.jpg)
അംബാനി മകന്റെ കല്യാണത്തിന് മുടക്കിയ സഹസ്രകോടികള്‍ പാവപ്പെട്ടവന്റെ പണമെന്ന് രാഹുല്‍ ഗാന്ധി, കര്‍ഷകന്റെ വിവാഹത്തിന് കടമെടുക്കണം, മോദിയുടെ ഭരണം കോടീശ്വരന്മാര്‍ക്കുവേണ്ടി
ന്യൂഡല്‍ഹി: പ്രധാനമന്ത്രി നരേന്ദ്ര മോദിക്കെതിരെ രൂക്ഷ വിമര്‍ശനവുമായി കോണ്‍ഗ്രസ് എംപിയും ലോക്സഭയിലെ പ്രതിപക്ഷ നേതാവുമായ രാഹുല്‍ ഗാന്ധി. ബി.ജെ.പി ഭരണഘടനയെ ആക്രമിക്കുകയാണെന്നും രാജ്യത്തെ വിരലിലെണ്ണാവുന്ന ശതകോടീശ്വരന്മാര്‍ക്ക് വേണ്ടി പ്രവര്‍ത്തിക്കുകയാണെന്നും അദ്ദേഹം ആരോപിച്ചു.
ഹരിയാനയിലെ സോനിപതില്‍ തിരഞ്ഞെടുപ്പ് റാലിയെ അഭിസംബോധന ചെയ്തുകൊണ്ട് സംസാരിക്കവെ മുകേഷ് അംബാനിയുടെ മകന്‍ അനന്ത് അംബാനിയുടെ വിവാഹത്തെക്കുറിച്ചും രാഹുല്‍ വിമര്‍ശിച്ചു. അംബാനി തന്റെ മകന്റെ വിവാഹത്തിന് ആയിരക്കണക്കിന് കോടി രൂപ ചെലവഴിച്ചുവെന്ന് നിങ്ങള്‍ക്കറിയാമോ? അത് ആരുടെ പണമാണ്? ഇത് നിങ്ങളുടെ പണമാണ്. നിങ്ങളുടെ കുട്ടികളെ വിവാഹം കഴിക്കണമെങ്കില്‍, അവിടെ, നിങ്ങളുടെ ബാങ്ക് അക്കൗണ്ടില്‍ പണമില്ല, നിങ്ങളുടെ മക്കളുടെ വിവാഹത്തിന് നിങ്ങള്‍ക്ക് ബാങ്ക് വായ്പയെടുക്കണം. ഇന്ത്യയിലെ 25 പേര്‍ക്ക് മാത്രം അവരുടെ വിവാഹത്തിന് ആയിരക്കണക്കിന് കോടി രൂപ ചെലവഴിക്കാന്‍ കഴിയുന്ന ഒരു സംവിധാനമാണ് നരേന്ദ്ര മോദി വികസിപ്പിച്ചെടുത്തതെന്നും രാഹുല്‍ വിമര്‍ശിച്ചു.
ഇത് ഭരണഘടനയ്ക്കെതിരായ ആക്രമണമല്ലെങ്കില്‍, പിന്നെ എന്താണ്? ഒരു കര്‍ഷകന് തന്റെ കുടുംബത്തില്‍ വായ്പയെടുത്ത ശേഷം മാത്രമേ വിവാഹം നടത്താന്‍ കഴിയൂ. നിങ്ങളുടെ പോക്കറ്റില്‍ നിന്ന് പണം എടുക്കുമ്പോള്‍ കോടീശ്വരന്മാരായ 25 പേരുടെ പോക്കറ്റിലേക്ക് പണം പോകുന്നു എന്നതാണ് സത്യമെന്നും അദ്ദേഹം വ്യക്തമാക്കി.
ലോക ശതകോടീശ്വരന്മാരില്‍ മുന്‍നിരയിലുള്ള വ്യവസായി മുകേഷ് അംബാനിയുടെ ഇളയ മകന്‍ അനന്ത് അംബാനിയും വ്യവസായി വിരേന്‍ മര്‍ച്ചന്റിന്റെ മകള്‍ രാധിക മര്‍ച്ചന്റും ഈ വര്‍ഷം ജൂലൈയിലാണ് മുംബൈയിലെ ജിയോ വേള്‍ഡ് കണ്‍വെന്‍ഷന്‍ സെന്ററില്‍ നടന്ന ഗംഭീരമായ ചടങ്ങില്‍ വിവാഹിതരായത്. സെലിബ്രിറ്റി ഗ്ലാമറിന്റെ ഒരു കാഴ്ച വിരുന്നായിരുന്നു അംബാനിയുടെ മകന്റെ വിവാഹം. ഏകദേശം 5,000 കോടി രൂപ ഈ വിവാഹത്തിനായി ചെലവഴിച്ചെന്നാണ് സൂചന.
അഗ്‌നിപഥ് പോലുള്ള പദ്ധതികള്‍ ആരംഭിച്ചത് ഇന്ത്യന്‍ സൈനികരുടെ പെന്‍ഷനും കാന്റീന്‍ ആനുകൂല്യവും രക്തസാക്ഷി പദവിയും തട്ടിയെടുക്കാനാണെന്ന് എന്ന് രാഹുല്‍ ഗാന്ധി ആരോപിച്ചു. കാര്‍ഷിക ആധിപത്യമുള്ള ഹരിയാനയില്‍ മൂന്നാം തവണയും സര്‍ക്കാര്‍ രൂപീകരിക്കാന്‍ ലക്ഷ്യമിട്ട് ബിജെപി ഇറങ്ങുമ്പോള്‍ ശക്തമായ പ്രതിരോധവുമായി കോണ്‍ഗ്രസ് സജീവമാണ്. ഇത്തവണ കോണ്‍ഗ്രസ് സര്‍ക്കാര്‍ അധികാരത്തിലെത്തുമെന്നാണ് പൊതുവെയുള്ള വിലയിരുത്തല്‍. ഹരിയാനയില്‍ ഒക്ടോബര്‍ എട്ടിനാണ് ഫലപ്രഖ്യാപനം.
