.jpg)
ഉത്തരകേരളത്തില്‍ തെയ്യാട്ടക്കാലത്തിന് തുടക്കമായി
ഉത്തര കേരളത്തിലെ പ്രധാന പ്രദേശങ്ങളില്‍ ഒന്നായ പയ്യന്നൂരില്‍ മമ്പലത്ത് തെക്കടവന്‍ തറവാട്ടില്‍ തെയ്യാട്ടക്കാലത്തിന് തുടക്കം കുറിച്ച് കാല്‍ച്ചിലമ്പോലികള്‍ ഉയര്‍ന്നു. കന്നിമാസത്തിലെ കൊയ്ത്ത് കഴിഞ്ഞ് എടുക്കുന്ന പുതിയ അരി തറവാട്ടില്‍ പ്രതിഷ്ഠിച്ചിരിക്കുന്ന ദേവിക്ക് നിവേദിച്ച് കൊണ്ട് തുലാം മാസം ഒന്നിന് തെക്കടവന്‍ തറവാട്ടില്‍ പുത്തരിക്കളിയാട്ടം ഇന്നും മുടങ്ങാതെ കൊണ്ടാടുകയാണ്.
കാവേലി മലയില്‍ കരിങ്കല്ലില്‍ ബന്ധനസ്ഥമായ ദേവി കൂഴൂര്‍ ശാസ്താവിന്‍റെ അധീനതയില്‍ ശക്തി സ്വരൂപിണിയായി വസിക്കുകയും പിന്നീട് തന്ത്രിമാരാല്‍ ചെമ്പ് കുടത്തില്‍ ആവാഹിച്ച് അവിടെ നിന്നും കൊണ്ട് പോവുകയും, കാസര്‍കോടിനടുത്തുള്ള കുണ്ടോറ സ്ഥലത്ത് വെച്ച് ചെമ്പ് കുടം പൊട്ടിപ്പിളര്‍ന്ന് ഉഗ്ര തേജസ്വിനിയായ ദേവി കുണ്ടോറ ശാസ്താവിന്‍റെ വലംഭാഗം നിലയുറപ്പിക്കുകയും അവിടെ നിന്നും മലനാട്ടിലേക്ക് വന്നുവെന്നുമാണ് പുരാവൃത്തം.
മലനാട്ടില്‍ എത്തിച്ചേര്‍ന്ന ദേവി പയ്യന്നൂര്‍ പെരുമാളിന്‍റെ അധീനതയില്‍ വസിക്കുകയും, പെരുമാളിന്‍റെ ഊര് ബലിക്കകത്ത്, കിഴക്ക് പെരുമ്പപ്പുഴ-തെക്ക് ചങ്കുരിച്ചാല്‍ മുതല്‍ പുന്നക്കടവ് പുഴ, പടിഞ്ഞാറ് പെരുഞ്ചൊല്ലൂരഴിമുഖം. വടക്ക് നാരങ്ങത്തോടിനകത്തുള്ള പയ്യന്നൂര്‍ പ്രദേശത്ത് തന്‍റെ പ്രജകളെ സംരക്ഷിക്കുന്നതിനുള്ള അനുവാദം നല്‍കുകയും ചെയ്തുവെന്നും, അങ്ങനെ കവ്വായി പുഴ വഴി വന്ന്
കൊറ്റിയില്‍ എത്തിച്ചേരുകയും കണ്ണങ്ങാട്ട് ഭഗവതി ക്ഷേത്രത്തിന്‍റെ കന്നി ഭാഗത്ത് കുടിയിരുക്കുകയും ചെയ്തു.
ക്ഷേത്രം നടത്തി വന്നിരുന്നത് ക്ഷേത്രാവകാശികളായ കൂത്തൂര്‍, പിലാങ്കു പുളുക്കൂല്‍, തെക്കടവന്‍ എന്നീ നാല് യാദവ സമുദായ തറവാട്ടുകാരായിരുന്നു. കുണ്ടോര്‍ ചാമുണ്ഡിയുടെ പരിപാലന അവകാശം അന്ന് തെക്കടവന്‍ തറവാട്ടുകാര്‍ക്കായിരുന്നു. അത് കൊണ്ടുതന്നെ പരിപാലിക്കുന്ന തറവാടുകളില്‍ ദേവിയെ കുടിയിരുത്തുകയും ചെയ്തു. അങ്ങനെയാണ് പയ്യന്നൂര്‍ മമ്പലത്ത് തെക്കടവന്‍ തറവാട്ടില്‍ തുലാം ഒന്നിന് പുത്തരിക്കളിയാട്ടത്തിന് കുണ്ടോറ ചാമുണ്ഡിയെ കെട്ടിയാടിക്കുന്നത്.
വേല സമുദായത്തിലെ അംഗങ്ങള്‍ക്കാണ് തെയ്യം കെട്ടിയാടാനുള്ള അധികാരം. ഈ കുടുംബത്തിനാണ് അതിനുള്ള അവകാശവും അധികാരവും. ഇളം തലമുറയില്‍പ്പെട്ട ഉണ്ണിയാണ് അഭീഷ്ട വരദായിനിയും ശക്തി സ്വരൂപിണിയുമായ കുണ്ടോര്‍ ചാമുണ്ഡേശ്വരിയുടെ കോലം കെട്ടിയാടുന്നത്.
