തോല്‍വി അറിയാതെ 7 കളികള്‍, പിന്നെ തുടര്‍ച്ചയായ അഞ്ച് തോല്‍വി, പഞ്ചാബ് ടീം ഉടമ പ്രീതി സിന്റയ്ക്കു മുന്നില്‍ തലകുനിച്ച് റിക്കി പോണ്ടിങ്

ധര്‍മ്മശാല: ഐപിഎല്‍ 2026 സീസണില്‍ പഞ്ചാബ് കിങ്‌സിന്റെ തുടര്‍തോല്‍വിയില്‍ നിരാശരായി ആരാധകര്‍. കഴിഞ്ഞദിവസം നടന്ന മത്സരത്തില്‍ മുംബൈ ഇന്ത്യന്‍സിനോട് 6 വിക്കറ്റിന് തോറ്റതോടെ ടീം തുടര്‍ച്ചയായ അഞ്ചാമത്തെ തോല്‍വി ഏറ്റുവാങ്ങി.

മത്സരത്തിനു ശേഷം ടീം ഉടമ പ്രീതി സിന്റയും ഹെഡ് കോച്ച് റിക്കി പോണ്ടിങ്ങും തമ്മില്‍ തീവ്രവും ഗൗരവമേറിയതുമായ ചര്‍ച്ചയുടെ ചിത്രങ്ങള്‍ ഇപ്പോള്‍ വൈറലാണ്. പോണ്ടിങ് തലതാഴ്ത്തി നിന്നുകൊണ്ടാണ് പ്രീതി സിന്റയോട് സംസാരിക്കുന്നത്. മത്സരത്തിന്റെ പോസ്റ്റ് മാച്ച് സീനുകളില്‍ രണ്ട് പേരുടെയും മുഖത്ത് നിരാശ പ്രകടമായിരുന്നു. ടീമിന്റെ മോശം ഫോമും പ്ലേ ഓഫ് സാധ്യതകളുമാണ് ഇരുവരും ചര്‍ച്ചചെയ്തതെന്നാണ് വിവരം.

ധര്‍മ്മശാലയിലെ എച്ച്പിസി ക്രിക്കറ്റ് സ്റ്റേഡിയത്തില്‍ നടന്ന മത്സരത്തില്‍ പഞ്ചാബ് കിങ്‌സ് ആദ്യം ബാറ്റ് ചെയ്ത് 200 റണ്‍സ് നേടി. പ്രഭ്സിമ്രാന്‍ സിങ് (57 റണ്‍സ് 32 ബോളുകളില്‍) മികച്ച ഇന്നിങ്‌സ് കാഴ്ചവെച്ചു. അസ്മത്തുല്ല ഒമര്‍സായി (38 റണ്‍സ് 17 ബോളുകളില്‍) അവസാന ഓവറുകളില്‍ അടിച്ചുതകര്‍ത്തതോടെയാണ് സ്‌കോര്‍ 200ല്‍ എത്തിയത്.

മറുപടി ബാറ്റിങ്ങില്‍ മുംബൈ 19.5 ഓവറില്‍ 205/4 എന്ന സ്‌കോറിലെത്തി. റയാന്‍ റിക്കല്‍ട്ടണ്‍ (48 റണ്‍സ് 23 ബോളുകളില്‍) മികച്ച തുടക്കം നല്‍കിയപ്പോള്‍, തിലക് വര്‍മ (75* റണ്‍സ്) സമ്മര്‍ദ്ദ ഘട്ടത്തില്‍ മികച്ച ഇന്നിങ്‌സ് കളിച്ച് ടീമിന് വിജയം സമ്മാനിച്ചു.

അഞ്ച് തോല്‍വികള്‍ക്ക് ശേഷം പഞ്ചാബ് കിങ്‌സ് 12 മത്സരങ്ങളില്‍ നിന്ന് 13 പോയിന്റുമായി (6 ജയം, 5 തോല്‍വി, 1 നോ റിസള്‍ട്ട്) പോയിന്റ് ടേബിളില്‍ നാലാം സ്ഥാനത്താണ്. പ്ലേ ഓഫ് സാധ്യതകള്‍ കുറഞ്ഞു. ശേഷിക്കുന്ന രണ്ട് ലീഗ് മത്സരങ്ങള്‍ ടീമിന് നോക്കൗട്ട് ആണ്. ചെന്നൈ സൂപ്പര്‍ കിങ്‌സും രാജസ്ഥാന്‍ റോയല്‍സും പ്ലേ ഓഫിനായി ശക്തമായി മത്സരിക്കുന്നുണ്ട്. 

2025 സീസണില്‍ ഫൈനല്‍ കളിച്ച ടീമിന്റെ ഈ സീസണിലെ ആദ്യ പകുതി മികച്ചതായിരുന്നു. തോല്‍വി അറിയാതെ 7 മത്സരങ്ങള്‍ പൂര്‍ത്തിയാക്കി. എന്നാല്‍, പെട്ടെന്നുള്ള അഞ്ച് തോല്‍വികള്‍ ടീമിനുള്ളിലെ സമ്മര്‍ദ്ദം വര്‍ദ്ധിപ്പിച്ചിരിക്കുകയാണ്. ശേഷിക്കുന്ന രണ്ട് കളികളും ജയിച്ച് പ്ലേ ഓഫ് ഉറപ്പിക്കാനാണ് ടീമിന്റെ ശ്രമം.