വിവാഹത്തിനുള്ളിലെ ബലാത്സംഗം (Marital Rape) – ഇന്ത്യയിലെ നിയമവും സ്ത്രീയുടെ സമ്മതത്തിനുള്ള അവകാശവും

വിവാഹം ഒരു സ്ത്രീയുടെ ശരീരത്തിന്മേലുള്ള അവകാശം ഭർത്താവിന് കൈമാറുന്ന കരാറല്ല. വിവാഹബന്ധത്തിനുള്ളിലും സ്ത്രീയുടെ സമ്മതത്തിന് അതിന്റേതായ നിയമപരവും മാനുഷികവുമായ പ്രാധാന്യമുണ്ട്. വിവാഹം എന്നത് സ്നേഹത്തിന്റെയും വിശ്വാസത്തിന്റെയും പരസ്പര ബഹുമാനത്തിന്റെയും പങ്കാളിത്തമാണ്. എന്നാൽ വിവാഹം കഴിഞ്ഞു എന്ന ഒറ്റക്കാരണത്താൽ ഭാര്യയുടെ ശരീരത്തിന്മേൽ ഭർത്താവിന് പരിമിതികളില്ലാത്ത ലൈംഗിക അവകാശമുണ്ടെന്ന് കരുതുന്നത് സ്ത്രീയുടെ വ്യക്തിസ്വാതന്ത്ര്യത്തെയും അന്തസ്സിനെയും നിഷേധിക്കുന്ന സമീപനമാണ്.

ഭാര്യയുടെ താൽപര്യത്തിനും സമ്മതത്തിനും വിരുദ്ധമായി ബലപ്രയോഗത്തിലൂടെയോ ഭീഷണിയിലൂടെയോ നിർബന്ധിച്ചുള്ള ലൈംഗികബന്ധം വിവാഹത്തിനുള്ളിലെ അതിക്രമമാണ്. അതിനെയാണ് പൊതുവെ Marital Rape അഥവാ ദാമ്പത്യ ബലാത്സംഗം എന്ന് വിശേഷിപ്പിക്കുന്നത്.എന്നാൽ ഇന്ത്യയിലെ നിലവിലുള്ള ക്രിമിനൽ നിയമം ഈ വിഷയത്തിൽ ഒരു നിർണായകമായ നിയമപരമായ ഒഴിവാക്കൽ നിലനിർത്തുന്നുണ്ട്.

### 1\. ഇന്ത്യയിലെ നിലവിലുള്ള നിയമം എന്താണ്?

2024 ജൂലൈ 1 മുതൽ പ്രാബല്യത്തിൽ വന്ന ഭാരതീയ ന്യായ സംഹിതയുടെ (BNS) വകുപ്പ് 63 ആണ് ബലാത്സംഗത്തിന്റെ നിർവചനം നൽകുന്നത്.

വകുപ്പ് 63-ലെ Exception 2 പ്രകാരം:

ഭാര്യക്ക് 18 വയസ്സ് പൂർത്തിയായിട്ടുണ്ടെങ്കിൽ, സ്വന്തം ഭാര്യയുമായി ഭർത്താവ് നടത്തുന്ന ലൈംഗികബന്ധം ബലാത്സംഗമായി കണക്കാക്കില്ല.

അതായത്, പ്രായപൂർത്തിയായ ഭാര്യയുടെ സമ്മതമില്ലാതെ ലൈംഗികബന്ധം നടത്തിയാലും, നിലവിലുള്ള നിയമത്തിലെ ഈ പ്രത്യേക ഒഴിവാക്കൽ കാരണം അത് സ്വതന്ത്രമായി BNS വകുപ്പ് 63 പ്രകാരമുള്ള ബലാത്സംഗക്കുറ്റമായി കണക്കാക്കപ്പെടുന്നില്ല.

എന്നാൽ ഇതിന് പ്രധാനപ്പെട്ട ചില അപവാദങ്ങളുണ്ട്:

* ഭാര്യക്ക് 18 വയസ്സ് തികഞ്ഞിട്ടില്ലെങ്കിൽ ഈ ഒഴിവാക്കൽ ബാധകമല്ല.

* ഭർത്താവിൽ നിന്നും വേർപിരിഞ്ഞു താമസിക്കുന്ന ഭാര്യയുമായി അവളുടെ സമ്മതമില്ലാതെ ലൈംഗികബന്ധത്തിലേർപ്പെടുന്നത് BNS വകുപ്പ് 67 പ്രകാരം കുറ്റകരമാണ്. ഇതിന് രണ്ട് മുതൽ ഏഴ് വർഷം വരെ തടവും പിഴയും ലഭിക്കാം.

* ശാരീരിക ആക്രമണം, ഗുരുതരമായ പരിക്കേൽപ്പിക്കൽ, ക്രൂരത, ഭീഷണിപ്പെടുത്തൽ തുടങ്ങിയ പ്രവൃത്തികൾക്ക് അവയുടെ സാഹചര്യങ്ങൾ അനുസരിച്ച് മറ്റ് ക്രിമിനൽ നിയമവകുപ്പുകൾ ബാധകമാകാം.

### 2\. ഗാർഹിക പീഡന നിയമം സ്ത്രീക്ക് നൽകുന്ന സംരക്ഷണം

2005-ലെ Protection of Women from Domestic Violence Act-ലെ വകുപ്പ് 3 പ്രകാരം ലൈംഗിക പീഡനവും ഗാർഹിക പീഡനത്തിന്റെ പരിധിയിൽ വരുന്നു.

ഭാര്യയുടെ സമ്മതമില്ലാതെ ലൈംഗികബന്ധത്തിന് നിർബന്ധിക്കുക, ലൈംഗികമായി അപമാനിക്കുക, അവളുടെ അന്തസ്സിനെ ഹനിക്കുന്ന രീതിയിൽ പെരുമാറുക തുടങ്ങിയവ സാഹചര്യങ്ങൾക്കനുസരിച്ച് ലൈംഗിക പീഡനമായി പരിഗണിക്കപ്പെടാം.

ഈ നിയമപ്രകാരം സ്ത്രീക്ക് ആവശ്യപ്പെടാവുന്ന പ്രധാനപ്പെട്ട പരിഹാരങ്ങൾ:

* വകുപ്പ് 18 പ്രകാരം Protection Order.

* വകുപ്പ് 19 പ്രകാരം Residence Order.

* വകുപ്പ് 20 പ്രകാരം Monetary Relief.

* വകുപ്പ് 21 പ്രകാരം കുട്ടികളുടെ താൽക്കാലിക കസ്റ്റഡി.

* വകുപ്പ് 22 പ്രകാരം നഷ്ടപരിഹാരം.

* വകുപ്പ് 23 പ്രകാരം ഇടക്കാലവും ഏകപക്ഷീയവുമായ ഉത്തരവുകൾ.

പ്രധാനമായും ഓർക്കേണ്ടത്, ഗാർഹിക പീഡന നിയമം ദാമ്പത്യ ബലാത്സംഗത്തെ സ്വതന്ത്രമായ ക്രിമിനൽ കുറ്റമാക്കിയിട്ടില്ല എന്നതാണ്.

### 3\. ഭരണഘടനാപരമായ ചോദ്യം – വിവാഹം സ്ത്രീയുടെ വ്യക്തിസ്വാതന്ത്ര്യം ഇല്ലാതാക്കുമോ?

ഇവിടെയാണ് ഇന്ത്യൻ നിയമവ്യവസ്ഥയിലെ ഏറ്റവും പ്രധാനപ്പെട്ട ഭരണഘടനാപരമായ തർക്കം ഉയരുന്നത്.

* അനുച്ഛേദം 14 – നിയമത്തിന് മുന്നിലുള്ള സമത്വം.

* അനുച്ഛേദം 15 – ലിംഗത്തിന്റെ അടിസ്ഥാനത്തിലുള്ള വിവേചനത്തിനെതിരായ സംരക്ഷണം.

* അനുച്ഛേദം 21 – ജീവിക്കാനുള്ള അവകാശവും വ്യക്തിസ്വാതന്ത്ര്യവും അന്തസ്സോടെ ജീവിക്കാനുള്ള അവകാശവും.

വിവാഹം കഴിഞ്ഞുവെന്ന കാരണത്താൽ സ്ത്രീയുടെ ശരീരത്തിന്മേലുള്ള സ്വയംനിർണയാവകാശം ഇല്ലാതാകുമോ?

ഭർത്താവിന്റെ ലൈംഗിക താൽപര്യങ്ങൾക്കായി ഭാര്യയുടെ സമ്മതത്തെ അവഗണിക്കാമോ?

വിവാഹത്തിന് പുറത്തുള്ള ലൈംഗികബന്ധത്തിൽ സമ്മതം നിർബന്ധമാണെങ്കിൽ വിവാഹത്തിനുള്ളിൽ അതിന് വ്യത്യസ്തമായ മാനദണ്ഡം എന്തുകൊണ്ട്?

ഇവയാണ് Marital Rape Exception-നെതിരെ ഉയരുന്ന അടിസ്ഥാനപരമായ ഭരണഘടനാപരമായ ചോദ്യങ്ങൾ.

### 4\. സുപ്രീംകോടതിയുടെ പരിഗണനയിൽ Marital Rape Exception

ദാമ്പത്യ ബലാത്സംഗം സംബന്ധിച്ച നിയമപരമായ തർക്കം നിലവിൽ സുപ്രീംകോടതിയുടെ പരിഗണനയിലാണ്.

RIT Foundation v. Union of India കേസിൽ 2022-ൽ ഡൽഹി ഹൈക്കോടതിയുടെ ഡിവിഷൻ ബെഞ്ച് ഭിന്നവിധി പുറപ്പെടുവിച്ചിരുന്നു. ജസ്റ്റിസ് രാജീവ് ശഖ്ധർ വിവാഹത്തിനുള്ളിലെ ബലാത്സംഗത്തിന് നൽകുന്ന നിയമപരമായ ഒഴിവാക്കൽ ഭരണഘടനാവിരുദ്ധമാണെന്ന് വിലയിരുത്തിയപ്പോൾ ജസ്റ്റിസ് സി. ഹരി ശങ്കർ നിലവിലുള്ള നിയമവ്യവസ്ഥ ശരിവച്ചു.

തുടർന്ന് വിഷയം സുപ്രീംകോടതിയിലെത്തി.

2026 സെപ്റ്റംബർ 9-ന് ചീഫ് ജസ്റ്റിസ് സൂര്യകാന്ത് അധ്യക്ഷനായ മൂന്നംഗ ബെഞ്ച് വിവാഹത്തിനുള്ളിലെ ബലാത്സംഗവുമായി ബന്ധപ്പെട്ട ഹർജികൾ പരിഗണിച്ചു. വിവാഹം ഒരു വ്യക്തിയുടെ വ്യക്തിസ്വാതന്ത്ര്യത്തെ ഇല്ലാതാക്കുന്നില്ലെന്ന വാദം കോടതി അംഗീകരിച്ചെങ്കിലും നിലവിലുള്ള നിയമത്തിലെ ഒഴിവാക്കലിന്റെ ഭരണഘടനാപരമായ സാധുതയും അതിന്റെ നിയമപരമായ വ്യാഖ്യാനവും പരിശോധിക്കേണ്ടതുണ്ടെന്ന് വ്യക്തമാക്കി.

പ്രധാനമായും രണ്ട് ചോദ്യങ്ങളാണ് സുപ്രീംകോടതി പരിഗണിക്കുന്നത്:

* Marital Rape Exception ഭരണഘടനാപരമായി നിലനിൽക്കുമോ?

* ഈ ഒഴിവാക്കൽ നിലനിൽക്കുന്ന സാഹചര്യത്തിലും ഭർത്താവിനെ മറ്റ് ക്രിമിനൽ നിയമവകുപ്പുകൾ പ്രകാരം ഉത്തരവാദിയാക്കാൻ കഴിയുമോ?

ഈ കേസുകളുടെ അന്തിമവാദം 2026 നവംബർ 18-ന് ആരംഭിക്കാനാണ് സുപ്രീംകോടതി നിശ്ചയിച്ചിരിക്കുന്നത്. അതിനാൽ ഇപ്പോൾ ഇതുസംബന്ധിച്ച് അന്തിമവിധി വന്നിട്ടില്ല

### 5\. വിവാഹം സമ്മതത്തിനുള്ള സ്ഥിരമായ അനുമതിയല്ല

സമ്മതം (Consent) എന്നത് വിവാഹദിവസം ഒരിക്കൽ നൽകുന്ന അനുമതിയല്ല. ഓരോ ലൈംഗികബന്ധത്തിലും സ്ത്രീയുടെ സ്വതന്ത്രമായ താൽപര്യത്തിനും സമ്മതത്തിനും പ്രാധാന്യമുണ്ട്.

ഭാര്യ മൗനം പാലിച്ചു എന്നതുകൊണ്ട് മാത്രം സമ്മതം നൽകിയതായി കരുതാനാവില്ല. ഭയത്താലോ ഭീഷണിയാലോ നിർബന്ധത്താലോ വഴങ്ങുന്നത് യഥാർത്ഥ സമ്മതത്തിന് തുല്യമല്ല.

വിവാഹജീവിതത്തിൽ പരസ്പര ബഹുമാനവും വിശ്വാസവും വേണം. ലൈംഗികബന്ധം പോലും ഒരാളുടെ അധികാരപ്രകടനമാകരുത്.

### 6\. നിയമം മാറേണ്ടതുണ്ടോ?

വിവാഹത്തിനുള്ളിലെ ലൈംഗിക അതിക്രമത്തെ നിയമം എങ്ങനെ കൈകാര്യം ചെയ്യണം എന്നത് ഗൗരവമായ നിയമപരവും സാമൂഹികവുമായ ചർച്ചയാണ്.

ഒരു വശത്ത് സ്ത്രീയുടെ ശരീരസ്വാതന്ത്ര്യം, അന്തസ്സ്, സ്വകാര്യത, തുല്യത എന്നിവ സംരക്ഷിക്കപ്പെടേണ്ടതുണ്ട്.

മറുവശത്ത് ക്രിമിനൽ നിയമത്തിൽ കുറ്റവും ശിക്ഷയും വ്യക്തമായി നിർവചിക്കപ്പെടണം. നിയമപരമായ ഉറപ്പും നീതിയുക്തമായ നടപടിക്രമവും ഉറപ്പാക്കുകയും വേണം.

എന്നാൽ വിവാഹം എന്ന സ്ഥാപനം സംരക്ഷിക്കപ്പെടേണ്ടതിന്റെ പേരിൽ ഒരു വ്യക്തിയുടെ അടിസ്ഥാന അവകാശങ്ങൾ അവഗണിക്കപ്പെടാൻ പാടില്ല.

ഭാര്യ ഒരു വ്യക്തിയാണ്, ഭർത്താവിന്റെ സ്വത്തല്ല!

വിവാഹം സ്ത്രീയുടെ ശരീരത്തിന്മേൽ ഭർത്താവിന് ഉടമസ്ഥാവകാശം നൽകുന്നില്ല. ഭാര്യയുടെ സമ്മതവും താൽപര്യവും അന്തസ്സും അംഗീകരിക്കപ്പെടേണ്ടതാണ്.

ഭർത്താവിന്റെ ലൈംഗിക താൽപര്യങ്ങൾ നിറവേറ്റാനുള്ള ഒരു ഉപകരണമല്ല ഭാര്യ. അവൾക്ക് സ്വന്തം ശരീരത്തെക്കുറിച്ചും ജീവിതത്തെക്കുറിച്ചും തീരുമാനമെടുക്കാനുള്ള അവകാശമുണ്ട്.

വിവാഹം ഒരു ബന്ധമാണ്; ഉടമസ്ഥാവകാശമല്ല.

സ്നേഹത്തിന് പകരം ബലപ്രയോഗവും സമ്മതത്തിന് പകരം അധികാരവും കടന്നുവരുമ്പോൾ അവിടെ ദാമ്പത്യത്തിന്റെ അന്തസ്സാണ് നഷ്ടപ്പെടുന്നത്.

വിവാഹബന്ധത്തിനുള്ളിലും സ്ത്രീയുടെ സമ്മതത്തിന് വിലയുണ്ടാകണം. കാരണം, വിവാഹം അവളുടെ വ്യക്തിത്വത്തെയോ സ്വാതന്ത്ര്യത്തെയോ ഇല്ലാതാക്കുന്നില്ല.

അഡ്വ. വിമല ബിനു
കേരളഹൈക്കോടതി അഭിഭാഷക