തെരഞ്ഞെടുപ്പിന് ഫണ്ട് എത്തിയത് കര്‍ണാടകത്തില്‍ നിന്ന്? മദ്യത്തിന് നികുതി കുറയ്ക്കാനുള്ള നീക്കം മദ്യ മാഫിയകള്‍ക്കുവേണ്ടി, അധികാരത്തിലെത്തിയ ഉടന്‍ അഴിമതി ആരോപണം

തിരുവനന്തപുരം: യുഡിഎഫ് സര്‍ക്കാരിന്റെ ബജറ്റില്‍ മുഖ്യമന്ത്രി വി.ഡി. സതീശന്‍ പ്രഖ്യാപിച്ച വീര്യം കുറഞ്ഞ മദ്യത്തിന്റെ നികുതി ഇളവ് വലിയ രാഷ്ട്രീയ സാമൂഹിക വിവാദമായി മാറിയിരിക്കുകയാണ്. പ്രതിപക്ഷമായ എല്‍ഡിഎഫ് വന്‍ അഴിമതിയായും തെരഞ്ഞെടുപ്പിന് ഫണ്ട് എത്തിയതില്‍ മദ്യലോബികള്‍ക്ക് വേണ്ടിയുള്ള സഹായമായും ആരോപണം ഉന്നയിച്ചുകഴിഞ്ഞു.

നിലവില്‍ കേരളത്തില്‍ IMFL (Indian Made Foreign Liquor) ഉള്‍പ്പെടെയുള്ള മദ്യത്തിന് ഏകീകൃത 251% വില്‍പ്പന നികുതി ഉണ്ട്. പുതിയ നിര്‍ദേശം 0.5% മുതല്‍ 20% വരെ വീര്യമുള്ള മദ്യങ്ങള്‍ക്ക് (ബിയറും വൈനും ഒഴികെ) പ്രത്യേക നികുതി സ്ലാബ് എന്നതാണ്. 0.5% - 10% വീര്യമുള്ള മദ്യത്തിന് 120% നികുതിയും 10% - 20% വീര്യമുള്ളതിന് 175% നികുതിയുമാണ് ബജറ്റിലെ നിര്‍ദ്ദേശം.

ഇത് 2022-23 അബ്കാരി നയത്തിന്റെ തുടര്‍ച്ചയാണെന്നാണ് സതീശന്‍ വിശദീകരിക്കുന്നത്. അന്ന് പിണറായി സര്‍ക്കാര്‍ വീര്യം കുറഞ്ഞ മദ്യത്തിന് (പഴവര്‍ഗ്ഗങ്ങളില്‍ നിന്നുള്ളത് ഉള്‍പ്പെടെ) വില്‍പ്പനാനുമതി നല്‍കിയിരുന്നു, പക്ഷേ നികുതി ഘടന തീരുമാനമാക്കിയില്ല. സതീശന്‍ ഇപ്പോള്‍ അത് പൂര്‍ത്തീകരിക്കുകയാണെന്നാണ് വാദം.

സര്‍ക്കാര്‍ വാദിക്കുന്നത് ഇത് വരുമാനം വര്‍ധിപ്പിക്കാന്‍ സഹായിക്കുമെന്നാണ്. എന്നാല്‍, പ്രതിപക്ഷം പറയുന്നത്, സംസ്ഥാനത്തിന് വര്‍ഷത്തില്‍ 600 കോടി രൂപ വരെ നഷ്ടമുണ്ടാകുമെന്നാണ്.

പ്രതിപക്ഷ നേതാക്കളായ പിണറായി വിജയന്‍, എം.ബി. രാജേഷ്, കെ.എന്‍. ബാലഗോപാല്‍ തുടങ്ങിയവര്‍ ഭരണപക്ഷത്തിന് നേരെ അഴിമതി ആരോപണം ഉയര്‍ത്തുന്നു.

നികുതി കുറയ്ക്കുന്നത് വില കുറയ്ക്കുമെന്നതിനാല്‍. യുവാക്കള്‍ക്കും പുതിയ തലമുറയ്ക്കും 'കൂള്‍ ഡ്രിങ്ക്' പോലെ എളുപ്പത്തില്‍ ലഭ്യമാകും. ഇത് സമൂഹത്തിന് ദോഷകരമാണ്. സര്‍ക്കാര്‍ മദ്യത്തിന്റെ നികുതി കൂട്ടി ഉപഭോഗം കുറയ്ക്കാനുള്ള നയം മാറ്റുകയാണെന്നാണ് വിമര്‍ശനം.

മദ്യലോബികള്‍ക്ക് (പ്രത്യേകിച്ച് കര്‍ണാടക ആസ്ഥാനമായ കമ്പനികള്‍ക്ക്) വേണ്ടിയുള്ള സഹായമാണ് സര്‍ക്കാര്‍ തീരുമാനമെന്നും ആരോപണമുണ്ട്. വന്‍കിട ഡിസ്റ്റലറികള്‍ക്ക് കോടിക്കണക്കിന് രൂപയുടെ ലാഭമുണ്ടാകും. പ്രതിപക്ഷത്തിരുന്നപ്പോള്‍ സതീശന്‍ തന്നെ ഇത്തരം നീക്കങ്ങളെ അഴിമതിയായി വിമര്‍ശിച്ചിരുന്നു. ഇതിന്റെ വീഡിയോയും കഴിഞ്ഞദിവസം പുറത്തുവന്നു.

ഭരണപക്ഷത്തും വിഷയത്തില്‍ അതൃപ്തി ഉയര്‍ന്നിട്ടുണ്ട്. എക്‌സൈസ് മന്ത്രി എം. ലിജു മുഖ്യമന്ത്രിയോട് വിയോജിപ്പ് അറിയിച്ചു. ധനവകുപ്പ് ഒറ്റയ്ക്ക് തീരുമാനമെടുത്തെന്ന് ആരോപിക്കുന്നു. മുതിര്‍ന്ന കോണ്‍ഗ്രസ് നേതാവ് വി.എം. സുധീരനും തിരുത്തല്‍ ആവശ്യപ്പെട്ട് കത്തയച്ചു.

അധികാരത്തിലെത്തിയ ഉടന്‍ അഴിമതി ആരോപണം ഉയര്‍ന്നത് യുഡിഎഫ് സര്‍ക്കാരിനെ ബാധിച്ചുകഴിഞ്ഞു. ഭരണപക്ഷത്ത് ആഭ്യന്തര ചര്‍ച്ചകളും തിരുത്തല്‍ ആവശ്യങ്ങളും ഉയര്‍ന്നുവരുന്നുണ്ട്. സതീശന്‍ സര്‍ക്കാര്‍ നയം പുനഃപരിശോധിക്കുമോ എന്നത് കാത്തിരുന്ന് കാണേണ്ടതാണ്.