.jpg)
വഖഫ് പ്രതിഷേധം, തീവ്രവാദി നേതാക്കളുടെ ഫോട്ടോകള്‍ ഉയര്‍ത്തി ജമാഅത്തെ ഇസ്ലാമി, ഇവര്‍ മുസ്ലീം സമുദായത്തിനുണ്ടാക്കുന്നത് വന്‍ ഭവിഷ്യത്ത്
ജമാഅത്തെ ഇസ്ലാമി ഉയര്‍ത്തിക്കാട്ടിയ ഫോട്ടോകള്‍ സൗദി അറേബ്യയിലോ, യു.എ.യി ഉള്‍പ്പടെയുള്ള മുസ്ലിം രാജ്യങ്ങളിലോ പൊക്കിപ്പിടിച്ച് പ്രകടനം നടത്താന്‍ അവര്‍ക്ക് സാധിക്കുമോ എന്ന് അദ്ദേഹം ചോദിക്കുന്നു.
കോഴിക്കോട്: പാര്‍ലമെന്റിന്റെ ഇരു സഭകളിലും പാസാക്കിയ വഖഫ് ഭേദഗതി നിയമത്തിനെതിരെ ജമാഅത്തെ ഇസ്ലാമിയുടെ യുവജന വിഭാഗമായ 'സോളിഡാരിറ്റി'യും വിദ്യാര്‍ത്ഥി സംഘടനയായ 'എസ്.ഐ.ഒ'യും വഖഫ് ബില്ലുമായി ബന്ധപ്പെട്ട് നടത്തിയ കരിപ്പൂര്‍ എയര്‍പോര്‍ട്ട് മാര്‍ച്ചില്‍ തീവ്ര മുസ്ലീം സംഘടനാ നേതാക്കളുടെ ചിത്രങ്ങള്‍ ഉയര്‍ത്തിയതിനെ വിമര്‍ശിച്ച് കെടി ജലീല്‍ എംഎല്‍എ. ജമാഅത്തെ ഇസ്ലാമി ഉയര്‍ത്തിക്കാട്ടിയ ഫോട്ടോകള്‍ സൗദി അറേബ്യയിലോ, യു.എ.ഇ ഉള്‍പ്പടെയുള്ള മുസ്ലിം രാജ്യങ്ങളിലോ പൊക്കിപ്പിടിച്ച് പ്രകടനം നടത്താന്‍ അവര്‍ക്ക് സാധിക്കുമോ എന്ന് അദ്ദേഹം ചോദിക്കുന്നു.
കെടി ജലീലിന്റെ ഫേസ്ബുക്ക് പോസ്റ്റ്,
വഖഫ് സമരവും മുസ്ലിം ബ്രദര്‍ഹുഡ്ഢും തമ്മില്‍ എന്തു ബന്ധം?
ജമാഅത്തെ ഇസ്ലാമിയുടെ യുവജന വിഭാഗമായ 'സോളിഡാരിറ്റി'യും വിദ്യാര്‍ത്ഥി സംഘടനയായ 'എസ്.ഐ.ഒ'യും വഖഫ് ബില്ലുമായി ബന്ധപ്പെട്ട് നടത്തിയ കരിപ്പൂര്‍ എയര്‍പോര്‍ട്ട് മാര്‍ച്ച് വലിയൊരു വിവാദത്തിനാണ് തിരികൊളുത്തിയിരിക്കുന്നത്. ഇന്ത്യന്‍ പാര്‍ലമെന്റിന്റെ ഇരുസഭകളും പാസ്സാക്കിയ വഖഫ് ഭേദഗതി നിയമത്തിനെതിരായ സമരത്തില്‍, സയ്യിദ് ഖുതുബ്, ഹസനുല്‍ ബന്ന, തുടങ്ങിയ മുസ്ലിം ബ്രദര്‍ഹുഡ് നേതാക്കള്‍ അടക്കം, രാജ്യത്തിന് പുറത്തുള്ള തീവ്ര മതരാഷ്ട്ര വാദികളുടെ ഫോട്ടോ ഉയര്‍ത്തിക്കാട്ടിയതിന്റെ സാംഗത്യം എത്ര ആലോചിച്ചിട്ടും മനസ്സിലാവുന്നില്ല. ജമാഅത്തെ ഇസ്ലാമി ഉയര്‍ത്തിക്കാട്ടിയ ഫോട്ടോകള്‍ സൗദി അറേബ്യയിലോ, യു.എ.യി ഉള്‍പ്പടെയുള്ള മുസ്ലിം രാജ്യങ്ങളിലോ പൊക്കിപ്പിടിച്ച് പ്രകടനം നടത്താന്‍ അവര്‍ക്ക് സാധിക്കുമോ? ഭൂരിഭാഗം മുസ്ലിം രാജ്യങ്ങളിലും, സയ്യിദ് ഖുതുബും, ഹസനുല്‍ ബന്നയും ചേര്‍ന്ന് രൂപീകരിച്ച 'മുസ്ലിം ബ്രദര്‍ഹുഡ്ഢ്' നിരോധിത സംഘടനയാണ്. ഖുതുബും, ബന്നയും ഉയര്‍ത്തിപ്പിച്ച മതരാഷ്ട്ര ആശയത്തോട് അവിടങ്ങളിലെ മുസ്ലിം സമൂഹത്തിനോ ഭരണകര്‍ത്താക്കള്‍ക്കോ യാതൊരു യോജിപ്പുമില്ല.
ഇന്ത്യയില്‍ രാഷ്ട്രീയ ഇസ്ലാമിന്റെ പിതൃത്വം ഏറ്റെടുത്ത ഒരേയൊരു സംഘടനയേ ഉള്ളൂ. അത് ജമാഅത്തെ ഇസ്ലാമിയാണ്. അതിന്റെ സൂത്രധാരന്‍ മൗലാനാ മൗദൂദിയും. അധികാരത്തിലെത്താനും അതുവഴി ആത്യന്തികമായി മതരാഷ്ട്രം സ്ഥാപിക്കാനുമാണ് മതസംഘടന എന്നവകാശപ്പെടുന്ന ജമാഅത്തെ ഇസ്ലാമി സ്വന്തമായി ഒരു രാഷ്ട്രീയ പാര്‍ട്ടിക്ക് രൂപം നല്‍കിയത്. 'വെല്‍ഫെയര്‍ പാര്‍ട്ടി' എന്ന പാലത്തിലൂടെ യു.ഡി.എഫില്‍ കടന്നുകൂടാനാണ് അവരുടെ ശ്രമം. കുറുക്കു വഴിയിലൂടെ അധികാരത്തിലെത്തി പതിയെപ്പതിയെ മൗദൂദിയന്‍ മതസങ്കല്‍പ്പങ്ങള്‍ നടപ്പിലാക്കാനാകും എന്നാണ് ജമാഅത്തെ ഇസ്ലാമിയുടെ 'സ്വപ്നം'. അതു തിരിച്ചറിയാന്‍ കേരളത്തിലെ കോണ്‍ഗ്രസ്സ് നേതാക്കള്‍ക്ക് സാധിച്ചിട്ടില്ലെങ്കിലും രാഹുല്‍ ഗാന്ധിക്ക് കഴിഞ്ഞിട്ടുണ്ട്. അതദ്ദേഹം ലണ്ടനില്‍ വെച്ചാണ് പറഞ്ഞതെന്ന് മാത്രം. ഇന്ത്യയില്‍ മതതാല്‍പര്യം സാക്ഷാത്കരിക്കാന്‍ സ്വന്തം രാഷ്ട്രീയ പാര്‍ട്ടി രൂപീകരിക്കുകയും മല്‍സരിരിക്കുകയും ചെയ്യുന്ന ഏക മുസ്ലിം മതസംഘടനയാണ് ജമാഅത്തെ ഇസ്ലാമി. ഇതു ശരിയാംവിധം മനസ്സിലാക്കിയത് ഇടതുപക്ഷവും കമ്മ്യൂണിസ്റ്റ് പാര്‍ട്ടികളുമാണ്. അതുകൊണ്ടാണ് ജമാഅത്തെ ഇസ്ലാമിയും അവരുടെ ഉടമസ്ഥതയില്‍ പ്രവര്‍ത്തിക്കുന്ന മാധ്യമവും മീഡിയാ വണ്ണും അതിശക്തമായി സി.പി.ഐ.എമ്മിനെയും അതിന്റെ നേതാക്കളെയും ഭല്‍സിക്കാന്‍ ശ്രമിക്കുന്നത്.
വഖഫ് ഭേദഗതി നിയമത്തിനെതിരെ പാര്‍ലമെന്റില്‍ സംസാരിച്ച നേതാക്കളില്‍ മഹാഭൂരിഭാഗവും മുസ്ലിം സമുദായത്തിന് പുറത്തുള്ളവരാണ്. കപില്‍ സിബിലിന്റെയും, ജോണ്‍ ബ്രിട്ടാസിന്റെയും, കെ.സി വേണുഗോപാലിന്റെയും, കെ. രാധാകൃഷ്ണന്റെയും, ഹൈബി ഈഡന്റയും പ്രസംഗങ്ങള്‍ നാം കേട്ടതാണ്. ഇത്തരമൊരു സാഹചര്യത്തില്‍ ജമാഅത്തെ ഇസ്ലാമിയും അവരുടെ പോഷക സംഘടനകളും കാട്ടിയ 'പോക്കിരിത്തരം' മതേതതര സംഘടനകളെയും അവയുടെ നേതാക്കളെയും കുറച്ചൊന്നുമല്ല പ്രയാസപ്പെടുത്തുക. മാധ്യമം ഓഫീസിലും മീഡിയാ വണ്‍ ചാനല്‍റൂമിലും മാത്രം കാണുന്ന വിരലിലെണ്ണാവുന്ന 'വികൃതന്‍'മാര്‍, മുസ്ലിം സമുദായത്തിന് ഉണ്ടാകുന്ന ഭവിഷ്യത്തും ചെറുതല്ല. ഇതര മതസംഘടനകള്‍ ജമാഅത്തെ ഇസ്ലാമിയുടെ തീവ്രമത ബോധത്തെ വിമര്‍ശിക്കാനും മൗദൂദി-ഖുതുബ് കൂട്ടുകെട്ടിനെ തുറന്നു കാണിക്കാനും ഒട്ടും അമാന്തം കാട്ടിക്കൂട. മുസ്ലിംലീഗ് ഒരേ സമയം വേട്ടക്കാരനെയും ഇരയേയും (തീവ്രന്‍മാരായ ജമാഅത്തെ ഇസ്ലാമിയേയും മിതവാദ മുസ്ലിം സംഘടനകളെയും) രണ്ടു കൈ വെളളകളില്‍ പൊക്കിപ്പിടിച്ച് നടക്കുന്നത് അങ്ങേയറ്റം കാപട്യമാണ്. പ്രവാചകന്‍ പരിചയപ്പെടുത്താത്ത അതിതീവ്ര വിശ്വാസത്തെ ജനമനസ്സുകളില്‍ കുത്തിവെക്കാന്‍ ജമാഅത്തെ ഇസ്ലാമിയെ അനുവദിച്ചാല്‍ അതിന്റെ പ്രത്യാഘാതം വളരെ വലുതാകും. മുസ്ലിം ബ്രദര്‍ഹുഡ്ഡുമായുള്ള ബന്ധം ആരോപിച്ച് ഇന്ത്യയില്‍ നടക്കാന്‍ പോകുന്ന എല്ലാ വഖഫ് വിരുദ്ധ സമരങ്ങളയും അടിച്ചൊതുക്കാന്‍ അമിത്ഷാക്ക് കൊടുത്ത വടിയാണ്, സോളിഡാരിറ്റിയുടെ കരിപ്പൂര്‍ എയര്‍പോര്‍ട്ട് മാര്‍ച്ചെന്ന് പറയാതിരിക്കാന്‍ നിര്‍വ്വാഹമില്ല.
