സൗജന്യമായിരുന്ന യുപിഐ ഇടപാടിനും ഇനി കേന്ദ്രത്തിന്റെ പിടിച്ചുപറി, ബാധിക്കുക സാധാരണക്കാരനെ, ട്രംപ് കണ്ണുരുട്ടിയതോടെ മോദിയും സര്‍ക്കാരും വഴങ്ങിയോ

ന്യൂഡല്‍ഹി: ഏതാണ്ട് പൂര്‍ണമായും സൗജന്യമായി പ്രവര്‍ത്തിച്ച യുപിഐ (യുണിഫൈഡ് പേമെന്റ്‌സ് ഇന്റര്‍ഫേസ്) സംവിധാനത്തില്‍ 2026 ഒക്ടോബര്‍ 15 മുതല്‍ പ്രധാന മാറ്റം വരികയാണ്. വ്യാപാരികള്‍ക്ക് (മര്‍ച്ചന്റുകള്‍ക്ക്) നല്‍കുന്ന ചില ഇടപാടുകളില്‍ മര്‍ച്ചന്റ് ഡിസ്‌കൗണ്ട് റേറ്റ് (എംഡിആര്‍) ഏര്‍പ്പെടുത്താനാണ് കേന്ദ്ര സര്‍ക്കാര്‍ തീരുമാനം.

2,000 രൂപയ്ക്ക് മുകളിലുള്ള ഇടപാടുകള്‍ക്ക് 0.4% എംഡിആര്‍. ഉദാഹരണത്തിന് 3,000 രൂപയുടെ ഇടപാടില്‍ വ്യാപാരി 12 രൂപ നല്‍കണം. 75,000 രൂപയ്ക്കും മുകളിലുള്ള ഇടപാടുകള്‍ക്ക് പരമാവധി 300 രൂപ ക്യാപ്. വ്യക്തികള്‍ക്ക് പണം അയക്കുന്നത് സൗജന്യമായി തുടരും.

റെയില്‍വേ, ടെലികോം, ഇന്‍ഷുറന്‍സ്, ഇന്ധനം, കാര്‍ഷിക ഇന്‍പുട്ടുകള്‍ തുടങ്ങിയവയ്ക്ക് 2,000 രൂപയ്ക്ക് മുകളിലുള്ള ഇടപാടുകള്‍ക്ക് 5 രൂപ നല്‍കണം. വ്യാപാരി എംഡിആര്‍ നല്‍കുകയും അത് ഉപഭോക്താവിലേക്ക് കൈമാറരുതെന്നുമാണ് നിര്‍ദ്ദേശമെങ്കിലും സേവനത്തിന്റെ വില കൂടുമെന്നുറപ്പാണ്.

വ്യാപാരികള്‍ ചെലവ് വിലയില്‍ ഉള്‍പ്പെടുത്തി ചരക്ക് വില ഉയര്‍ത്തിയേക്കും. ക്രെഡിറ്റ് കാര്‍ഡ് എംഡിആറില്‍ (1.53%) ഇത് സംഭവിക്കാറുണ്ട്. ചിലര്‍ ക്യാഷ് പ്രോത്സാഹിപ്പിച്ചേക്കാനും സാധ്യതയുണ്ട്.

ലോക്കല്‍ സര്‍ക്കിളുകള്‍ പോലുള്ള സര്‍വേകളില്‍, 3,000 രൂപയ്ക്ക് മുകളില്‍ ഫീസ് വന്നാല്‍ പലരും യുപിഐ ഒഴിവാക്കുമെന്ന് പറഞ്ഞിരുന്നു. എന്നാല്‍ ഔദ്യോഗിക നയം ഉപഭോക്താവിനെ സംരക്ഷിക്കുന്നതിനാല്‍ ഇത് പരിമിതമായിരിക്കും.

കോണ്‍ഗ്രസ് നേതാവ് രാഹുല്‍ ഗാന്ധി ഉള്‍പ്പെടെയുള്ളവര്‍ ആരോപിച്ചത്: അമേരിക്കന്‍ പേമെന്റ് കമ്പനികള്‍ (വിസ, മാസ്റ്റര്‍കാര്‍ഡ്) ഇന്ത്യയുടെ സീറോ-എംഡിആര്‍ നയത്തെ എതിര്‍ത്തിരുന്നു. യുഎസ് ട്രേഡ് റെപ്രസന്റേറ്റീവിന്റെ 2026 നാഷണല്‍ ട്രേഡ് എസ്റ്റിമേറ്റ് റിപ്പോര്‍ട്ടില്‍ ഇന്ത്യയുടെ യുപിഐ, റുപേ നയങ്ങള്‍ വിദേശ കമ്പനികള്‍ക്ക് അനുകൂലമല്ലെന്നും ആഭ്യന്തര സംവിധാനത്തെ പ്രോത്സാഹിപ്പിക്കുന്നുവെന്നും വിമര്‍ശനമുണ്ട്. അതുകൊണ്ടുതന്നെ അമേരിക്കന്‍ പ്രസിഡന്റ് ട്രംപിനെ സന്തോഷിപ്പിക്കാന്‍ നരേന്ദ്ര മോദി സര്‍ക്കാര്‍ യുപിഎ ഇടപാടുകള്‍ക്ക് കമ്മീഷന്‍ ഏര്‍പ്പെടുത്തുകയായിരുന്നു എന്നാണ് ആരോപണം.

യുപിഐ ഇന്ത്യയുടെ ഡിജിറ്റല്‍ വിജയഗാഥയാണ്. ഇപ്പോഴത്തെ മാറ്റം വ്യാപാരികളെ കാഷിലേക്ക് മാറാന്‍ പ്രേരിപ്പിക്കും. മാറ്റങ്ങള്‍ നിരീക്ഷിച്ച് വ്യാപാരികള്‍ നിയമം പാലിക്കുന്നുണ്ടോ എന്ന് ഉറപ്പാക്കാന്‍ സര്‍ക്കാരിന് കഴിയുമോ എന്നത് കണ്ടറിയണം.