍ഡുകളും സ്വന്തമാക്കി. 55 ലക്ഷം രൂപ പ്രൈസ് മണിയും ഒരു ടാറ്റ സിയറ കാറും വൈഭവിന് സ്വന്തം. ഒരൊറ്റ സീസണില്‍ ഇത്രയധികം അവാര്‍ഡുകള്‍ വാരിക്കൂട്ടിയത് ഐപിഎല്‍ ചരിത്രത്തില്‍ അപൂര്‍വമാണ്. 

സൂര്യവംശിയുടെ അവാര്‍ഡുകള്‍,

1. ഓറഞ്ച് ക്യാപ് - 10 ലക്ഷം രൂപ 
   സീസണിലെ ടോപ് സ്‌കോറര്‍. 776 റണ്‍സ് (സ്‌ട്രൈക്ക് റേറ്റ് 237.31).

2. മോസ്റ്റ് വാല്യൂബിള്‍ പ്ലെയര്‍ - 15 ലക്ഷം രൂപ 
   436.5 പോയിന്റുകളോടെ മത്സര സ്വാധീനത്തിനുള്ള ഏറ്റവും വലിയ അവാര്‍ഡ്. മറ്റ് മത്സരാര്‍ത്ഥികളെ വലിയ ദൂരം പിന്നിലാക്കി.

3. സൂപ്പര്‍ സ്‌ട്രൈക്കര്‍ ഓഫ് ദി സീസണ്‍ - 10 ലക്ഷം രൂപ + ടാറ്റ സിയറ കാര്‍  
   237.31 സ്‌ട്രൈക്ക് റേറ്റോടെ പൂര്‍ണ്ണ സീസണില്‍ തുടര്‍ച്ചയായ ആക്രമണ ബാറ്റിങ്.

4. സൂപ്പര്‍ സിക്‌സസ് ഓഫ് ദി സീസണ്‍ - 10 ലക്ഷം രൂപ 
   72 സിക്‌സറുകള്‍. ക്രിസ് ഗെയ്ല്‍ സ്ഥാപിച്ച റെക്കോര്‍ഡ് തകര്‍ത്തു. സണ്‍റൈസേഴ്‌സ് ഹൈദരാബാദിനെതിരെ ഒരൊറ്റ ഇന്നിങ്‌സില്‍ 12 സിക്‌സറുകള്‍ (ഇന്ത്യന്‍ ബാറ്റര്‍മാരില്‍ റെക്കോര്‍ഡ്).

5. എമര്‍ജിങ് പ്ലെയര്‍ ഓഫ് ദി സീസണ്‍ - 10 ലക്ഷം രൂപ 
   'എമര്‍ജിങ്' എന്ന വിശേഷണം പോലും ചെറുതായി തോന്നിപ്പിക്കുന്ന തരത്തിലുള്ള ഡോമിനന്‍സ്.

റെക്കോര്‍ഡ് നേട്ടങ്ങള്‍

സണ്‍റൈസേഴ്‌സ് ഹൈദരാബാദിനെതിരെ 36 ബോളില്‍ സെഞ്ചുറി (ഐപിഎല്ലിലെ മൂന്നാമത്തെ ഏറ്റവും വേഗമേറിയത്).
ക്വാളിഫയര്‍ 2-ല്‍ ഗുജറാത്ത് ടൈറ്റന്‍സിനെതിരെ ഏറ്റവും വേഗത്തില്‍ 1000 ഐപിഎല്‍ റണ്‍സ് തികച്ചു.

ലേലത്തില്‍ 1.10 കോടി രൂപയ്ക്കാണ് രാജസ്ഥാന്‍ റോയല്‍സ് വൈഭവിനെ സ്വന്തമാക്കിയത്. അവാര്‍ഡുകളിലൂടെ മാത്രം അതിന്റെ പകുതിയോളം കൗമാരതാരം സ്വന്തമാക്കി.