.jpg)
മുടി തഴച്ചുവളരാനും തടി കുറയ്ക്കാനും ഒരു അത്ഭുത ഭക്ഷണം, യുവതലമുറയുടെ ട്രെന്‍ഡ്
സൂപ്പര്‍ഫുഡുകളുടെ ലോകത്ത്, ട്രെന്‍ഡ് ആയി മാറുകയാണ് ആശാളി വിത്ത് എന്നറിയപ്പെടുന്ന ഹാലിം സീഡ്‌സ്. രുചിമുകുളങ്ങളെ പോഷിപ്പിക്കുക മാത്രമല്ല, ആരോഗ്യപരമായ ഗുണങ്ങളുടെ സമൃദ്ധിയും വാഗ്ദാനം ചെയ്യുന്നതാണ് ആശാളി വിത്ത്. ഗാര്‍ഡന്‍ ക്രെസ് സീഡ്‌സ് എന്നും ഇത് അറിയപ്പെടുന്നണ്ട്. ഗാര്‍ഡന്‍ ക്രെസ് ചെടിയില്‍ നിന്നാണ് ഇത് ഉദ്പാദിപ്പിക്കുന്നത്.
വലിപ്പം കുറവാണെങ്കിലും, ഈ വിത്തുകള്‍ക്ക് ശക്തമായ പോഷകഗുണമുണ്ട്. ഇത് മുടിയുടെ വളര്‍ച്ചയെ പ്രോത്സാഹിപ്പിക്കുക മാത്രമല്ല ശരീരഭാരം കുറയ്ക്കാനും സഹായിക്കുന്നു. നൂറ്റാണ്ടുകളായി പരമ്പരാഗത വൈദ്യശാസ്ത്രത്തിന്റെ അവിഭാജ്യ ഘടകമാണ് ഇത്. പലപ്പോഴും അവഗണിക്കപ്പെടുന്ന ഈ ചെറിയ വിത്തുകള്‍ ഇപ്പോള്‍ യുവതലമുറ ഏറ്റെടുത്തുകഴിഞ്ഞു. ഈ വിത്തുകള്‍ പാചക പരീക്ഷണങ്ങള്‍ക്ക് വൈവിധ്യമാര്‍ന്ന ഒരു കൂട്ടിച്ചേര്‍ക്കലാണ്.
വണ്ണം കുറയ്ക്കാന്‍ ആഗ്രഹിക്കുന്നവര്‍ ഇതു കഴിക്കുന്നത് വളരെ വേഗം അവരുടെ ലക്ഷ്യത്തില്‍ എത്തിച്ചേരുവാന്‍ സഹായിക്കുന്നു. ആന്റി ഓക്‌സിഡന്റുകളുടെയും ഫോളിക് ആസിഡിന്റെയും വിറ്റാമിന്‍ എ, സി, ഇ എന്നിവയുടെയും കലവറ ഇതിലുണ്ട്. പ്രതിരോധശേഷി വര്‍ദ്ധിപ്പിച്ച് അസുഖങ്ങളില്‍ നിന്നും പരിരക്ഷ നല്‍കാന്‍ ഇവ സഹായിക്കുന്നു. ക്രമം തെറ്റിയുള്ള ആര്‍ത്തവത്തിനും ഹോര്‍മോണ്‍ സംബന്ധമായ മറ്റു രോഗങ്ങള്‍ക്കും ഈ വിത്തുകള്‍ ഉപയോഗിച്ചുവരുന്നു.
ഒരു വലിയ സ്പൂണ്‍ ആശാളി വിത്ത് മുക്കാല്‍ ഗ്ലാസ് വെള്ളത്തില്‍ ഒരു രാത്രി കുതിര്‍ത്തു വച്ചതിനു ശേഷം രാവിലെ വെറും വയറ്റില്‍ കുടിച്ചാല്‍ ശരീരഭാരം കുറയുകയും രോഗപ്രതിരോധ ശേഷി വര്‍ദ്ധിക്കുകയും ചെയ്യും. മാത്രമല്ല സ്മൂത്തികളിലും സൂപ്പുകളിലും സാലഡുകളിലും ആശാളി വിത്ത് പൊടിച്ചു ചേര്‍ത്തു കഴിക്കുന്നതും നല്ലതാണ്. അതേസമയം, രക്തസമ്മര്‍ദം ഉള്ളവരും തൈറോയിഡ് സംബന്ധമായ അസുഖങ്ങള്‍ ഉള്ളവരും ഇവ ഉപയോഗിക്കുന്നത് നല്ലതല്ല എന്നു പഠനങ്ങള്‍ പറയുന്നു.
