മുഖ്യമന്ത്രിക്കായി ചാര്‍ട്ടേഡ് വിമാനം പറന്നത് 4 മണിക്കൂറിലധികം, ചെറിയൊരു യാത്രയ്ക്കായി വാങ്ങുന്നത് 14 ലക്ഷത്തോളം രൂപ, ആരാണ് സ്‌പോണ്‍സര്‍? മന്ത്രിമാര്‍ക്കെല്ലാം വിഐപി സംസ്‌കാരം

തിരുവനന്തപുരം: മലപ്പുറത്തെ മഴക്കെടുതികള്‍ വിലയിരുത്താന്‍ മുഖ്യമന്ത്രി വിഡി സതീശന്‍ നടത്തിയ ചാര്‍ട്ടേഡ് വിമാനയാത്ര സംബന്ധിച്ച് സോഷ്യല്‍ മീഡിയയില്‍ ചര്‍ച്ച കനക്കുകയാണ്. 4 മണിക്കൂറിലധികം പറന്ന വിമാനത്തിന് സാധാരണയായി 14 ലക്ഷത്തോളം രൂപ വേണ്ടിവരുമെന്നാണ് ചില ഫേസ്ബുക്ക് പോസ്റ്റുകള്‍ സൂചിപ്പിക്കുന്നത്.

എംബ്രയര്‍ ഫീനം 100 എന്ന ചെറിയ വിമാനം എത്തിയത് കര്‍ണാടകയിലെ ബെല്ലാരിക്ക് സമീപം തോറനാഗല്ലുവിലെ ജിന്‍ഡാല്‍ വിജയ്‌നഗര്‍ വിമാനത്താവളത്തില്‍ നിന്നാണ്. കേളച്ചന്ദ്ര ഗ്രൂപ്പിന്റെ വ്യോമയാന വിഭാഗമായ കേളച്ചന്ദ്ര ഏവിയേഷനുമായി ബന്ധപ്പെട്ട വിമാനമായിരിക്കാം ഇതെന്ന സൂചനകളും ഉണ്ട്.

തിങ്കളാഴ്ച രാവിലെ ബെംഗളുരുവിലെ പഴയ എച്ച്എഎല്‍ വിമാനത്താവളത്തില്‍ നിന്ന് 11.03ന് ടേക്കോഫ് ചെയ്ത വിമാനം 11.36ന് ജിന്‍ഡാല്‍ വിമാനത്താവളത്തില്‍ ഇറങ്ങി. അവിടെ നിന്ന് ഉച്ചയ്ക്ക് ഏകദേശം പന്ത്രണ്ടേകാലിന് തിരുവനന്തപുരത്തേക്ക് പറന്നത് ഒരു മണിക്കൂര്‍ 27 മിനിറ്റ് കൊണ്ട് 1.42ന് അവിടെ എത്തി. മുഖ്യമന്ത്രിയെ കയറ്റി 2.17ന് ടേക്കോഫ് ചെയ്ത വിമാനം 50 മിനിറ്റ് പറന്ന് 3.07ന് കരിപ്പൂരില്‍ ഇറങ്ങി. തിരിച്ച് രാത്രി 7.35ന് പുറപ്പെട്ട് 43 മിനിറ്റിനകം 8.18ന് തിരുവനന്തപുരത്ത് തിരിച്ചെത്തി. അടുത്ത ദിവസം ഉച്ചയ്ക്ക് 12.45ന് തോറനാഗല്ലുവിലേക്ക് തിരിച്ചുപോയ വിമാനം ഒരു മണിക്കൂര്‍ 22 മിനിറ്റ് പറന്ന് 1.07ന് അവിടെ എത്തി. മൊത്തം പറക്കല്‍ സമയം നാല് മണിക്കൂര്‍ 22 മിനിറ്റ് മാത്രം. എന്നാല്‍ കേരളത്തിന്റെ ആവശ്യത്തിനായി വിമാനം ചെലവഴിച്ച സമയം ജിന്‍ഡാലില്‍ നിന്ന് തിരുവനന്തപുരത്തേക്ക് ടേക്കോഫ് ചെയ്ത ഉച്ച പന്ത്രണ്ടേകാല്‍ മുതല്‍ തിരിച്ചെത്തിയ രാത്രി 8.18 വരെ എട്ട് മണിക്കൂര്‍ 42 മിനിറ്റാണ്.

പതിനാറ് വര്‍ഷം പഴക്കമുള്ള ഫീനം 100 വിമാനത്തിന്റെ വാടക മണിക്കൂറിന് രണ്ട് ലക്ഷം മുതല്‍ 2.7 ലക്ഷം രൂപ വരെയാണ് വിമാന ചാര്‍ട്ടര്‍ കമ്പനികള്‍ പരസ്യപ്പെടുത്തുന്നത്. ഉയര്‍ന്ന നിരക്കായ 2.7 ലക്ഷം എടുത്താല്‍ പറക്കല്‍ വാടക മാത്രം 11,79,900 രൂപ. പതിനെട്ട് ശതമാനം ജിഎസ്ടി കൂട്ടിയാല്‍ 13,92,282 രൂപ. റൂട്ട് നാവിഗേഷന്‍, ലാന്‍ഡിങ്, പാര്‍ക്കിങ് ചാര്‍ജുകള്‍ പ്രത്യേകം ഈടാക്കുന്നവരും മൊത്തം വാടകയില്‍ ഉള്‍പ്പെടുത്തുന്നവരുമുണ്ട്. ചില കമ്പനികള്‍ മൊത്തം ലഭ്യതാ സമയത്തിന് അധികം ചാര്‍ജ് ഈടാക്കാറുണ്ട്. ഇവയെല്ലാം കണക്കിലെടുത്താല്‍ മുഖ്യമന്ത്രിയുടെ ഈ യാത്രയുടെ ഏറ്റവും കുറഞ്ഞ ചെലവ് പതിനാല് ലക്ഷത്തോളം രൂപയെങ്കിലും ആയിരിക്കും.

ഈ തുക ആരാണ് അടയ്ക്കുന്നത് എന്ന ചോദ്യമാണ് ഏറ്റവും പ്രധാനം. ഒരു ഹെലികോപ്റ്ററും ഒരു വിമാനവും വാടകയ്ക്ക് നല്‍കുന്നതു മാത്രം ബിസിനസായ കേളച്ചന്ദ്ര ഏവിയേഷന്‍ പോലുള്ള ഒരു സ്ഥാപനത്തിന് ന്യായമായി ലഭിക്കേണ്ട തുകയാണിത്. സര്‍ക്കാര്‍ ഖജനാവില്‍ നിന്നാണോ, സ്വകാര്യ സ്‌പോണ്‍സര്‍ഷിപ്പ് ആണോ, അതോ മറ്റെന്തെങ്കിലും മാര്‍ഗ്ഗമാണോ എന്ന വിവരം പൊതുജനത്തിന് ഇതുവരെ ലഭ്യമായിട്ടില്ല. മഴക്കെടുതി നേരിട്ട ജനങ്ങള്‍ക്ക് ആശ്വാസം നല്‍കാനുള്ള യാത്രയാണ് എന്ന് അവകാശപ്പെടുമ്പോള്‍ തന്നെ, ചെറിയ ഒരു ദൂരത്തേക്ക് ഇത്രയും ചെലവേറിയ സ്വകാര്യ വിമാനം ഉപയോഗിക്കുന്നത് ധാര്‍മികമായി ന്യായീകരിക്കാവുന്നതാണോ എന്ന ചോദ്യം ഉയരുന്നു.

സാധാരണ ജനങ്ങള്‍ റോഡ് യാത്രയിലും പൊതുഗതാഗതത്തിലും ബുദ്ധിമുട്ടുന്ന സമയത്ത് മുഖ്യമന്ത്രിയുടെ യാത്രയ്ക്ക് ഇത്തരം ഒരു ചെറുവിമാനം വാടകയ്‌ക്കെടുക്കുന്നത് ആഡംബരത്തിന്റെ പ്രതീകമായി മാറുന്നു. മഴക്കെടുതി വിലയിരുത്തല്‍ യഥാര്‍ത്ഥത്തില്‍ ആവശ്യമായിരുന്നോ, അതോ രാഷ്ട്രീയ പ്രതിച്ഛായ ഉയര്‍ത്താനുള്ള ഒരു അവസരമായിരുന്നോ എന്ന സംശയവും ഉയരാം. സുതാര്യതയുടെ അഭാവം ഈ യാത്രയെ കൂടുതല്‍ വിവാദപരമാക്കുന്നു. ആരുടെ വിമാനം, ആരുടെ പണം, ആരുടെ താല്‍പ്പര്യം എന്നീ ചോദ്യങ്ങള്‍ക്ക് വ്യക്തമായ ഉത്തരം ലഭിക്കാത്തിടത്തോളം കാലം ഈ യാത്ര പൊതുധനം ദുര്‍വിനിയോഗം ചെയ്തതിന്റെ ഉദാഹരണമായി തുടരും.