.jpg)
പന്ത്രണ്ടുകാരി 25 കാരനൊപ്പം പോകുന്ന ഇന്സ്റ്റഗ്രാം ലോകം, അധ്യാപകര് ഉപദേശിച്ചാല് തൊട്ടടുത്ത ദിവസം രക്ഷിതാക്കള് സ്കൂളിലെത്തി വിരട്ടും, ആരാണ് പുതു തലമുറയ്ക്ക് വഴികാട്ടുക
സോഷ്യല് മീഡിയയിലൂടെ പരിചയത്തിലാകുന്നവര്ക്കൊപ്പം നാടുവിടുന്ന ഇവരെ കണ്ടെത്തുകയെന്നത് കേരള പോലീസിന്റെ പ്രധാന ജോലികളിലൊന്നായി മാറിയിട്ടുണ്ട്.
കൊച്ചി: കേരളത്തില് ഓരോ ദിവസവുമെന്നോണമാണ് കുട്ടികളെ കാണാതാകുന്ന സംഭവം റിപ്പോര്ട്ട് ചെയ്യുന്നത്. സോഷ്യല് മീഡിയയിലൂടെ പരിചയത്തിലാകുന്നവര്ക്കൊപ്പം നാടുവിടുന്ന ഇവരെ കണ്ടെത്തുകയെന്നത് കേരള പോലീസിന്റെ പ്രധാന ജോലികളിലൊന്നായി മാറിയിട്ടുണ്ട്.
കഴിഞ്ഞ ദിവസം 12 വയസ്സുള്ള ഒരു പെണ്കുട്ടി 25 വയസ്സുള്ള ഒരു യുവാവിനൊപ്പം നാടുവിട്ട സംഭവം ഏവരേയും അമ്പരപ്പിക്കുന്നതാണ്. ഇന്സ്റ്റഗ്രാമിലൂടെ പരിചയപ്പെട്ടയാള്ക്കൊപ്പം പോയ കുട്ടിയെ കണ്ടെത്തിയത് പൂനെയില് നിന്നാണ്. ഇത് ഒറ്റപ്പെട്ട സംഭവമല്ല. കുട്ടികളെ സോഷ്യല് മീഡിയയിലൂടെ വലവീശി പിടിക്കുന്ന സംഭവങ്ങള് വര്ദ്ധിച്ചുവരികയാണ്. മൊബൈല് ഫോണ് കൈയിലെത്തിയതോടെ കുട്ടികളുടെ ലോകം മാറി. അതോടൊപ്പം അപകടങ്ങളും വര്ധിച്ചു.
ഇന്സ്റ്റഗ്രാം, വാട്ട്സ്ആപ്പ്, ഫേസ്ബുക്ക് തുടങ്ങിയ പ്ലാറ്റ്ഫോമുകളില് കുട്ടികള് ഏറെ സമയം ചെലവഴിക്കുന്നു. അപരിചിതരുമായി ചാറ്റ് ചെയ്യുക, ഫോളോ ചെയ്യുക, ഡിഎം അയയ്ക്കുക ഇതെല്ലാം സാധാരണമായി. കുട്ടികളെ ലക്ഷ്യമിട്ട് എത്തുന്നവര് അനായാസമായാണ് ഇവരെ വലയിലാക്കുന്നത്. 12 വയസ്സുള്ള കുട്ടിയും 25 വയസ്സുള്ളയാളും തമ്മിലുള്ള ബന്ധം ഇതിന്റെ ഉദാഹരണമാണ്. പ്രായഭേദം, നിയമപരമായ പ്രശ്നങ്ങള്, സുരക്ഷാ ഭീഷണി ഇവയൊക്കെ മറച്ചുവെച്ചാണ് ഇത്തരം ബന്ധങ്ങള് രൂപപ്പെടുന്നത്.
വിവേചനശേഷി പൂര്ണമായി വികസിച്ചിട്ടില്ലാത്തെ കുട്ടികളെ തെറ്റിദ്ധരിപ്പിച്ച് ലൈംഗിക ചൂഷണത്തിന് ഇരയാക്കുകയാണ് ഇവരുടെ പ്രധാന ലക്ഷ്യം. വേട്ടക്കാരെ തിരിച്ചറിയാന് കുട്ടികള്ക്ക് സാധിക്കുന്നില്ല.
സോഷ്യല് മീഡിയ അമിതമായ ഉപയോഗം കുട്ടികളെ ശാരീരികമായും മാനസികമായും ബാധിക്കുന്നുണ്ട്. ഉറക്കക്കുറവ്, ഏകാഗ്രതക്കുറവ്, പഠനത്തിലെ താത്പര്യമില്ലായ്മ, ഉത്കണ്ഠ, വിഷാദം ഇവ ഇവര്ക്കിടയില് സാധാരണമാണ്. സ്ക്രീന് സമയം കൂടുന്നതോടെ യഥാര്ത്ഥ സുഹൃത്തുക്കളുമായുള്ള ഇടപഴകല് കുറയുന്നു. ലോകം ഫില്ട്ടറുകളിലൂടെയും റീല്സുകളിലൂടെയും മാത്രം കാണാന് തുടങ്ങുന്നു.
ഇതിലും അപകടകരമായത് ലഹരിക്ക് അടിമയാക്കലാണ്. സോഷ്യല് മീഡിയയിലൂടെ ലഹരി വസ്തുക്കളെക്കുറിച്ചുള്ള പ്രചാരണം, ട്രെന്ഡി ആയി ചിത്രീകരിക്കല് തുടങ്ങിയവ കുട്ടികളെ ലഹരിയിലേക്ക് വലിച്ചിഴയ്ക്കുന്നു.
കുട്ടികളെ നിയന്ത്രിക്കുന്നതിലും നേര്വഴി കാട്ടുന്നതിലും രക്ഷിതാക്കള്ക്ക് സംഭവിക്കുന്ന പിഴവാണ് പ്രധാന കാരണം. തുടക്കംമുതല് കുട്ടികള്ക്ക് നിയന്ത്രണില്ലാതെ സ്ക്രീന് ടൈം അനുവദിക്കുന്നതോടെ പിന്നീട് അവരെ നിയന്ത്രിക്കാനാകുന്നില്ല.
കുട്ടികളെ ഉപദേശിക്കാന് അധ്യാപകര്ക്കുപോലും സാധിക്കാത്ത സാഹചര്യമാണ് ഇപ്പോള് നിലവിലുള്ളത്. ഉപദേശിക്കുന്ന അധ്യാപകരെ ചെറിയ കുട്ടികള് പോലും പരിഹസിക്കുന്നു. രക്ഷിതാക്കളെ സ്കൂളിലെത്തിച്ച് അധ്യാപകരോട് കയര്ക്കുന്നതും പതിവാണ്.
കുട്ടികളുടെ മൊബൈല് ഉപയോഗം രക്ഷിതാക്കള് നിരീക്ഷിക്കണം. ഇതിനായി പാരന്റല് കണ്ട്രോള് ആപ്പുകള് ഉപയോഗിക്കുക. സ്ക്രീന് സമയം നിശ്ചയിക്കുക. ഉറക്കസമയത്തിന് മുമ്പ് ഫോണ് മാറ്റിവയ്ക്കുക. ആരോടൊക്കെ ചാറ്റ് ചെയ്യുന്നു എന്നത് പരിശോധിക്കുക. ഭയപ്പെടുത്താതെ സംസാരിക്കുക. അപരിചിതരുമായുള്ള അടുപ്പം തടയുക. വ്യക്തിഗത വിവരങ്ങള് പങ്കുവയ്ക്കരുത് എന്ന് ആവര്ത്തിച്ച് പറയുക.
സ്കൂളുകളുടെയും സമൂഹത്തിന്റെയും പങ്ക് ഇക്കാര്യത്തില് വളരെ വലുതാണ്. ഡിജിറ്റല് സാക്ഷരത ക്ലാസുകള് നിര്ബന്ധമാക്കുക. ഓണ്ലൈന് സുരക്ഷ, സൈബര് ബുള്ളിങ്, ഗ്രൂമിങ് തുടങ്ങിയ വിഷയങ്ങള് പഠിപ്പിക്കുക. മാതാപിതാക്കള്ക്ക് അവബോധ ക്ലാസുകള് നടത്തുക. സ്കൂളില് മൊബൈല് ഉപയോഗ നയം കര്ശനമാക്കുക. പല രാജ്യങ്ങളിലും ഇതിനകം തന്നെ സോഷ്യല് മീഡിയ പ്രായപരിധി കര്ശനമായി നടപ്പാക്കിക്കഴിഞ്ഞു.
സോഷ്യല് മീഡിയ ഒരു ഉപകരണമാണ്. ശരിയായി ഉപയോഗിച്ചാല് അറിവും ബന്ധങ്ങളും നല്കും. തെറ്റായി ഉപയോഗിച്ചാല് ജീവിതം തന്നെ തകര്ക്കും. കുട്ടികള് നാടുവിടുന്ന സംഭവങ്ങള് ഒരു മുന്നറിയിപ്പാണ്. മാതാപിതാക്കളും അധ്യാപകരും സമൂഹവും ഒരുമിച്ച് ജാഗ്രത പുലര്ത്തണം. കുട്ടികളുടെ ഡിജിറ്റല് ലോകം സുരക്ഷിതമാക്കുക എന്നത് നമ്മുടെ പൊതുവായ ഉത്തരവാദിത്തമാണ്.