.jpg)
സ്ഥാനാര്ത്ഥി നിര്ണയത്തില് അടിതെറ്റി കണ്ണൂര് ജില്ലാ കമ്മറ്റി, കെകെ രാഗേഷിന് ധാര്ഷ്ട്യമെന്ന് അണികള്, എംവി ഗോവിന്ദന് രാജിവെക്കണമെന്ന ആവശ്യം ശക്തം, സിപിഎമ്മില് മാറ്റത്തിന് കളമൊരുങ്ങുന്നു
ജില്ലാ കമ്മിറ്റിയുടെ സ്ഥാനാര്ത്ഥി നിര്ണയത്തിലെ തീരുമാനങ്ങള്ക്കെതിരെ ശക്തമായ വിമര്ശനമാണ് ഉയര്ന്നുവരുന്നത്. പ്രത്യേകിച്ച് തളിപ്പറമ്പ് മണ്ഡലത്തിലെ സ്ഥാനാര്ത്ഥി നിര്ണയവും പയ്യന്നൂരിലെ വിവാദവും ജില്ലാ കമ്മറ്റിയുടെ കഴിവുകേടിന് ഉദാഹരണമായി.
കണ്ണൂര്: നിയമസഭാ തിരഞ്ഞെടുപ്പ് ഫലപ്രഖ്യാപനത്തിന് പിന്നാലെ സിപിഎമ്മിന്റെ പരമ്പരാഗത കോട്ടയായ കണ്ണൂര് ജില്ലയില് പാര്ട്ടിക്കകത്ത് ആഭ്യന്തര അസ്ഥിരതയും അസന്തുഷ്ടിയും രൂപപ്പെട്ടിരിക്കുന്നു. ജില്ലാ കമ്മിറ്റിയുടെ സ്ഥാനാര്ത്ഥി നിര്ണയത്തിലെ തീരുമാനങ്ങള്ക്കെതിരെ ശക്തമായ വിമര്ശനമാണ് ഉയര്ന്നുവരുന്നത്. പ്രത്യേകിച്ച് തളിപ്പറമ്പ് മണ്ഡലത്തിലെ സ്ഥാനാര്ത്ഥി നിര്ണയവും പയ്യന്നൂരിലെ വിവാദവും ജില്ലാ കമ്മറ്റിയുടെ കഴിവുകേടിന് ഉദാഹരണമായി.
തളിപ്പറമ്പില് പി.കെ. ശ്യാമളയെ സ്ഥാനാര്ത്ഥിയാക്കിയത് കുടുംബവാഴ്ചയെന്ന ആരോപണത്തിന് തുടക്കംമുതല് വഴിയൊരുക്കിയിരുന്നു. പാര്ട്ടി അനുഭാവികളുടെ പ്രതിഷേധം ജില്ലാ നേതൃത്വം തള്ളി. ഇതോടെ മുതിര്ന്ന നേതാവ് ടി.കെ. ഗോവിന്ദന് സ്വതന്ത്രനായി മത്സരിക്കാനുള്ള വഴിയൊരുങ്ങുകയും അത് പാര്ട്ടിയുടെ തോല്വിയിലേക്ക് നയിക്കുകയും ചെയ്തു.
വി. കുഞ്ഞികൃഷ്ണന് പാര്ട്ടി ഫണ്ട് ദുരുപയോഗം ഉയര്ത്തിക്കൊണ്ടുവന്നപ്പോള് ശരിയായ രീതിയില് ഇത് ചര്ച്ച ചെയ്ത് തീരുമാനത്തിലെത്താനും നേതൃത്വത്തിന് സാധിച്ചില്ല. വിമതനായി മത്സരിച്ച കുഞ്ഞികൃഷ്ണനും ജയിച്ചതോടെ ഉറച്ച രണ്ട് സീറ്റുകളാണ് പാര്ട്ടിക്ക് നഷ്ടമായത്. ഇതിന്റെ അലയൊലി സമീപ ജില്ലകളിലും തിരിച്ചടിക്ക് കാരണമായി.
മുഖ്യമന്ത്രിയുടെ മുന് പ്രൈവറ്റ് സെക്രട്ടറി കെ.കെ. രാഗേഷ് ജില്ലാ സെക്രട്ടറിയായി നിയമിതനായശേഷം പല പ്രദേശങ്ങളിലും പാര്ട്ടിക്കുള്ളില് അസ്വാരസ്യമുണ്ടായിരുന്നു. യുവനേതാവ് എന്ന നിലയില് പാര്ട്ടി വിശേഷിപ്പിച്ചെങ്കിലും ജനകീയതയില്ലാത്ത ധാര്ഷ്ട്യമുള്ള വ്യക്തിയാണ് രാഗേഷെന്ന് അനുഭാവികള് ചൂണ്ടിക്കാട്ടുന്നു.
തളിപ്പറമ്പിലും പയ്യന്നൂരിലും റിബല് സ്ഥാനാര്ത്ഥികള് വലിയ മാര്ജിനോടെ വിജയിച്ചത് സിപിഎമ്മിന്റെ രാഷ്ട്രീയ ചരിത്രത്തിലെ തന്നെ കനത്ത തിരിച്ചടികളിലൊന്നാണ്. കണ്ണൂര് സിപിഎമ്മിന്റെ ശക്തമായ കോട്ടയില് നിന്നുള്ള ഈ തോല്വി പാര്ട്ടിയുടെ സംഘടനാ ശേഷിയെയും ആഭ്യന്തര ജനാധിപത്യത്തെയും ചോദ്യം ചെയ്യുന്നു.
കണ്ണൂരിലെ സംഭവങ്ങള് സംസ്ഥാന തലത്തിലും സിപിഎമ്മിന് വലിയ ചര്ച്ചയ്ക്ക് വഴിയൊരുക്കിയിരിക്കുന്നു. പാര്ട്ടി നേതൃത്വം ഏകീകൃത നിലപാട് സ്വീകരിച്ച് അണികളെ തിരിച്ചുപിടിക്കാന് ശ്രമിക്കുമ്പോഴും, ആഭ്യന്തര മാറ്റങ്ങള്ക്കുള്ള ആവശ്യം ശക്തമായി നിലനില്ക്കുന്നുണ്ട്. ഇത് ഒരു ജില്ലാ പ്രശ്നം മാത്രമല്ല, സിപിഎമ്മിന്റെ ഭാവി നേതൃത്വം, ജനാധിപത്യ പരിപാലനം, തലമുറ മാറ്റം എന്നിവയുമായി ബന്ധപ്പെട്ട വലിയ ചോദ്യങ്ങളാണ് ഉയര്ത്തുന്നത്.