ഏഷ്യന്‍ ഗെയിംസില്‍ രണ്ടു കളികളില്‍ വെറും 9 റണ്‍സ് മാത്രം നേടിയ സഞ്ജുവിന് കിട്ടും 50 ലക്ഷം രൂപ പാരിതോഷികം, ആന്‍സിക്കും ശ്രീശങ്കറിനും വിദര്‍ശയ്ക്കും കേരള സര്‍ക്കാര്‍ നല്‍കുക 30 ലക്ഷം രൂപ വീതം

കൊച്ചി: ജപ്പാനിലെ നഗോയയില്‍ നടന്ന ഏഷ്യന്‍ ഗെയിംസില്‍ സ്വര്‍ണം നേടിയ ഏക മലയാളിയായി ക്രിക്കറ്റ് താരം സഞ്ജു സാംസണ്‍. ടി20 ക്രിക്കറ്റ് ഫൈനലില്‍ പാകിസ്ഥാനെ തോല്‍പ്പിച്ച് സ്വര്‍ണം നേടിയ ടീമിലെ വിക്കറ്റ് കീപ്പറാണ് സഞ്ജു.

ഏഷ്യന്‍ ഗെയിംസില്‍ മെഡല്‍ നേടുന്ന കേരള താരങ്ങള്‍ക്ക് സര്‍ക്കാര്‍ നേരത്തെതന്നെ പാരിതോഷികം പ്രഖ്യാപിച്ചിരുന്നു. സ്വര്‍ണത്തിന് 50 ലക്ഷം രൂപ, വെള്ളിക്ക് 30 ലക്ഷം രൂപ, വെങ്കലത്തിന് 20 ലക്ഷം രൂപ. പങ്കെടുക്കുന്ന എല്ലാ കായികതാരങ്ങള്‍ക്കും ഒരു ലക്ഷം മുന്‍കൂറായും നല്‍കി. പരിശീലകര്‍ക്കും പ്രത്യേക തുകയുണ്ട്. മുന്‍കാലങ്ങളിലെ കാലതാമസം ഒഴിവാക്കാനാണ് മുന്‍കൂട്ടി പ്രഖ്യാപിച്ചത്.

സ്വര്‍ണ ജേതാവായതോടെ സഞ്ജു സാംസണ്‍ സര്‍ക്കാര്‍ പ്രഖ്യാപിച്ച 50 ലക്ഷം രൂപ പാരിതോഷികത്തിന് അര്‍ഹനായി. എന്നാല്‍, ഗെയിംസിലെ സഞ്ജുവിന്റെ ബാറ്റിങ് പ്രകടനം മോശമായിരുന്നു. രണ്ട് കളികളിലായി ആകെ നേടിയത് 9 റണ്‍സ് മാത്രം. ഫൈനലില്‍ പാകിസ്ഥാനെതിരെ നാല് പന്തില്‍ രണ്ട് റണ്‍സ് മാത്രമെടുത്ത് പുറത്തായി. ശ്രീലങ്കയ്‌ക്കെതിരെ 7 റണ്‍സ് മാത്രമാണെടുത്തത്.

വ്യക്തിഗത ഇനങ്ങളില്‍ ഗംഭീര പ്രകടനം നടത്തി വെള്ളി മെഡല്‍ നേടിയ ആന്‍സി സോജന്‍, എം. ശ്രീശങ്കര്‍, വിദര്‍ശ കെ. വിനോദ് എന്നിവര്‍ക്ക് 30 ലക്ഷം രൂപയാണ് പാരിതോഷികമായി ലഭിക്കുക. സെയിലിങ്ങില്‍ പ്രിന്‍സ് കെ നോബിളും മനു ഫ്രാന്‍സിസും വെള്ളി നേടിയിരുന്നു. റിലേയില്‍ വിശാല്‍ ടികെയും മനു ടിഎസ്സും വെള്ളി മെഡല്‍ നേടി.

ഫൈനലില്‍ പാകിസ്ഥാനെതിരെ സഞ്ജു നേരത്തെ പുറത്തായെങ്കിലും മറ്റു ബാറ്റര്‍മാരുടെ മികവില്‍ ഇന്ത്യ 211/6 എന്ന സ്‌കോര്‍ നേടി. 19 റണ്‍സിന് പാകിസ്ഥാനെ തോല്‍പ്പിച്ച് സ്വര്‍ണം നേടുകയും ചെയ്തു. അഭിഷേക് ശര്‍മ്മയുടെ 61-ഉം തിലക് വര്‍മ്മയുടെ 51-ഉം നിര്‍ണായകമായി.