.jpg)
ആര്ടിഒ ഓഫീസില് ഏജന്റില്ലാതെ ഒന്നും നടക്കില്ല, കൈക്കൂലിയുടെ ഒഴുക്ക്, ദിവസവും പതിനായിരത്തോളം കീശയിലെത്തും, ഷൗക്കത്തിന്റെ ആത്മഹത്യ സര്ക്കാര് സിസ്റ്റത്തിന്റെ നഗ്നമായ മുഖം തുറന്നുകാട്ടുന്നു
ആര്ടിഒ ഓഫീസുകളില് ഏജന്റുമാരില്ലാതെ ഒന്നും നടക്കില്ല എന്നതാണ് യാഥാര്ത്ഥ്യം. ഓരോ ദിവസവും പതിനായിരക്കണക്കിന് രൂപ കൈക്കൂലിയായി ഒഴുകുന്നു.
കൊച്ചി: സംസ്ഥാന സര്ക്കാര് ഓഫീസുകളിലെ കൈക്കൂലിയുടെ ഒഴുക്കില് മുന്നില് നില്ക്കുന്നത് ആര്ടിഒ ഓഫീസുകളാണെന്ന് വ്യക്തമാക്കുന്നതാണ് മലപ്പുറം കിഴിശ്ശേരി മുണ്ടംപറമ്പ് സ്വദേശി ഷൗക്കത്തലിയുടെ ആത്മഹത്യ. സര്ക്കാര് സിസ്റ്റം എത്രമാത്രം കുത്തഴിഞ്ഞതാണ് സംഭവം തുറന്നുകാട്ടുന്നു.
കേരളത്തിലെ മോട്ടോര് വാഹന വകുപ്പ് (എംവിഡി) ഉള്പ്പെടെയുള്ള സര്ക്കാര് സംവിധാനത്തിന്റെ അഴിമതി, ഏജന്റ് മാഫിയ, വിജിലന്സിന്റെ നിഷ്ക്രിയത്വം എന്നിവ സാധാരണക്കാരന്റെ ജീവിതം ദുരിതമയമാക്കുന്നു. ഓട്ടോറിക്ഷയുടെ ഫിറ്റ്നസ് സര്ട്ടിഫിക്കറ്റ് ലഭിക്കാത്തതിനാല് ഉപജീവനമാര്ഗം നഷ്ടപ്പെട്ട്, ഇഎംഐകള് മുടങ്ങി, സിബില് സ്കോര് താഴ്ന്ന്, ഒടുവില് ജീവനൊടുക്കേണ്ടിവന്ന യുവാവിന്റെ കഥ ഓരോ സാധാരണക്കാരന്റെയും ഭീതിയാണ്.
ഷൗക്കത്ത് ഫേസ്ബുക്കില് ഇക്കാര്യം തുറന്നെഴുതിയിട്ടുണ്ട്. ഏകദേശം 10 മാസമായി അദ്ദേഹം കൊണ്ടോട്ടി സബ് ആര്ടിഒ ഓഫീസില് അലഞ്ഞു. നേരിട്ട് സമീപിച്ചപ്പോള് വാഹനത്തിലെ സ്റ്റീല് വര്ക്ക് പോലുള്ള കാരണങ്ങള് പറഞ്ഞ് നിരന്തരം നിഷേധിച്ചു. അതേ വാഹനത്തിന് മുമ്പ് രണ്ടുതവണ ഫിറ്റ്നസ് നല്കിയത് ഇതേ വകുപ്പ് തന്നെയായിരുന്നു. ഏജന്റ് വഴി പോയാല് 2000-4000 രൂപ കൊടുത്താല് എളുപ്പത്തില് കിട്ടും. നേരിട്ട് പോയാല് മാസങ്ങളോളം കഷ്ടപ്പെടും. ഇതാണ് യാഥാര്ത്ഥ്യം.
ആര്ടിഒ ഓഫീസുകളില് ഏജന്റുമാരില്ലാതെ ഒന്നും നടക്കില്ല എന്നതാണ് യാഥാര്ത്ഥ്യം. ഓരോ ദിവസവും പതിനായിരക്കണക്കിന് രൂപ കൈക്കൂലിയായി ഒഴുകുന്നു. ഫിറ്റ്നസ്, ലൈസന്സ്, പെര്മിറ്റ്, രജിസ്ട്രേഷന് എല്ലാത്തിലും ഈ ഇടനിലക്കാരുടെ പിടിയിലാണ് സാധാരണക്കാര്. വിജിലന്സ് വകുപ്പ് ഇതൊക്കെ കണ്ടില്ലെന്ന് നടിക്കുന്നു. മുമ്പ് റെയ്ഡുകള് നടത്തി ഡസന് കണക്കിന് ഉദ്യോഗസ്ഥര്ക്കെതിരെ കേസെടുത്തിട്ടുണ്ടെങ്കിലും, സിസ്റ്റം അതേപടി തുടരുന്നു. ക്യാമറകള് പ്രവര്ത്തിക്കാതിരിക്കുക, പരിശോധനകള് ഉപരിപ്ലവമാക്കുക, യുപിഐ വഴി പണം ഒഴുക്കുക ഇതെല്ലാം പരസ്യമായ രഹസ്യങ്ങളാണ്.
സര്ക്കാര് ഇപ്പോള് അന്വേഷണം പ്രഖ്യാപിച്ചിട്ടുണ്ട്. ഗതാഗത സെക്രട്ടറി ടിവി അനുപമയെ ഇതിനായി നിയോഗിച്ചു. എന്നാല്, അന്വേഷണങ്ങള് പലപ്പോഴും രൂപമാറ്റം കാരണം നിരസിച്ചു എന്ന് പറഞ്ഞ് ഉദ്യോഗസ്ഥര്ക്ക് ക്ലീന് ചിറ്റ് നല്കുന്നതിലേക്കാണ് എത്തുന്നത്. യഥാര്ത്ഥ പ്രശ്നമായ ഏജന്റ് സംവിധാനവും കൈക്കൂലിയും അവഗണിക്കപ്പെടുന്നു.
ഇത് ഷൗക്കത്തിന്റെ കഥ മാത്രമല്ല. കേരളത്തിലെ ലക്ഷക്കണക്കിന് ഓട്ടോ ഡ്രൈവര്മാരും ചെറുകിട വാഹന ഉടമകളും ഈ അഴിമതിയുടെ ഇരകളാണ്. ഫിറ്റ്നസ് ഇല്ലാതെ വാഹനം ഓടിച്ചാല് പിഴയും പിടുത്തവും. ഫിറ്റ്നസ് ലഭിക്കാന് കൈക്കൂലി. കൈക്കൂലി കൊടുക്കാന് പണമില്ലെങ്കില് ജീവിതം തകരും.
സര്ക്കാര് സിസ്റ്റത്തിന്റെ പരാജയമാണിത്. ഡിജിറ്റല് സേവനങ്ങള്, ഓണ്ലൈന് അപേക്ഷകള്, സിസിടിവി നിരീക്ഷണം ഇതൊക്കെ പ്രഖ്യാപിച്ചിട്ടും ഗ്രൗണ്ട് ലെവലില് ഏജന്റുമാരുടെ ആധിപത്യം തുടരുന്നു. വിജിലന്സ് കേവലം പേരിന് മാത്രം. രാഷ്ട്രീയ ഇടപെടലുകളും ഉദ്യോഗസ്ഥ താല്പ്പര്യങ്ങളും ഇതിനെ സംരക്ഷിക്കുന്നു.
ഇനിയും അന്വേഷണങ്ങള് ഉപരിപ്ലവമായി അവസാനിച്ചാല്, കൂടുതല് യുവാക്കള് ഈ സിസ്റ്റത്തിന്റെ ഇരകളാകും. ഏജന്റ് സംവിധാനം പൂര്ണമായി നിര്ത്തലാക്കുക, കൈക്കൂലി ഇല്ലാതെ നേരിട്ട് സേവനം ലഭ്യമാക്കുക, വിജിലന്സിനെ യഥാര്ത്ഥത്തില് പ്രവര്ത്തിപ്പിക്കുക ഇതാണ് ആവശ്യം. അല്ലെങ്കില്, സര്ക്കാര് സിസ്റ്റം തന്നെ ജനങ്ങളുടെ ജീവന് തകര്ക്കുന്ന ഒരു യന്ത്രമായി തുടരും.