ജിയോ പ്ലാറ്റ്ഫോംസ് ഐപിഒ കിട്ടിയവര്‍ക്ക് കോളടിച്ചു, പലരും ആദ്യദിനം തന്നെ വിറ്റഴിച്ചു, ഓരോ വിഭാഗത്തിലെ നിക്ഷേപകര്‍ക്കും ലഭിച്ച ലാഭം ഇങ്ങനെ

മുംബൈ: റിലയന്‍സ് ഇന്‍ഡസ്ട്രീസിന്റെ ഉപകമ്പനിയായ ജിയോ പ്ലാറ്റ്ഫോംസ് ബുധനാഴ്ച ഓഹരി വിപണിയില്‍ ശക്തമായ അരങ്ങേറ്റം കുറിച്ചു. ഐപിഒ വിലയായ 1,119 രൂപയേക്കാള്‍ 21.36 ശതമാനം പ്രീമിയത്തിലാണ് ഓഹരി ലിസ്റ്റ് ചെയ്തത്. ഒരു ഓഹരിക്ക് നേട്ടം 239 രൂപ. ഏകദേശം 12.6 ലക്ഷം കോടി രൂപയാണ് മാര്‍ക്കറ്റ് ക്യാപ്.  

മൂല്യനിര്‍ണയത്തോടെ ജിയോ പ്ലാറ്റ്ഫോംസ് ഇന്ത്യയിലെ രണ്ടാമത്തെ വലിയ കമ്പനിയായി മാറി. അതോടൊപ്പം ഭാരതി എയര്‍ടെല്ലിനെ മറികടന്ന് രാജ്യത്തെ ഏറ്റവും വിലയേറിയ ടെലികോം കമ്പനിയായും മാറി.

റീട്ടെയില്‍ ആയി 12 ഓഹരികള്‍ വാങ്ങിയവര്‍ക്ക് 2,868 രൂപയുടെ നേട്ടമുണ്ടായി. 23 ഓഹരികള്‍ക്ക് 5,497 രൂപയും 180 ഓഹരികള്‍ക്ക് 43,020 രൂപയും നേട്ടമുണ്ടായി. പലരും ആദ്യദിനം തന്നെ വിറ്റഴിച്ച് ലാഭമുണ്ടാക്കുകയും ചെയ്തു.

നേട്ടം കണക്കാക്കിയത് ഇഷ്യൂ വിലയായ 1,119 രൂപയും ലിസ്റ്റിംഗ് വിലയായ 1,358 രൂപയും തമ്മിലുള്ള വ്യത്യാസത്തിന്റെ അടിസ്ഥാനത്തിലാണ്. ഇന്ത്യയിലെ ഏറ്റവും വലിയ അഞ്ച് മെഗാ പബ്ലിക് ഇഷ്യൂകളില്‍ അലോട്ടികള്‍ക്ക് ഏറ്റവും കൂടുതല്‍ ലാഭം നല്‍കിയത് ജിയോ പ്ലാറ്റ്ഫോംസ് ഐപിഒയാണ്. എല്‍ഐസി, ഹ്യുണ്ടായ് മോട്ടോര്‍ ഇന്ത്യ, പേടിഎം എന്നിവയുടെ ഓഹരികള്‍ ഡിസ്‌കൗണ്ടിലാണ് ലിസ്റ്റ് ചെയ്തത്. എന്‍എസ്ഇ ഓഹരി വെറും 1% പ്രീമിയത്തിലാണ് ലിസ്റ്റ് ചെയ്തത്.

ജിയോ പ്ലാറ്റ്ഫോംസിന്റെ ശക്തമായ ലിസ്റ്റിംഗ് നിക്ഷേപകര്‍ക്ക് നല്ല വരുമാനം നല്‍കിയതോടൊപ്പം ടെലികോം മേഖലയിലെ മാര്‍ക്കറ്റ് ക്യാപ് റാങ്കിങ്ങിലും വലിയ മാറ്റം വരുത്തിയിരിക്കുന്നു.