.jpg)
ജയിച്ചാല് ഉറപ്പായും മന്ത്രി ആകുമായിരുന്ന പ്രതാപന് തോറ്റു, അണികള് കാലുവാരിയതെന്ന് സംശയം, തൃശൂരില് മുരളിയെ തോല്പ്പിച്ചതിന് കണക്കുതീര്ത്തതോ?
ജയിച്ചാല് മന്ത്രിസഭയില് ഉറപ്പായും ഒരു സ്ഥാനം ലഭിക്കുമെന്ന് കരുതപ്പെട്ടിരുന്ന അദ്ദേഹം സി.പി.എം. നേതാവ് പ്രൊഫ. സി. രവീന്ദ്രനാഥിനോട് വെറും 126 വോട്ടുകള്ക്ക് തോറ്റു.
തൃശൂര്: തിരഞ്ഞെടുപ്പില് യുഡിഎഫിന്റെ ഐതിഹാസിക വിജയത്തിനിടയിലും തൃശൂര് ജില്ലയിലെ മണലൂര് മണ്ഡലത്തില് കോണ്ഗ്രസ് നേതാവ് ടി.എന്. പ്രതാപന്ന്റെ പരാജയം വലിയ ചര്ച്ചയായി. ജയിച്ചാല് മന്ത്രിസഭയില് ഉറപ്പായും ഒരു സ്ഥാനം ലഭിക്കുമെന്ന് കരുതപ്പെട്ടിരുന്ന അദ്ദേഹം സി.പി.എം. നേതാവ് പ്രൊഫ. സി. രവീന്ദ്രനാഥിനോട് വെറും 126 വോട്ടുകള്ക്ക് തോറ്റു.
മണലൂരില് 2021-ല് സിപിഎം വലിയ ഭൂരിപക്ഷത്തോടെ ജയിച്ചിരുന്നു. എന്നാല്, 2026-ലെ യുഡിഎഫ് തരംഗത്തില് പ്രതാപന് ജയം നേടുമെന്നായിരുന്നു കണക്കുകൂട്ടല്. പ്രചാരണത്തിന്റെ തുടക്കം മുതല് അദ്ദേഹം ആത്മവിശ്വാസം പ്രകടിപ്പിച്ചു. നൂറ് ശതമാനം ജയിക്കും എന്ന് പറഞ്ഞിരുന്ന അദ്ദേഹത്തിന് തോല്വി വലിയ ഞെട്ടലാണ്.
ഒരു കാലത്ത് തൃശൂരില് നിന്ന് എംപിയായിരുന്ന പ്രതാപന് മണ്ഡലത്തില് ജനപിന്തുണ ഏറെയുണ്ടായിരുന്നു. ജയിച്ചിരുന്നെങ്കില് പുതിയ യുഡിഎഫ് സര്ക്കാരില് മന്ത്രിസ്ഥാനത്തിനും സാധ്യതയുണ്ടായിരുന്നു.
തോല്വിക്ക് പിന്നില് കാലുവാരല് ഉണ്ടായിരിക്കാമെന്ന സംശയം അണികള്ക്കിടയില് ശക്തമാണ്. പ്രാദേശിക അണികളുടെ അസന്തുഷ്ടിയോ, മറ്റ് നേതാക്കന്മാരുമായുള്ള ആഭ്യന്തര വൈരം കാരണമോ വോട്ട് ചോര്ച്ച ഉണ്ടായിരിക്കാമെന്ന വാദങ്ങള്. പ്രതാപന്റെ അപരനായ എ. പ്രതാപന് 184 വോട്ടുകള് നേടിയതും തിരിച്ചടിയായി.
ടി.എന്. പ്രതാപന് തൃശൂര് ലോക്സഭാ മണ്ഡലത്തില് നിന്ന് മത്സരിക്കാനിരിക്കെ ഹൈക്കമാന്ഡ് നിര്ദ്ദേശത്തെ തുടര്ന്ന് കെ മുരളീധരനായി മാറിയിരുന്നു. മുരളിയെ അട്ടിമറിച്ച് സുരേഷ് ഗോപി എംപി ആയപ്പോള് പ്രതാപന് കാലുവാരയെന്ന ആരോപണവും സജീവമായി. അന്നത്തെ തോല്വിക്ക് പ്രതാപനോട് ചിലര് കണക്കുചോദിച്ചായിരിക്കാമെന്ന അഭ്യൂഹമുണ്ട്.
പ്രതാപന് തോല്വി സമ്മതിച്ചെങ്കിലും ക്രമക്കേടുകള്ക്കെതിരെ നിയമപരമായി മുന്നോട്ടുപോകുമെന്ന് സൂചിപ്പിച്ചു. യുഡിഎഫ് തരംഗത്തിനിടയില് തോല്വി കോണ്ഗ്രസിനുള്ളിലും ചര്ച്ചയായി.
ടി.എന്. പ്രതാപന്റെ രാഷ്ട്രീയ ജീവിതത്തിലെ ആദ്യത്തെ തോല്വി പാര്ട്ടിക്കുള്ളില് പുതിയ വിവാദങ്ങള്ക്ക് തുടക്കമിട്ടേക്കാം. യുഡിഎഫ് സര്ക്കാര് രൂപീകരണത്തിനിടെ മന്ത്രി സ്ഥാന പ്രതീക്ഷകള്ക്ക് തിരിച്ചടിയായ ഈ ഫലം തൃശൂര് കോണ്ഗ്രസിന്റെ ആഭ്യന്തര ഡൈനാമിക്സിനെയും ബാധിക്കുമെന്നാണ് നിരീക്ഷകരുടെ വിലയിരുത്തല്.