.jpg)
കാല്പന്തിനെ നെഞ്ചിലേറ്റിയ നാട് ; കണ്ണൂരിന് വേണം കൂടുതല് സൗകര്യങ്ങളുള്ള സ്റ്റേഡിയം
കണ്ണൂര്: നീണ്ട ഇടവേളയ്ക്ക് ശേഷം വിരുന്നെത്തിയ ഫുട്ബോള് ഉത്സവത്തെ മനസ്സറിഞ്ഞ് വരവേറ്റ് കണ്ണൂര്. മൂന്സിപ്പല് ജവഹര് സ്റ്റേഡിയത്തില് പൂര്ത്തിയായ കണ്ണൂര് വാരിയേഴ്സ് എഫ്സിയുടെ അഞ്ച് ഹോം മത്സരങ്ങളില് നിറഞ്ഞ് കവിഞ്ഞ് ഗ്യാലറികള്. പലര്ക്കും ഇത് ഒരു മത്സരം മാത്രമല്ലായിരുന്നില്ല, ഒരു ഓര്മ്മയുടെ മടങ്ങിവരവും, ഒരു സംസ്കാരത്തിന്റെ പുനര്ജന്മവുമായിരുന്നു. ആദ്യ സീസണില് ഹോം ഗ്രൗണ്ടില്ലാതെ കോഴിക്കോട് പന്ത് തട്ടിയ കണ്ണൂര് വാരിയേഴ്സിനെ രണ്ടാം സീസണില് സ്വന്തം മണ്ണിലേക്ക് സ്വാഗതം ചെയ്യുകയായിരുന്നു കണ്ണൂരിലെ ഫുട്ബോള് ആരാധകര്. അഞ്ച് മത്സരങ്ങളില് നിന്ന് 66,596 പേരാണ് ജവഹര് സ്റ്റേഡിയത്തില് കളികാണാനെത്തിയത്.
15,000 പേര്ക്ക് മാത്രം ഇരിക്കാന് സാധിക്കുന്ന ഗ്യാലറിയില് എല്ലാ മത്സരങ്ങള്ക്കും 13,319 ശരാശരി ആരാധകര് ഉണ്ടായിരുന്നു. ചില മത്സരങ്ങളില് ആവേശം തല്ലിക്കെടുത്താന് മഴയുണ്ടായെങ്കിലും കാല്പന്തിനെ നെഞ്ചിലേറ്റിയ കണ്ണൂരിലെ ഫുട്ബോള് ആരാധകര്ക്ക് അതൊന്നും പ്രശ്നമല്ലായിരുന്നു. കോരിചൊരിയുന്ന മഴയത്തും ഫുട്ബോളിനോടും കണ്ണൂരിനോടുമുള്ള സ്നേഹം നെഞ്ചോട് ചേര്ത്ത് സ്വന്തം ടീമിന് പിന്തുണനല്കി ആരാധകര്. ഫുട്ബോള് വീണ്ടും ഈ മണ്ണിലേക്ക് മടങ്ങിയെത്തിയതോടെ, ഫുട്ബോളും ആരാധകരും തമ്മിലുള്ള അത്മബന്ധം വീണ്ടും ഉറപ്പിക്കപ്പെടുകയാണ്. ഫുട്ബോള് ഇവിടെ വെറുമൊരും കായിക ഇനം മാത്രമല്ല, വികാരവും, ഐക്യത്തിന്റെ ഭാഷയുമാണ്.
ജവഹര് സ്റ്റേഡിയത്തില് സൂപ്പര് ലീഗ് കേരള മത്സരങ്ങള് നടത്താന് വേണ്ടി ഒരുക്കിയത് താല്കാലിക അടിസ്ഥാന സൗകര്യങ്ങള്. രാത്രി മത്സരങ്ങള് നടത്താന് വേണ്ടി താല്കാലിക ലൈറ്റുകളും സ്റ്റാന്ഡുകളും ഒരുക്കി. കളിക്കാര്ക്കുള്ള ഡ്രസ്സിംങ് റൂം, ബയോ ടോയ്ലറ്റുകള്, മെഡിക്കല് റൂം, ഓഫീസ് റൂം തുടങ്ങിയവയെല്ലാം താല്കാലികമായി ഒരുക്കിയതാണ്. ഇതെല്ലാം മത്സര ശേഷം പൊളിച്ച് മാറ്റും. അതോടൊപ്പം സ്റ്റേഡിയത്തിലെ ഗ്യാലറികള് മുഴുവനായി പെയ്ന്റിംങ് ചെയ്തു. മത്സരത്തിന് ആവശ്യമായ രീതിയില് ഗ്രൗണ്ടില് പുല്ല് വെച്ച് പിടിപ്പിച്ചു. മത്സര ശേഷം സ്റ്റേഡിയം കേരള ഫുട്ബോള് അസോസിയേഷന് കൈമാറും. തുടര്ന്നുള്ള പരിപാലനം കെ.എഫ്.എ നടത്തും.
പ്രൊഫഷണല് ഫുട്ബോള് മത്സരങ്ങള് കണ്ണൂരിലേക്ക് മടങ്ങിയെത്താന് ജവഹര് സ്റ്റേഡിയത്തില് നിരവധി പ്രവര്ത്തികള് പൂര്ത്തിയാക്കേണ്ടതുണ്ട്. ബലക്ഷയം കാരണം ഉപയോഗിക്കാന് സാധിക്കാത്ത ഈസ്റ്റ് ഗ്യാലറി ആരാധകര്ക്ക് ഉപയോഗിക്കാന് സാധിക്കുന്ന രീതിയിലുള്ള മാറ്റേണ്ടതുണ്ട്. സൂപ്പര് ലീഗിലെ ആദ്യ മത്സരത്തില് നിരവധി ഫുട്ബോള് ആരാധകരാണ് മത്സരം കാണാനായി എത്തി സ്റ്റേഡിയത്തിന് അകത്തേക്ക് പ്രവേശിക്കാന് സാധിക്കാതെ തിരിച്ചു പോയത്. കണ്ണൂരില് നിരവധി ഫുട്ബോള് ആരാധകരുണ്ടെങ്കിലും എല്ലാവര്ക്കും ഒന്നിച്ചിരുന്ന് മത്സരം കാണാന് സാധിക്കുന്ന സ്റ്റേഡിയം കണ്ണൂരിലില്ല. കളിക്കാര്ക്കുള്ള ഡ്രസ്സിംങ് റുമുകള്, ആവശ്യമായ ടോയ്ലറ്റുകള്, മെഡിക്കല് റൂം, ഓഫീസ് റൂം തുടങ്ങിയ എല്ലാ സംവിധാനങ്ങള് സ്റ്റേഡിയത്തില് നിര്മ്മിക്കേണ്ടതുണ്ട്. രാത്രി മത്സരം നടത്തുന്നതിന് വേണ്ട സ്ഥിരമായ ഫ്ളഡ് ലൈറ്റിനുള്ള സൗകര്യം ഒരുക്കേണ്ടതുണ്ട്. അതിനുള്ള ചര്ച്ചകള് കണ്ണൂര് മുന്സിപ്പാലിറ്റിയുമായി കണ്ണൂര് വാരിയേഴ്സ് ആരംഭിച്ചിട്ടുണ്ട്.
കണ്ണൂരില് ഫുട്ബോള് ആവേശം തിരികെ കൊണ്ടുവരാന് സാധിച്ചതില് സന്തോഷം. വരും വര്ഷങ്ങളില് കാണികള്ക്ക് മികച്ച രീതിയില് കളി ആസ്വദിക്കാന് മാനേജ്മെന്റ് സൗകര്യമൊരുക്കും. നാല് മാസം മാത്രം ഒതുങ്ങിനില്ക്കുന്നതല്ല കണ്ണൂര് വാരിയേഴ്സിന്റെ പ്രവര്ത്തനമെന്നും കേരളത്തിന് മാതൃകയാകുന്ന രീതിയില് കണ്ണൂരില് ഫുട്ബോള് പ്രവര്ത്തനങ്ങള് സംഘടിപ്പിക്കാനാണ് ക്ലബ് ശ്രമിക്കുന്നതെന്നും കണ്ണൂര് വാരിയേഴ്സ് എഫ്സി ചെയര്മാന് ഡോ. എം.പി. ഹസ്സന് കുഞ്ഞി പറഞ്ഞു
സൂപ്പര് ലീഗ് കേരളയിലൂടെ കണ്ണൂര് ഫുട്ബോളിന് ഉണര്വ് നല്ക്കാന് കണ്ണൂര് വാരിയേഴ്സിനായി. ഈ ഫുട്ബോള് ആവേശം മുന്നോട്ട് കൊണ്ടു പോകാന് ജില്ലാ ഫുട്ബോള് അസോസിയേഷന്റെ വിവിധ പദ്ധതികള് ഒരുങ്ങുന്നുണ്ട്. കണ്ണൂരിലെ ഫുട്ബോള് പ്രതാപത്തെ വീണ്ടെടുക്കുകയാണ് ലക്ഷ്യമെന്നും ഡോ. എം.പി. ഹസ്സന് കുഞ്ഞി കൂട്ടിച്ചേർത്തു.